NGAÙHKYANG SÂNG LAIKÁ
Laiká
(Lamentations)
Yerusalem Wà Mó Myìt Myo Ûng Wom Huî É Hkyô
1
Byù byíng zan tô wú é wà mó Yerusalem gi,hkâsu mù yhang baú chamchyuîyuì zung tô lhê lhâ!
Byù myû wui chyáng je kô hkìk é sû gi,
hkâsu mù chuimó myhí su dùt tô lhê lhâ!
Mau túm pé mâ é zauhpyi gi,
jùn myhí dùt byùq bu-nhung lhî!
2 Yhang gi, myín lé sing hpyik û gyàng ngaù mù,
boshi má ngaùbyi yui zan to bê nghut ri.
Yhang chyit é bang bànshoq má,
yhang lé nhiktíng byî é rayùq le a nyì nghut ri.
Yhâng é luzúm wuî bànshoq gi, yhang lé gumlau toq kômù,
yhâng é gye pé taû dùt byùq bekô nghut ri.
3 Yudaq gi, no hpu zo mù, jùn mû wùn wàq é htâng,
shúm zung é hui bê nghut ri.
Yhang gi, gótû byù myû wui chyáng nyi é nghut mù,
bánno jowò a myang hô nghut ri.
Yhang lé châng hkat é bang bànshoq gi,
yhang myìt myo ûng wom huî nyi é má châng hkyit bekô nghut ri.
4 Yhang masàt tô é poî má ó le a lé é yánmai,
Zi-un Bùm shut dòq e é hkyô pé gi, yón nyi bum ri.
Yhâng é wâng hkúmdong pé bànshoq gi, chamchyuîyuì dùt to mù,
yhâng é hkyangjông pé gi, iyon yôn nyì kôluî,
yhâng é myiwe zô pé gi, ngaùbyi ngaùnhap dùt nyi bùm kô é nghut mù,
yhang gi, dìk shoq hpu zô nyi ri.
5 Yhang lé gyè kut é bang gi, yhâng é yhûmsing pé taû dùt mù,
yhâng é gye pé gi, nyì ngón yùqyo nyi bum akô nghut ri.
Haû Yhûmsîng Garai gi, yhâng é yubàk mara myo myô é yánmai,
yhang lé yón kuq nhâng bê nghut ri.
Yhâng é zodù wuì gi, yhâng é gye pê é hí má,
shúm ê zung byùq bekô nghut ri.
6 Zi-un Byìzô é hpungwup shingkang bànshoq gi,
byùq ló byùq bê nghut ri.
Yhâng é zau zô pé gi,
mhan nú yô a myang ho é xat su dùt bum akô nghut ri.
Yhángmòq gi, châng hkat bâng é hí má,
wum-o le a bo é za hpâng bekô nghut ri.
7 Yerusalem gi, yhang no hpu zô nyi é eq yông lhing wún é buìnyì pé má,
laî ló bê buìnyì pé lhê é sùtzè pé bànshoq lé myìtbûn nyi ri.
Yhâng é byu pé, gye pê é lòq má wang byùq é hkûn,
yhang lé garúm yû râ byù a nyì nghut ri.
Yhâng é gye pé gi, yhang lé tu wú mù,
yhang htên byòq byùq é hkyô lé wuìzuì kut pyám byî akô nghut ri.
8 Yerusalem wà mó gi, gyai yhang mara kut shut bê nghut é yánmai,
agòt a-û dùt byùq bê nghut ri.
Yhang lé hkúnggâ é bang bànshoq gi,
yhang gùngchîn dùt tô é lé myang bùm kô é yánmai,
yhang lé wú tiq pyám bekô nghut ri.
Yhang gi, yón kuq mù,
zùt taû ló bê nghut ri.
9 Yhâng é a sansêng é hkyô gi, yhâng é hpyî-tsang má dàp shit to bê nghut ri;
yhang gi, jé lô râ hkyô lé a myìt jé nghut ri.
Yhang htên gyòp byùq é gi, gyai yhang maú dân hpo nghut mù,
yhang lé nhiktíng byî é byù a nyì nghut ri.
“Yhûmsîng Garai ê, ngò no hpu zô é hkyô lé wú aq;
hkâsu mù gâ le, ngá é gye pé gi, ûngmyuq hkyô wó bekô nghut ri.” ga, yhang taî ri.
10 Gye pé gi, yhâng é sùtzè bànshoq lé,
lú yu pyám byi bê nghut ri;
Náng é shiwa hpúng zîng é má a wó wâng ga,
Nàng hkûm tô é maigan byù myû wuì gi,
yhâng é sân-yúng jowò má wàng kô é lé,
yhang yhang myàng bê nghut ri.
11 Yhâng é byu pé bànshoq gi, zoshuq hô uchyang,
iyon yôn bum akô nghut ri;
yhángmòq gi, chyungxe wó byûn râ matú,
yhûmsing é hpaudap zè pê èq zoshuq htaî akô nghut ri.
“Yhûmsîng Garai ê, wú mù, myàng byi aq;
ngò gi, wú tiq pyâm é hui zô ri.
12 Shí hkyô mai laî ló é bànshoq bang ê,
núngmòq haî su a ngàm kut akô lhú?
Haû Yhûmsîng Garai nhikjum mó yô é buìnyì má,
ngá chyáng jé nhang é no hpu jamjau hkyô su dùt é,
no hpu jamjau hkyô gi, hká má jòq ri lhú?
Lhînghkyùq shut tu wú kat wú keq.
13 Yhang gi, myhang é jang mai myi lé nhang kat luî,
ngá é showui showang pé lé nyé gyòp nhang ri.
Yhang gi, ngá é hkyî myí râ matú gùn hpyi hkang luî,
ngo lé zùt taû ló nhang ri.
Yhang gi, ngo lé chamchyuîyuì kut pyám luî,
ra-nyí buî mòq byùq tó nhang ri.
14 Ngá é yubàk mara pé gi, kyaú má tuî tap to bê nghut mù,
haú pé lé yhâng é lòq èq tuî pûng to luî,
ngá é lìngzing má lhâng to bê nghut lhê;
haû Yhûmsîng Garai gi, ngá é wum-o lé yom byùq ló nhâng mù,
ngò a wó lhom htuqhtíng bâng é lòq má,
ngo lé àp pyám bê nghut ri.
15 Haû Yhûmsîng Garai gi, ngá chyáng nyi é sarhê pé bànshoq lé,
ngá é agùng má he-ngìk pyám bê nghut ri;
Yhang gi, ngá é zorâm wuì lé lhoqhtûm pyám râ matú,
ngo lé htuqhtíng râ gyè jùm lé ji tsîng yù bê nghut ri.
Haû Yhûmsîng Garai gi, Yhâng é tsibyiq wing pyik jang má,
Yudaq zo-myi gyínga pé lé nâng nyhaq pyám bê nghut ri.
16 Haû mù, ngò gi, ngau nyi é nghut luî,
ngá é myòqjí mai ngaùbyi yui gyó nyi ri.
Ngo lé nhiktíng byi râ byù le,
ngá é i-myìt sô lé lhoqngón byi râ byù le,
chyáng nâm má ó a nyì nghut ri.
Gye pé ûng bê nghut é yánmai,
ngá é zodù wuì htûm ló byùq bê nghut ri.” ga, yhang taî ri.
17 Zi-un gi, lòq lhâm kat kôlhang,
yhang lé nhiktíng byi râ byù a nyì nghut ri.
Haû Yhûmsîng Garai gi, Yakup é chyáng nâm mâ é byu pé lé,
Yakup é gyè dut râ matú hkunmó hkyô to bê nghut ri;
Yerusalem gi, yhángmòq chyáng,
achaq achyut é zè dùt byùq bê nghut ri.
18 “Haû Yhûmsîng Garai gi, díngmán ri;
nghut kôlhang, ngò gi, Yhâng é hkunmó lé lu laî pyám bê nghut lhê.
Byù lhúnglhâng bang ê, gyo keq;
ngá é wuîhke jamjau hkyô lé wú keq.
Ngá é yùqzo byìzo zorâm wuì gi,
shúm zung é huî byùq bekô nghut ri.
19 Ngò gi, ngò chyit é bang lé wùt kôlhang,
yhángmòq gi, ngo lé he-ngìk pyám bekô nghut ri.
Ngá é hkyangjông pé eq ngá é sûwún wuî gi,
yhángmòq é chyungxe wó dui nyì kôrâ matú,
zoshuq ho nyì bùm kô é u,
wà hkaû má shi htûm byùq bekô nghut ri.
20 Yhûmsîng Garai ê, wú aq;
ngò gi, hkâ-í yhang myìt myo ûng wôm nyi ri ô!
Ngò gi, myìt myô nyi ri;
ngò gi, gumlau je toq sû nghut é yánmai,
ngá é myìt hkaû má achyî a-ku gâ ri.
Shinggan má gi, sham èq byù sat nyi ri;
yhúmhkaû má gi, shî nò hkyô za jòq tô ri.
21 Byu pé gi, ngò iyon yôn é htê lé wó gyô bùm kôlhang,
ngo lé nhiktíng byi râ byù a nyì nghut ri.
Ngá é gyè bànshoq gi, ngò myìt myo ûng wôm é lé wó gyo kômù,
Nàng kut byî é hkyô haú má gabú byam chyû bum akô nghut ri.
Yhángmòq le ngò su dùt bùm kó sháng gàq,
Nàng taî tô é buìnyì haû jé lô nhâng àq ô.
22 Yhángmòq é agè ashop hkyô bànshoq lé,
Náng é hí má jé nhâng àq ô;
ngá é yubàk mara bànshoq é yánmai,
Nàng, ngo lé kut é su, yhángmòq lé le kut àq.
Ngò gi, gyai yhang myìt nò-kying kyîng nyi é nghut mù,
ngá é i-myìt chut mòq byùq bê nghut ri.” ga, yhang taî ri.