Chyit Sû Yùqzo
4
Ngá é chyit sû ê, nàng gi, yúng dik ri ô!Gè gè yhang, yúng dik ri ô!
Náng é myòqjí gi, náng é myòqnghop ahkaû má, hpûngkyui su nghut ri.
Náng é xâm gi, Gile-at bùm pé mai gyó lo é,
bainám hpúng pé eq du ri.
2 Náng é zuì gi, sho-maú wùq pyám mù,
chi luî, htoq lo é sau hpyû hpúng eq du ri.
Razúm zúm chyat nghut mù,
radu baú dùt tô é a bò nghut ri.
3 Náng é nhutwuî gi, hkyîng nè eq du ri;
náng é nhut gi, yúng dik ri.
Náng é boshi gi, náng é myòqnghop ahkaû má,
lungshi cham eq du ri.
4 Náng é lìngzing gi, lùqgòk pê èq saî tô é,
Dawiq é mâchya eq du ri;
haú má, sarhê pê é gòlong rahkyîng lhâng tô ri.
5 Náng é naúwang í cham gi,
htupbó ban yô má gó ngón kûn é,
xat zo zozûm eq du ri.
6 Ngò gi, nàpsûn mau a bó shi-má,
wùpzo a byùq byùq shilé,
mura yùq é bùm má dòq ló mù,
namngón jung loban yùq é kong má dòq ló râ nghut lhê.
7 Ngá é chyit sû ê, nàng gi, ragung é yúng dik ri;
náng chyáng râ é hkyô haî a bò nghut ri.
8 Ngá é myisik ê, ngò eq rahá Lebanon bùm mai htoq ló gòq;
ngò eq rahá Lebanon bùm mai htoq ló gòq.
Amana bùm gùng mai, Herimon bùm eq Senira bùm nyuq mai,
hkanghkyi hkyûng eq lo-ká mó nyi é bùm mai, gyó lô àq.
9 Ngá dùmó, ngá é myisik ê,
nàng gi, ngá é myìt lé hkaû yu ló bê nghut ri;
nàng gi, náng é myòqlàp ralàp èq le,
náng é lìngzing mâ é wuizô èq le,
ngá é myìt lé hkaû yu ló bê nghut ri;
10 Ngá é dùmó, ngá é myisik ê,
nàng chyit é gi, hkâ-í yhang ngón ri nhung!
Nàng chyit é gi, tsibyiq wing htoq je ge ri;
náng é namngón xû loban gi, namngón jung bànshoq htoq je ge ri nhung!
11 Ngá é myisik ê, byobung mâ é chuî nghâm é byo-î su,
náng é nhutwuî mai chuî nghâm é htoq nyi ri;
no-naú eq byo-î gi, náng é shô ô má byíng tô ri.
Náng é mèbu pé mâ é namngón jung gi,
Lebanon bùm mâ é namngón jung eq du ri.
12 Ngá é dùmó, ngá é myisik ê,
nàng gi, kyâm tô é hkyâm nghut mù,
chî tô é wuìbúm eq dizìk htûng tap tô é wuìbúm dong nghut ri.
13 Náng é agàm pé gi, lungshi yò nghut mù,
já é ashi zuî ri.
Hena gàm eq naridu gàm,
14 naridu gàm, jamga gàm,
hkalamu gàm, changhpyik gâm pé eq namngón jung agàm a-myû myû,
mura gàm, achyo gàm eq je namngón é jung bànshoq le yùq tô bum ri.
15 Nàng gi, hkyâm mâ é wuìbúm,
wuì ru htoq nyi é wuìhtúng,
Lebanon bùm mai yui gyó lo é wuì zo làng nghut ri.
Chyit Sû Byìzo
16 Mautsûng laì ê, toq àq;
maupyî laì ê, lò àq!
Ngá é hkyâm mâ é namngón jung,
ra-mîng é byo myín sháng gàq, hau é ahtoq má mùt byi aq.
Ngá é chyit sû gi, yhâng é hkyâm má wàng mù,
haú mâ é chuî nghâm é shi zo sháng gàq.