YEREMI-AQ LAIKÁ
Laiká
(Jeremiah)
1
Dang shí pé gi, Ben-yamin up maumyî, Anahtot wà mâ é hkyangjông pé mâ é rayùq nghut é Hiliki-a é yhang zo Yeremi-aq é dang nghut ri. 2-3 Yudaq hkóhkâm Amon é yhang zo Yosi-a ùp é raxe súm zan zàn hî luî, Yudaq hkóhkâm Yosi-a é yhang zo Yehoi-akim ùp é i-pyàt gón má le, haû mai, Yerusalem wà mó mâ é byu pé shúm zung byùq é u, Yudaq hkóhkâm Yosi-a é yhang zo Zedeki-a ùp é raxe razan zàn lha-mó ngo hkyap hkyap jé shoq le, haû Yhûmsîng Garaî é mungdang gi, Yeremi-aq chyáng jé ri.Yeremi-aq Ji Yù Huî É Hkyô
4 Haû Yhûmsîng Garaî é mungdang ngá chyáng jé é gi,
5 “Ngò, nang lé náng nû é ûnghkaû má azòng a saí shi-má lháng, nang lé Ngò sé bê nghut lhê;
nàng a hku lé shi-má lháng, nang lé Ngò gótû kut lhoq sân-yúng to bê nghut lhê.
Ngò gi, nang lé, byù myû wui é myìqhtoi dùt râ matú, wò hun to bê nghut lhê.” gâ ri.
6 Haû mù, ngò gi, “Goì ê, Ahko Ahkáng lhúnglháng wó Sû Yhûmsîng Garai ê, ngò gi, dang a ge taí sû nghut lhê. Ngò gi, zoshâng ru nghut ashî ô!” nghû taî é nghut lhê.
7 Nghut kôlhang, haû Yhûmsîng Garai gi, ngo lé, “Nàng, ‘Ngò zoshâng ru nghut ashî.’ nghû hkâtaí. Nang lé ó yùq chyáng nghut kôle, ngò nhang kat é nghut jáng, nàng ê ra râ nghut lhê; haû mù, Ngò, nang lé hkunmó hkyô é eq rajung za haú yùq lé taí ra râ nghut lhê. 8 Yhángmòq lé hkâgyùq; hkâsu mù gâ le, Ngò gi, nàng eq rahá nghut nyî mù, nang lé hkyi xe yù râ nghut lhê.” ga taî ri; haû gi, Yhûmsîng Garai taî pyo é nghut ri.
9 Hau htâng, haû Yhûmsîng Garai gi, Yhâng é lòq lhâm kat mù, ngá é nhut má lé záng luî, ngo lé, “Wú aq; Ngò gi, náng é nhut má Ngá é dang pé kat byi bê nghut lhê. 10 Xûm to aq; Ngò gi, nùt htoq pyám râ eq hpyoq hpyi pyám râ matú le, lhoqhtên pyám râ eq tu mhuq pyám râ matú le, dum saî saí râ eq hô hkyó râ matú le, a-myû wuì eq hkóhkâm mîngdán pê htoq má nyì râ dông hkû-nyí nang lé hkyin htoq to bê nghut lhê.” ga taî ri.
11 Haû Yhûmsîng Garaî é mungdang gi, “Yeremi-aq ê, nàng haî myang ri lhú?” ga ngá chyáng jé ri.
Haú hkûn, ngò gi, “Alamon sikkoq rakoq lé myang ri.” nghû tû taî é nghut lhê.
12 Haû jáng, haû Yhûmsîng Garai gi, ngo lé, “Nàng myang é jo bê nghut ri; hkâsu mù gâ le, Ngò le, Ngá é dang lhoqdìk râ matú wú nyi é nghut lhê.” ga taî ri.
13 Hau htoq agó, haû Yhûmsîng Garaî é mungdang gi, “Nàng haî myang ri lhú?” ga ngá chyáng dum jé ri.
Ngò gi, “Tsu nyi é au rahkyap, mautsûng mai ngá-mòq shut lé lo nyi é lé ngò myang ri.” nghû tû taî é nghut lhê.
14 Haû Yhûmsîng Garai gi, ngo lé, “Mautsûng mai ihkyùp mó htoq lô mù, shí mau má nyi é byù bànshoq bâng chyáng jé râ nghut lhê. 15 Ngò gi, mautsûng hkyam mâ é hkóhkâm mîngdán pé mâ é byù bànshoq lé ji tsing râ za nghut bê.” ga taî ri; haû gi, Yhûmsîng Garai taî pyo é nghut ri.
“Yhángmòq é hkóhkam pé lé lô mù,
Yerusalem wà mó é hkum hí má, yhángmòq hkóhkâm tángmyhâng tsung to luî,
hau é wàhkûm pé lhînghkyùq lé le,
Yudaq mau mâ é wà pé lé le, htim kôrâ nghut lhê.
16 Ngá é byu pé gi, Ngo lé tô pyâm to kômù,
gótû hparà lé namngón jung hkungga nyhê nhông byi kôluî,
yhángmòq é lòq èq saî é zè pé lé noqkuq akô nghut mù,
yhángmòq é agè ashop hkyô hau é yánmai,
Ngò, yhángmòq lé mara dam byi berâ nghut lhê.
17 Haû mù, nàng gi, rì rì nghut é dông hpyihit hit àq; toq mù, Ngò, nang lé hkunmó hkyô é lhúnglháng yhángmòq lé taî kyo aq. Yhángmòq é hí má Ngò nang lé a kyuq nhán râ matú, yhángmòq é yánmai nàng hkâgyùq nán. 18 Wú aq, mîngdán gón lé le, Yudaq hkóhkam pé lé le, hau é zaugun wuì, hkyangjông pé eq mingbyû wuì lé le htuqhtíng râ matú, hkû-nyí, Ngò, nang lé, gingtíng wà mó dông le, jòqtoq zìng mó dông le, gyi wàhkûm dông le kut to bê nghut lhê. 19 Yhángmòq gi, nang lé lhom taû htim kôrâ nghut lhê; nghut kôlhang, nang lé wó ûng kôrâ a nghut. Hkâsu mù gâ le, Ngò gi, nàng eq rahá nghut nyî mù, nang lé hkyi xe yù râ nghut lhê.” ga le taî ri; haû gi, Yhûmsîng Garai taî pyo é nghut ri.