8
Ngá nû é naú shuq kô lo é,ngá é mùng zo lhû nghut àq mhaî!
Haú hkûn, ngò gi, nang lé shinggan má myàng mù,
nang lé bo-puq puq byî é nghut jáng,
ó yùq le ngo lé wú tiq pyám râ a nghut.
2 Ngò gi, nang lé ngá nû é yhûm má shuî ló râ nghut lhê;
yhang gi, ngo lé mhoq kyo sû nghut lhê.
Ngò gi, nang lé, chi nyhô tô é tsibyiq wing eq
ngá é lungshi awing shuq nhâng râ nghut lhê.
3 Yhâng é lòqpaî lòq gi, ngá é ulhum ô má to mù,
yhâng é lòqyo lòq gi, ngo lé po zing tô ri.
4 Yerusalem byìzô pé ê, chyit myìt é ahkyíng a jé jé gi,
haú lé hkâ-nhau kó, hkâ lhoqpun kó nghû,
ngò, núngmòq lé pying tô lhê.
Luzúm Wuî
5 Yhâng é chyit sû lé nghe to mù,
yòso mai dòq lé lo é byìzo gi, ó yùq nghut lhê lhú?
Chyit Sû Byìzo
Ngò gi, nang lé, jawú-mân shi gâm ô shî má nhaû toq râ nghut lhê;
náng nu gi, haú má nang lé zogûng wùn mù,
nang lé hku é zohkû nò no é nghut ri.
6 Ngo lé, náng é i-myìt má le dizìk su,
náng é lòq má le dizìk su tap to aq;
hkâsu mù gâ le, chyit lhum hkyô gi,
shî nò hkyô eq rajung za wúm htan é nghut mù,
hau é mânon é myìt gi, mosumhkung su wuî ri.
Haû gi, myiduq myishâm mó su,
nyé dùq nyi é nghut ri.
7 Wuì myo myo gi, chyit myìt lé a wó lhoqjôm pyám;
wuìlàng pé lháng, haú lé a wó ûm nghop pyâm é nghut lhê.
Rayùq yùq, yhâng é yhûm má lúng é bànshoq lé, chyit myìt é matú byi naû kôlhang,
wú tiq pyám byî é chyat hui zo râ nghut lhê.
Luzúm Wuî
8 Ngá-mòq gi, dùmó zo rayùq wó lhê;
yhang gi, naú lháng a bom shi nghut ri.
Dùmó zo haú lé lé dung kô é buìnyì má,
yhâng é matú ngá-mòq hkâsu kut râ lhú?
9 Yhang gi, wàhkûm nghut é nghut jáng,
yhâng chyáng ngùn mâchya saî toq râ nghut lhê.
Yhang gi, hkum nghut é nghut jáng,
yhang lé kyám gâm sik èq kyâm lhîng to râ nghut lhê.
Chyit Sû Byìzo
10 Ngò gi, wàhkûm nghut lhê;
ngá é naúwang í cham gi, mâchya eq du lhê.
Haû mù, ngò gi, myìt nguì myìt ngón hkyô byi sû su,
yhâng é myòq hí má myòqdong wó nyi ri.
11 Sholumon gi, Balaq Hamon jowò má tsibyiq hkyâm rahkyâm wó ri;
yhang gi, hkyâm haú lé, hkyâm zúng bâng é lòq má ngho byî tô é nghut mù,
yùq hkangmó gi, haú mâ é shi myàng zo kô é yánmai,
ngùnhtung myi joí èq ngó xe hkyuq rûng byî akô nghut ri.
12 Nghut kôlhang, ngá é tsibyiq hkyâm gi, ngò eq sêng é nghut mù,
Sholumon ê, nang lé myi joí byi bá;
ngá é hkyâm zúng bang gi, súm xe í rûng kô yù kó sháng gàq.
Chyit Sû Yùqzo
13 Hkyâm pé má nyi é byìzo ê,
luzúm wuî gi, náng é htê lé wó gyô yu akô;
ngo lé le, náng é htê lé wó gyo nhâng àq.
Chyit Sû Byìzo
14 Ngá é chyit sû ê, hân lé lô àq ô!
namngón jung yùq é bùm pé mâ é xat zo,
a nghut jáng, chochî zìng su nghut nyî àq ô!