EZEKELA LAIKÁ
Laiká
(Ezekiel)
Ezekela Sânghi Myang É Shing-rán
1
Sum xê zan zàn, lha-mó myi hkyap ngo nyí nyí má, ngò, Ezekela gi, Hkebara Wuìlàng yàm má shúm zûng bang eq rahá nyi nyi é u, mauhkûng hpông lò luî, Garai Gasâng é shing-rán pé lé myang ri.2 Gè gè yhang, Hkóhkâm Yehoi-ahkin shúm zung é ngó zan zàn, lha-mó myi hkyap ngo nyí nyí má, 3 Babelon byu pê é mau mâ é Hkebara Wuìlàng yàm má, Buzi é yhang zo, hkyangjong Ezekela chyáng haû Yhûmsîng Garaî é mungdang jé é nghut mù, haú má, haû Yhûmsîng Garaî é lòq gi, yhâng é ahtoq má jòq tô ri.
4 Ngò, Ezekela gi, wú kat le, mautsûng hkyam mai laìdun mó htoq lo é lé myang ri; laìdun mó haû gi, lhap hpyat nyi é mhuthtui mó eq rahá hau é lhînghkyùq má gyai yhang dùq bang tô é nghut ri. Hau é agùng mai myishâm gi, wìk wìk dùt é jòqtoq su dùq bang nyi ri. 5 Hau é ahkaû mai, kângsoq bo é dui jung myî du su dùt é le, htoq ze lo ri; haú pê é gùnghkyâng gi, waxâng zô wui é gùnghkyâng su dùt ri. 6 Nghut kôlhang, du hkangmó gi, myòqdong myî lhum eq dùng myi dûng dûng dap tô ri. 7 Yhángmòq é hkyî gi, nyang é nghut mù, yhángmòq é hkyîwa gi, no zô é hkôdòq su dùt luî, dùq wìk é gyi su dùq wìk tô ri. 8 Yhángmòq é dùng ô myî hkyam má lòq dàp tô bum ri. Haû myî dû é má gi, myòqdong eq dùng tsing dàp bum ri; 9 radu eq radu dùng pé záng lhûm to mù, sô ló kô é hkûn a lhing tau kó nghut mù, du hkangmó gi, hí shut nyâng za sô e ló akô nghut ri.
10 Yhángmòq é myòqdong pé gi, shí dông nghut bum ri; du hkangmó gi, waxâng zô é myòqdong dàp mù, du hkangmó é lòqyo hkyam má hkanghkyi myòqdong dap, lòqpaî hkyam má nohtô é myòqdong dàp dùt mù, du hkangmó é nùnghtáng má zun é myòqdong dàp tô bum ri. 11 Haû gi, yhángmòq é myòqdong pé nghut ri. Du hkangmó gi, dùng í dûng lé ahtoq shut pyo to mù, radu eq radû é dùng haû záng lhûm tô akô; du hkangmó gi, gùngdu má nghop tô é gótû dùng í dûng dûng le dàp ashi kô nghut ri. 12 Du hkangmó gi, ó le ô é hí shut nyâng za sô e ló akô. Du hkangmó gi, sô myìt ê nau é shut chyat e ló ri; yhángmòq gi, a lhing taû é za e ló bum akô nghut ri. 13 Kângsoq bo é dui jung haú pê é ihpyô isâm gi, gyúng tô é myigye eq dùq tô é myidûm su dùt bum ri. Myi haû gi, kângsoq bo é dui jung haú bâng chyáng ê ê lò lò dùt nyì mù, dùq bang é htoq agó, haú mai lhap hpyat htoq nyi ri. 14 Dui jung haú pé gi, maulhap hpyat é su ê ê lò lò kut nyi bum akô.
15 Ngò gi, kângsoq bo é dui jung haú pé lé wú kat é hkûn, myòqdong myî lhum lhum dàp é dui jung haû du hkangmó é ayàm má lhêngchap rachap chap myìdàm htoq má jòq tô é lé myang ri. 16 Lhêngchap pê é isâm eq azòng gi, bó huî hui é jung lungsêng nghut é utohpaya su dùq wìk ri; haû myî châm é rajung za dùt ri. Lhêngchap hkangmó gi, lhêngchap hkaû má lhêngchap kat tô é su dùt ri. 17 Lhêngchap haú pé ling ló é hkûn, dui jung haû myî du hu tô é shut tsing ling ló mù, a lhing tau kó nghut ri. 18 Lhênghkóng haú pé gi, gyai myhâng gyai wú gyùq nhô zâ é nghut é htoq agó, lhênghkóng haû myî lhûm é lhînghkyùq má myòqjí baú byíng zan tô bum ri.
19 Kângsoq bo é dui jung haú pé sô ló jáng, ayàm mâ é lhêngchap pé le bo sô ló ri; kângsoq bo é dui jung haú pé myigùng mai toq ló jáng, lhêngchap haú pé le bo toq ló ri. 20 Yhángmòq gi, sô myìt ê nau é shut chyat e ló akô; haú hkûn, lhêngchap pé le yhángmòq eq rahá bo châng toq akô nghut ri; hkâsu mù gâ le, kângsoq bo é dui jung haú pê é sô gi, lhêngchap pé má nghut nyi ri. 21 Dui jung haú pé e ló jáng, lhêngchap pé le bo e ló ri; dui jung haú pé yàp to jáng, lhêngchap pé le bo yàp tô ri; dui jung haú pé myigùng mai toq ló jáng, lhêngchap pé le rahá bo toq ló bum ri; hkâsu mù gâ le, kângsoq bo é dui jung haú pê é sô gi, lhêngchap pé má nghut nyi ri.
22 Kângsoq bo é dui jung haú pê é u htoq má gi, wú gyùq nhô zâ é eq myòqjàm su dùt é maulat kyodum su dùt é jòq tô ri. 23 Haû maulat kyodum a-ô má, yhángmòq é dùng pé lé radu eq radû shut pyo tô akô; du hkangmó gi, yhûmsing é gùng nghop râ dùng í dûng dûng le dàp akô nghut ri. 24 Yhángmòq sô ló kô é hkûn, yhángmòq é dùng htê gi, wuì myo myo mying hûm é htê su ga le, haû Wum-o a-tsam dìk shoq bò Su é htê su ga le, gyè hpúng mó é htê su ga le, mying é lé ngò wó gyô ri. Yhángmòq yàp to jáng gi, yhángmòq é dùng lé hkyô tô bum akô nghut ri.
25 Haú hkûn, yhángmòq dùng hkyó mù yàp tô é u, yhángmòq é u htoq mâ é maulat kyodum htoq mai htê htoq lo ri. 26 Yhángmòq é u htoq mâ é maulat kyodum htoq má mauhkûng nyuì lungsêng tángmyhâng su dùt é azòng jòq to mù, tángmyhâng hau é ahtoq má byù rayùq su dùt é alhô azòng jòq tô ri. 27 Byù haú yùq é hpyidum htoq má, wìk wìk dùt é jòqtoq su dùt é myi byíng zan tô é eq hau é a-o túm má myi su dùq tô é lé, ngò myang ri; yhâng é lhînghkyùq má gyai yhang dùq bang tô ri. 28 Maú wo é nyí mâ é mhut hkaû má wòqgan síng-yang htoq é su, yhâng é lhînghkyùq má dùq bang tô ri.
Haû gi, haû Yhûmsîng Garaî é hpungwup shingkang htoq shit é isâm azòng nghut ri. Ngò gi, shing-rán haú lé myang é hkûn, myòqdong ngóm gòp é nghut lhê; haú hkûn, ngò gi, byù rayùq dáng nyo é htê lé wó gyô ri.