Chyit Sû Yùqzo
5
Ngá dùmó, ngá é myisik ê, ngò gi, ngá é hkyâm má wang lé bê;ngá é mura eq namngón jung pé lé, ngò xik yû bê nghut lhê.
Ngò gi, ngá é byobung mâ é le, ngá é byo-î lé le zo bê nghut é htoq agó,
ngá é tsibyiq wing eq ngá é no-naú lé le shuq bê nghut lhê.
Luzúm Wuî
Luzúm wuî ê, zo keq, shuq keq;
chyit myìt lé, gyi shoq shuq keq.
Chyit Sû Byìzo
2 Ngò yhup to kôlhang, ngá é i-myìt nhiklhum gi, bûn gyîng tô ri.
Gyo aq! Ngá é chyit sû gi,
“Ngá dùmó, ngá é chyit sû ê, ngo lé hkum hpóng byi laq;
ngá é hpûngkyui, ra a bo é ngá é sû ê, hpóng byi laq.
Ngá é ulhum gi, nghân teq byùq mù,
ngá é xâm gi, myín lhê é nghânsoq teq byùq bê nghut ri.” ga taí uchyang hkum bàt nyi ri.
3 Ngá é mèbu hkyut to bê le nhîng,
dum wùt kat ra râ lhú?
Ngá é hkyî chî to bê le nhîng,
dum lhoqgòt yù ra râ lhú?
4 Ngá é chyit sû gi, hkumchyap mai yhâng é lòq chyoi hâng kat é nghut mù,
ngò gi, yhâng é matú singguq htûng nyi ri.
5 Haû mù, ngò gi, ngá é chyit sû lé hkum hpóng byi râ matú, toq bê nghut lhê;
ngá é lòq gi, mura má jum yu é nghut mù,
ngá é lòqnyhui mâ é mura gi,
hkumkyáng htoq má yui gyó gyûn ri.
6 Ngá é chyit su é matú, ngò hkum hpóng byi kôlhang,
ngá é chyit sû gi, taû ló byùq bê nghut ri.
Yhang ló byùq mù, ngá é myìt ahuí aha yhang gâ byùq ri;
ngò gi, yhang lé hô kôlhang, a myang hô;
wùt kôlhang, yhang a tû byùq nghut ri.
7 Wà zúng bang, wà má sô lhîng kô é u,
ngo lé lhom myàng kômù,
ngo lé lhom bàt pup akô nghut ri;
wàhkûm lé zúng é bang gi,
ngá é myòqnghop lé lú yu pyám byî akô nghut ri.
8 Yerusalem byìzo wuì ê, ngò, núngmòq lé sang to kó lé,
ngá é chyit sû lé núngmòq myang hô kôjáng,
chyit myìt é yánmai ngò mòq byùq bê nghut é hkyô,
yhang lé bo taî kyo byi keq.
Luzúm Wuî
9 Byìzô pé má je yúng sû ê,
náng é chyit sû gi, góbâng htoq hkâ-í yhang hkìk ri lhú?
Náng é chyit sû gi, góbâng htoq hkâ-í yhang hkìk mù,
nàng, ngá-mòq lé shî su nghû wó sang tô é nghut lhê lhú?
Chyit Sû Byìzo
10 Ngá é chyit sû gi, nè shi pân hpungwup bò sû nghut mù,
byù ra-mun má je hkìk sû nghut lhê.
11 Yhâng é ulhum gi, hîng gyíng su yúng é nghut mù,
yhâng é xâm gi, htû luî,
nghoqnòq sho-maú su nòq ri.
12 Yhâng é myòqjí gi, no-naú má chî yù mù,
hîng zè lé su rago saî ge tô é,
wuì zo làng yàm mâ é
hpûngkyui eq du ri.
13 Yhâng é boshi gi, namngón jung lhoqhtoq é,
namngón jung agàm yùq é myì bóm eq dù mù,
yhâng é nhutwuî gi, mura wing má jum yu é htupbó ban eq du ri.
14 Yhâng é lòq gi, bó huî hui é jung lungsêng nghut é utohpaya shup tô é hîng dumbáng eq du ri;
yhâng é gùnghkyâng gi, mauhkûng nyuì lúngseng èq mhôn tô é, suî chyut to bê xângzuì eq du ri.
15 Yhâng é hkyî gi, hîng gyíng gòm má tsung é lùq hpyû zìng eq du ri.
Yhâng é ihpyô isâm gi, Lebanon bùm mâ é je réng é kyám gâm eq du ri.
16 Yhâng é nhut mai gi, dang ngón dang nguî htoq nyi ri;
yhang gi, ragùng gón wú chyit nhô za dùt ri.
Yerusalem byìzô pé ê,
shî gi, ngá é chyit sû, ngá é luzúm nghut lhê.