Garai Gasang Lé Isira-elaq Byu Pé Tô Pyâm Tô É Hkyô
2
Haû Yhûmsîng Garaî é mungdang ngá chyáng jé é gi, 2 “Yerusalem wà byù wuì wó gyô tô é má shî su nghû ê taí aq;haû Yhûmsîng Garai taî le,
‘Ngò gi, nàng chyungxe zànwut rám tô hkun lhê é jujúm chyitdàp myìt lé le,
myisik su, nàng, Ngo lé chyit é hkyô lé le,
kyôshi a hkyô wú é maumyî nghut é, yòso má,
nàng, ngá htâng châng wún é hkyô lé le, myìtbûn ri.
3 Haú hkûn, Isira-elaq gi, haû Yhûmsîng Garaî é matú chyoiyúng é eq
sânghi myhîng é ashi pé nghut ri;
yhang lé mhaú zo mhaú shuq é bang bànshoq gi,
mara bo bum akô nghut ri;
haû mù, yhángmòq chyáng byò dàn byò sho hkyô jé bê nghut lhê.’ gâ ri.” gâ ri;
haû gi, Yhûmsîng Garai taî pyo é nghut ri.
4 Yakup é awùt ashín, haû Isira-elaq é a-myû koq bànshoq ê,
Yhûmsîng Garaî é dang lé gyo keq.
5 Haû Yhûmsîng Garai taî le,
“Núngmòq é îchyí îwâ pé gi,
Ngò eq wê gang shoq hkyô nghoq ló byùq kômù,
a-kyû a bo é hparà hpôlhô pê htâng cháng kôluî,
a-kyû a bo é bang dùt byùq shoq,
Ngá chyáng hai mara myang akô lhú?
6 Yhángmòq gi, ‘Egutuq ming mai ngá-nhúng lé shuî dòq lò mù,
haî le a yùq é yòso mai le,
chamchyuîyuì dùt é jowò eq langhkaû pé mai le,
kyuq huî é eq tuq tuq mauchut é maumyî mai le,
ó le a sô lai é eq ó le a nyi é jang mai le,
ngá-nhúng lé shuî-û lo é Sû Yhûmsîng Garai gi,
hká má lhú?’ ga yhángmòq a myi kó nghut ri.
7 Ngò gi, núngmòq lé, myìhpún bo é maumyî mâ é ashi pé eq
haû mai htoq é zoshuq pé lé zo râ matú,
maumyî haú má shuî jé wâng bê nghut lhê.
Nghut kôlhang, núngmòq gi, wàng mù, Ngá é maumyî lé agòt a-û kut pyám luî,
Ngá é silî wunlî maumyî lé achaq achyut kut pyám bekô nghut ri.
8 Hkyangjông pé gi,
‘Haû Yhûmsîng Garai gi, hká má lhú?’ ga a myi kó nghut ri.
Târâ agyì kut é bang gi, Ngo lé a sé kó nghut ri;
ushuq pé gi, Ngo lé gumlau toq akô nghut ri;
myìqhtoî pé gi, Balaq hparà lé lùm mù, myìqhtoi htoi kôluî,
a-kyû a bo é hparà hpôlhô pê htâng châng bum akô nghut ri.
9 Haû mù, Ngò gi, núngmòq eq dangnyhin dum nyhin râ nghut lhê.” gâ ri;
haû gi, Yhûmsîng Garai taî pyo ri.
Hau htoq agó, “Núngmòq é zodù wui é zodù wuì eq le dangnyhin nyhîn lhum râ nghut lhê.
10 Kupru zinlónga pé má dàp ê mù, wú wú aq;
Kedara shut byù nhâng mù, rago gôn wú aq;
haû sû é múzó dùt htoq wú é lùq, myìt wú aq.
11 Byù myû ra-myû gi, yhûmsing é hparà pé lé,
hparà lháng a nghut é hparà lhô pé eq htaí râ lhú?
Nghut kôlhang, ngá é byu pé gi, a-kyû a bo é hparà pê èq,
yhûmsing é hpungwup a-tsam bo é Garai Gasang lé htaî lhik pyâm akô nghut ri.
12 Mauhkûng ê, haú hkyo é yánmai, maú hong byùq luî,
gyai yhang gyùq chiq byùq mù, gyùq nán gyùq ngha byùq àq.” ga le,
haû Yhûmsîng Garai taî pyo ri.
13 Hau htoq agó, “Ngá é byu pé gi, í hkat kut shut bekô nghut ri.
Yhángmòq gi, chyungxe wuìbúm nghut é Ngo lé tô pyám kômù,
yhûmsing é matú, wuì le a wó díng é,
dông é wuì tíng dong pé lé dû akô nghut ri.
14 Isira-elaq gi, duìnhâng zoshâng nghut lhê lhú?
Yhang gi, hku lé é hkûn mai jùn nghut lhê lhú?
Haú lé nhîng, yhang gi, haî mù lú yu ló byùq é huî lhê lhú?
15 Hkanghkyi râm zô pé gi, yhang lé garû ngaù mù,
htê mó èq nying bum akô nghut ri.
Yhángmòq gi, yhâng é maumyî lé lhoqhtên pyám byi kôluî,
yhâng é wà pé lé nyhê hkyô pyám byi kômù,
chamchyuîyuì kut pyám byi bekô nghut ri.
16 Memhpi byu pé eq Tahpan-hesi byu pé le,
náng é ugyap lé lhoqhkoq byi bekô nghut ri.
17 Nàng gi, nàng e ló râ hkyô má nang lé shuî htoq lo é u,
náng é Garai Gasang nghut é, haû Yhûmsîng Garai lé tô pyâm to mù,
shî sû é ihkyùp lé hui zô lhê, a nghut lhú?
18 Ahkuî, nàng gi, Nile Wuìlàng mâ é wuì shuq râ matú,
haî mù Egutuq ming shut e lhê lhú?
Uhprat Wuìlàng mâ é wuì shuq râ matú,
haî mù Asuri shut e lhê lhú?
19 Náng é agè ashop hkyô gi, nang lé dàm byi râ nghut lhê;
nàng zùt taû ló byùq é hkyô gi, nang lé tan râ nghut lhê.
Náng é Garai Gasang nghut é, haû Yhûmsîng Garai lé nàng tô pyâm to mù,
Ngo lé gyùq hkúnggâ é myìt a bo é hkyô gi, hkâ-í yhang agè ashop hkyô nghut é eq,
hkâ-í yhang yón hpo nghut é lé,
myìt tû wú mù, sê gyo lo aq.” ga le,
haû Wum-o a-tsam dìk shoq bò Sû Yhûmsîng Garai nghut é, Yhûmsîng taî pyo ri.
20 Hau htoq agó, “Nàng gi, góhkûn mai náng é kyaú lé lhoqhkyuî pyám mù,
nang lé tuî tô é tui lé lâng hpyit pyám luî,
‘Ngò gi, Nang lé dójaú râ a nghut!’ ga taî ri.
Gè gè yhang, nàng gi, myhang é bùm hkangmó má le,
sikkoq hkyâm lam é sikgâm ô hkangmó má le,
shiwa myhí dông paî gòp wú bê nghut ri.
21 Nghut kôlhang, Ngò gi, nang lé,
je réng é tsibyiq nuî dông,
wó lum é a-myui nghû hô tô é nghut lhê mhaî.
Haû nghut é wá, nàng gi, Ngá é hí má,
haî mù hten byòq é eq yòsô tsibyiq nuî dùt byùq é lhú?
22 Nàng gi, náng gûng nàng machyaq wîng èq chi mù,
wó lhoq sanséng byî é a-mùn agùn agó chûng kôle,
náng é mara gi, Ngá é hí má de de ru dùt nyi ashî nghut ri.” ga le taî ri;
haû gi, Ahko Ahkáng lhúnglháng wó Sû Yhûmsîng Garai taî pyo ri.
23 Hau htoq agó, “Nàng gi, ‘Ngò agòt a-û a dùt é eq,
Balaq hparà pê htâng a cháng.’ nghû hkâsu wó taí râ lhú?
Langhkaû má nàng hkâsu kut laî é lé wú mù,
nàng haî kut shut bê nghut é lé myìtbun aq.
Nàng gi, wó din é gola-uk zîng zo su nghut mù,
shí shut hé shut din dâng wún ri;
24 yòso má lhing wún mán é yòsô loze nghut mù,
yùt yùt ô nau lò jáng nam hô mù,
ô naù luî nyé gadaú lô jáng, ó wó hkûm zìng râ lhú?
Yhang lé châng hkat ho é alo pé gi, ngú byùq râ a nghut;
ahkyíng jé jáng yhang eq htûng huî lhum kôrâ nghut lhê.
25 Náng é hkyî-tsung hkâ lhoqhtûm pyám;
náng é hkyung huî byùq shoq hkâ kut.
Nghut kôlhang, nàng gi, ‘Haû hai a-kyû a bò nghut ri!
Ngò gi, gó-mîng hparà pé lé chyit lhê nghut mù,
hparà haú pê é htâng cháng râ za nghut lhê.’ ga taî ri.
26 Chyup yû huî é hkau sû hoq hpu huî é su,
Isira-elaq byu pé, yhángmòq é hkóhkam pé,
yhángmòq é zaugun wuì, yhángmòq é hkyangjông pé eq yhángmòq é myìqhtoî pé gi,
hoq hpû é hui bekô nghut ri.
27 Yhángmòq gi, sikhtung lé, ‘Nàng gi, ngá wa nghut ri.’ ga taí mù,
lùqgòk lé, ‘Nàng, ngo lé hku é nghut ri.’ ga taí luî,
Ngá shut yhángmòq é myòqdong a hu é za,
yhángmòq é nùnghtáng hu pyâm akô nghut ri;
nghut kôlhang, yhángmòq wuîhke jamjau hui zo kô é hkûn,
‘Ngá-mòq lé, lé hkyi yù àq ô!’ ga taî akô nghut ri.
28 Haû jáng, núngmòq gùng núngmòq saî yu é hparà pé gi, hká má kó lhú?
Yhángmòq wó hkyi yù kô é nghut le gi,
núngmòq wuîhke jamjau hui zô nyi é hkûn,
yhángmòq lé hkyi yù kó sháng gàq!
Hkâsu mù gâ le, Yudaq ming ê,
náng é wà pé myô é eq rajung za,
náng é hparà pé le myô ri mhaî!
29 Núngmòq, haî mù Ngò eq dangnyhin nyhîn lhum râ lhú?
Núngmòq bànshoq bang Ngo lé gumlau toq bekô nghut ri.” ga le,
haû Yhûmsîng Garai taî pyo ri.
30 Hau htoq agó, “Ngò gi, akôm má núngmòq é byu pé lé dam byî pyám bê nghut ri;
yhángmòq gi, mhoqshit é hkyô lé a hkam yù kó nghut ri.
Núngmòq é shâm gi, hpyoq zo myàq zô é hkanghkyi su,
núngmòq é myìqhtoî pé lé lhoqhtên pyám bekô nghut ri.
31 Shí i-pyàt mâ é bang núngmòq ê,
haû Yhûmsîng Garaî é dang lé myìt tû wú keq;
Ngò gi, Isira-elaq a-myu é matú yòso dùt é,
a nghut jáng, mauchut tuq é mau dùt é nghut lhê lhú?
Ngá é byu pé gi, ‘Ngá-mòq lám mán bê nghut lhê;
ngá-mòq, Náng chyáng lé râ a nghut lo.’ ga haî mù taî akô lhâ?
32 Zo-myi zo gi, yhûmsîng wùt é hîng zè lé,
myisik gi, yhûmsing é mhôn é mèbu lé, ge tô-myhí pyâm lhê lhú?
Nghut kôle, Ngá é byu pé gi,
a ung nghap é buìnyì pé má Ngo lé tô-myhî pyâm akô nghut ri.
33 Nàng gi, chyit myìt lé châng hkat é má hkâ-í yhang kûng ri nhung!
Haû mù, nàng gi, myiwe gâng pé lé lháng náng hkyô mhoq byi bu-nhung!
34 Yhángmòq gi, hkau so labyoq a kut é bang nghut kôle,
mara a bo é asho awui dùt bâng é sui,
náng é mèbu má dàp tô é lé myang ri.
Haú pé bànshoq haú dông nghut kôle,
35 nàng gi, ‘Ngò mara a bò;
Yhang gi, ngo lé nhikjum a yo.’ ga taî ri.
Nghut kôlhang, nàng gi, ‘Ngò mara a kut shut.’ ga taî é yánmai,
Ngò gi, nang lé târâ jéyáng râ nghut lhê.
36 Nàng gi, haî mù, náng é hkyô htaî lhik pyám râ matú,
he shut shí shut din lhing wún lhê lhú?
Nàng gi, Asuri ming má hoq byùq é su,
Egutuq ming má le hoq byùq râ nghut lhê.
37 Nàng gi, náng é ulhum má lòq ke mù,
haú ming mai htoq lô râ nghut lhê;
hkâsu mù gâ le, nàng lùmhkau nyi é bang lé,
haû Yhûmsîng Garai he-ngìk pyám bê nghut mù,
yhángmòq gi, nang lé garúm yû râ a nghut.