3
Ra-myin mau, ngá é yhuphpyang má,ngá é myìt mai chyit é sû lé ho nyi é nghut lhê;
yhang lé ngò hô kôlhang, a myàng nghut ri.
2 Ngò gi, ahkuî toq mù, wàhkaû má ê luî,
wà hkyô pé eq wà mâ é lam é jowò pé má ê sô lhîng mù,
ngá é myìt mai chyit é sû lé hô râ nghut lhê.
Ngò, yhang lé hô kôlhang, a myàng nghut ri.
3 Wà zúng bang, wà má sô lhîng kô é u, ngo lé lhom myàng kôjáng,
ngò gi, yhángmòq lé, “Ngá é myìt mai chyit é sû lé a bo myàng kó lhú?” nghû myî é nghut lhê.
4 Yhángmòq chyáng mai ra-tsuí laî ló jáng,
ngò gi, ngá é myìt mai chyit é sû lé myang ri;
haú hkûn, ngò gi, yhang lé zuî zing to mù,
ngá nû é yhûm eq ngo lé zogûng wun é wàp má a shuî jé jé,
yhang lé a nhang kat é nghut lhê.
5 Yerusalem byìzô pé ê,
chyit myìt é ahkyíng a jé jé gi,
haú lé hkâ-nhau kó, hkâ lhoqpun kó nghû,
yòso mâ é xat pé eq chochî pê é myìng lang luî,
núngmòq, ngo lé dâkam to keq.
6 Mura, namngón jung loban eq
wuìloq kut bang ûng é namngón jung a-myû myû lé bùt to mù,
yòso mai myihkau htoq é su dòq lé lo é gi,
ó yùq wá nghut lhê lhú?
7 Wú keq! Haû gi, Sholumon lé wàq dang é zùng tánghkuq nghut ri;
Isira-elaq sarhê pé mâ é,
sarhê hkyuq xê yùq hau é lhînghkyùq má zúng nyi bum ri.
8 Yhángmòq bànshoq bang gi, shâm chung tô é htoq agó,
majan zân wú bê bang chyat nghut akô;
yùq hkangmó gi, myín lhê é gyùq chiq hpô é matú,
shâm wun tô bum akô nghut ri.
9 Hkóhkâm Sholumon gi, yhâng é matú,
Lebanon bùm mâ é sik èq wàq dàng zùng tánghkuq saî yu ri.
10 Hau é zing pé gi, ngùn;
hkâng tô é gi, hîng nghut mù,
zùng jang má gi, mê é pán nghop to luî,
hau é ahkaû má gi, chyitdàp myìt shup tô ri.
Zi-un byìzôa pé ê, wú keq.
Myi háng luî, yhâng é i-myìt gabú byam chyû nyi é buìnyì má,
yhâng nu tsung byî é jánmaú tsûng tô é,
Hkóhkâm Sholumon lé wú keq.