Luzúm Wuî
6
Byìzô pé má je yúng sû ê,nàng chyit é sû gi, hká e ri lhú?
Ngá-mòq, nàng eq rahá wó bo chôm hô sháng gàq,
nàng chyit é sû gi, hká shut e ló ri lhú?
Chyit Sû Byìzo
2 Ngá é chyit sû gi, htupbó ban ê hkyui râ matú le,
hkyâm má sau hpúng ê kat râ matú le,
namngón jung agàm lé bóm tô é jang pé má ê râ matú le,
yhâng é hkyâm shut e ló bê nghut ri.
3 Ngò gi, ngá é chyit su é byù nghut mù,
ngá é chyit sû le, ngá é byù nghut ri;
yhang gi, htupbó ban yô má sau hpúng lé zúng ri.
Chyit Sû Yùqzo
4 Ngò chyit sû ê, nàng gi, Tiriza wà su le,
Yerusalem wà mó su le yúng mù,
donghkón chung é gyè hpúng pé su,
hkìkhkâm hpung bo ri.
5 Náng é myòqjí, ngo lé hkâwú tsuq to;
haû gi, ngo lé sing nán nhang ri.
Náng é xâm gi, Gile-at bùm mai gyó lo é,
bainám hpúng eq du ri.
6 Náng é zuì gi, chi mù,
htoq lo é sau hpyû hpúng eq du ri;
razúm zúm nghut mù,
radu lháng a byùq nghut ri.
7 Náng é boshi gi, náng é myòqnghop ahkaû má,
lungshi cham eq du ri.
8 Hkóhkâm myhî pé hkyuq xê yùq,
myi-ngê wuìshit xê yùq eq zo-myi gyíng pé a ung nghap é nghut kôlhang,
9 ngá é hpûngkyui, ngá é gúmjùp sû gi, yhang mai lai luî, ó a nyì;
yhang gi, yhâng nû é byìzo te nghut mù,
yhang lé hkû sû înu chyitdàp dik é sû nghut ri.
Zo-myi zô pé, yhang lé myàng luî, hkungsô wó sû gâ akô nghut ri;
hkóhkâm myhî pé eq myi-ngê wuì gi, yhang lé hkya-ôn bum akô nghut ri.
Luzúm Wuî
10 Nàpsûn su maubó luî,
lhó su xân yúng mù,
buì su dùq bang htoq lô luî,
donghkón chung é gyè hpúng lé su gyùq chiq râ é sû gi,
ó yùq nghut lhê lhú?
Chyit Sû Yùqzo
11 Ngò gi, langhkaû mâ é hôwa zo yùq lo é lé wú râ matú le,
tsibyiq nuî achyu, chyu a chyû é eq,
lungshi gàm abó, bó a bó é lé wú râ matú le,
shi hkyâm má gyó e é nghut lhê.
12 Ngò gi, a bûn nùng má,
ngá é myìt ô nau é yánmai,
ngá é byu pê é xânghpoq nge wó gyèlhêng pê èq,
ngo lé wam lhîng tô é hui bê nghut ri.
Luzúm Wuî
13 Shulam byìzo ê, lò àq, lò àq;
ngá-mòq nang lé wú bá, lò àq, lòq àq!
Chyit sû yùqzo
Mahana-im pé gó é lé wú zùq tô é su,
haî mù Shulam byìzo lé wú tsuq nyì râ lhú?