5
Yhûmsîng Garai ê, ngá-mòq chyáng dùt htoq é hkyô lé bun byi aq;ngá-mòq hoq hpu huî é hkyô lé wú mù, myàng byi aq.
2 Ngá-mòq é silî wunlî maumyî gi, byù bíng pê é lòq má wàng byùq mù,
ngá-mòq é yhûm pé gi, maigan byu pê é lòq má àp pyâm é hui bê nghut ri.
3 Ngá-mòq gi, îwa a wó é chuízô pé dùt byùq mù,
ngá-mòq é înu pé gi, chuimó myhî pé dùt byùq bekô nghut ri.
4 Ngá-mòq shuq é wuì gi, ngùn htoq râ dùt byùq mù,
ngá-mòq nyhê é htang gi, ahpau byi râ dùt byùq bê nghut ri.
5 Ngá-mòq lé châng hkat é bang gi, ngá-mòq é lìngzing má kyaq zui bekô;
ngá-mòq gi, ngú luî, bánno hkyô a wó nghut ri.
6 Ngá-mòq gi, zoshuq wó râ matú,
Egutuq byu pé eq Asuri byu pê é a-ô má nyì byùq bê nghut lhê.
7 Ngá-mòq é îchyí îwâ pé gi, mara kut shut luî, htûm byùq bekô nghut ri;
ngá-mòq gi, yhángmòq é yubàk mara dam hui zô nyì bê nghut ri.
8 Jun pé gi, ngá-mòq lé ùp zô nyì bekô nghut mù,
yhángmòq é lòq mai ngá-mòq lé hkyi xe yù râ byù a nyì nghut ri.
9 Ngá-mòq gi, yòso má shâm jòq bum é yánmai,
chyungxe gyó râ nghut é mai za zoshuq myang ho yu é ru nghut lhê.
10 Zò-mut luî, nyé no é yánmai, ngá-mòq é sho-kuq gi,
myi bunghkyûng su nyé nyî bê nghut ri.
11 Myiwe wuì gi, Zi-un wà mó má rhoi pyâm é hui zo mù,
zo-myi gyíng pé gi, Yudaq wà pé má rhoi pyâm é hui zo bekô nghut ri.
12 Zau zô pé gi, yhûmsing é lòq mai tuî lhâng pyâm é hui mù,
sûwún wuî gi, hkúnggâ é a hui lo kó nghut ri.
13 Zorâm wuì gi, lùqluí lâng hpu zo kômù,
zoshâng wuì gi, htang wo èq nhê pyet é hui zô akô nghut ri.
14 Sûwún wuî gi, wà hkum má a zùng lo kó nghut ri;
zorâm wuì gi, bàt myhîng jung lé a bàt lo kó nghut ri.
15 Gabú byam chyu hkyô mai ngá-mòq é i-myìt byùq byùq bê nghut ri;
ngá-mòq mahkôn gó é hkyô gi, iyon hkyô taû dùt byùq bê nghut ri.
16 Mùqsháng gi, ngá-mòq é ulhum mai gyó byùq bê nghut ri.
Ngá-mòq gi, mara kut shut bê nghut é yánmai, dingnyé wó ri ô!
17 Hau é yánmai, ngá-mòq é i-myìt nhiklhum gi, chut mòq byùq mù,
ngá-mòq é myòqjí gi, myhám myhám dùt byùq bê nghut ri;
18 Zi-un Bùm gi, chamchyuîyuì dùt to bê nghut mù,
dànghkuî pé haú má dô wún bum ri.
19 Yhûmsîng Garai ê, Nàng gi, ahtum abyùq ùp nyi ri;
Náng é hkóhkâm tángmyhâng gi, pyàt pyàt zaí zaí jòq gîng nyi ri.
20 Nàng gi, haî mù, ngá-mòq lé ayang tô-myhî pyâm lhê lhú?
Nàng gi, haî mù, ngá-mòq lé shî myháng jé shoq tô pyâm tô lhê lhú?
21-22 Yhûmsîng Garai ê, Nàng gi, ngá-mòq lé séng yhang he-ngìk pyâm é eq,
ladu lai shoq nhikjum yô é za a nghut jáng,
Náng chyáng ngá-mòq wó taû lò sháng gàq, ngá-mòq lé Náng shut lhing taû lò nhâng àq;
ngá-mòq é buìnyì pé lé, góhkun é su dum taû dùt nhâng laq ô!