7
Zau hpyi zo ê, hkyî-tsung tsûng é náng é hkyî gi,hkâ-í yhang yúng ri myhî-nhung!
Náng é jeju hkyî gi, lòqmú zui saí su é lòq èq,
saî mhôn tô é hîng zè eq du ri.
2 Náng é choq gi, lhum lhum zâ é gòm eq dù luî,
haú má nyhô tô é tsibyiq wing hkâ-nhám le a langhpyùt nghut ri.
Náng é hpyidum má gi, htupbó ban hkóng hut to mù,
súngsô bùm eq du ri.
3 Náng é naúwang í cham gi,
xat zo zozûm eq du ri.
4 Náng é lìngzing gi, xângzuì mâchya eq du ri.
Náng é myòqjí gi, Bàt Rabim hkum yâm mâ é,
Heshibon wà mâ é wuìhtum pé eq du ri.
Náng é nhô gi, Damasikuq wà shut hu tô é,
Lebanon bùm mâ é mâchya eq du ri.
5 Náng é ulhum gi, náng é gùng má Hkarimela Bùm eq du ri;
náng é xâm gi, nè noq nòq é gù bo é hkyîng eq du ri;
hkóhkâm hpó lháng, xâm haû nìk tô é má wé zing tô é huî ri.
6 Ngá chyit, gabú nguì ngón é byìzo ê,
nàng gi, hkâ-í yhang yúng é eq hkâ-í yhang nguì ngón ri nhung!
7 Náng é gùnghkyâng gi, byùm gàm eq du ri;
náng é naúwang gi, shipaû pé eq du ri.
8 “Ngò gi, byùm gàm má dòq râ;
ngò gi, hau é shikoq pé lé zuî zìng râ nghut lhê.” nghû taî é nghut lhê.
Náng é naúwang gi, tsibyiq nuî mâ é tsibyiq shipaû su dùt mù,
náng é soq gi, jawú-mân shi shôm su nghut nyî sháng gàq.
9 Náng é nhut gi, je ge é tsibyiq wing su nghut nyî sháng gàq.
Chyit Sû Byìzo
Tsibyiq wing haû gi, ngá é chyit su chyáng díng za yui gyó ló mù,
yhâng é nhutwuî mai yhó le zuì má yui wang ló sháng gàq.
10 Ngò gi, ngá é chyit sû eq sêng é nghut mù,
yhang gi, ngo lé za myìt tuî nyi ri.
11 Ngá é chyit sû ê, lé aq;
yòsô mau shut htoq ê mù,
wà pé má myín ê nyi lai gòq.
12 Tsibyiq nuî pé achyu chyu a chyû é wú râ matú le,
haú pé abó bó é wú râ matú le,
lungshi pé abó bó é wú râ matú le,
nàpsûn noq le tsibyiq hkyâm shut ê gòq;
haú má ngò ngá é chyit myìt nang lé àp byi râ nghut lhê.
13 Ngá é chyit sû ê, chyit myìt nhaû toq jung ban shôm nam ngón ri;
ngá-nhik é hkum yâm má, chuî nghâm é shi asik axau ajung jung lé,
náng é matú ngò tsîng to byi bê nghut lhê.