4
Hîng gi, hkâsu mù wìk wìk a dùt lô é lhâ!Hîng gyíng gi, hkâsu mù isâm htaî byùq bê lhâ!
Chyoiyúng yhûm mâ é lùqgòk pé gi,
hkyô chyûn hkangmó má gyó lèq bum ri.
2 Hîng gyíng eq wuí é,
hpau dap é Zi-un zodù wuì gi,
hkâsu mù, ahkuî, tso-au saí su é lòqmú nghut é,
tso-au pé dông sôn yu é hui bekô lhâ!
3 Dànghkuî pé lháng, yhángmòq é dànghkui nú zô pé lé,
naú huq akô nghut ri;
nghut kôlhang, Ngá é byu pé gi,
yòso mâ é gola-uk nghoq pé su ashop kó nghut ri.
4 Naú shuq nau é nyheqnú gi, shô kyuq huî byùq mù,
ahtoq âm má dàp byùq bê nghut ri;
zoshâng zô pé mùk dung kôlhang,
yhángmòq lé ó a byi kó nghut ri.
5 Ngham ngham myàng zô wú é bang gi,
ahkuî wà hkyô pé má asho awui nyì râ byùq bekô nghut ri;
Nè ne é mèhpú má yhup wú é bang gi,
ahkuî nohkyi bùm má lèq to bekô nghut ri.
6 Ngá é byu pé hui zô é yubàk mara dam gi,
lòq èq le a záng é za,
razùp má htên byòq byùq bê é,
Sodom wà hui zô é htoq je kô ri.
7 Yhâng é zau zô pé gi, gyô htoq dùq wìk mù,
no-naú htoq hpyu zan tô ri;
yhángmòq é gùngsho gi, ne jung lungsêng htoq nè mù,
yhángmòq é ihpyô isâm gi, mauhkûng nyuì lungsêng su dùt ri.
8 Nghut kôlhang, ahkuî, yhángmòq é isâm gi, myigyê htoq je nòq bekô;
wà hkyô pé má lháng yhángmòq lé a wú sê byùq lo nghut ri.
Yhángmòq é sho-kuq gi, yhángmòq é showui pé má dàp byùq mù,
siktúm su kyuq byùq bê nghut ri.
9 Sham èq sat huî é bang gi,
zò-mut shi byùq bâng htoq je ge ri;
yhángmòq gi, yò pé mai htoq é zoshuq langhpyùt byùq bê nghut é yánmai,
zò-mut luî, gyí kyuq shi ló byùq bekô nghut ri.
10 Shogyo myìt bo é myiwe wuì gi,
yhûmsing lòq èq zodù wuì lé chyoq bekô nghut ri;
ngá é byu pé htên byòq huî bum é hkûn,
yhûmsing é zodù wuì lé lháng zô akô nghut ri.
11 Haû Yhûmsîng Garai gi, Yhâng é nhikmó-yô é lé ban lhoqhtoq pyám mù,
Yhang nhikjum mó yô é lé hut hkyô pyám bê nghut ri.
Yhang gi, Zi-un wà mó lé myi tuq kat é nghut mù,
hau é a-pûn awang pé lháng nyé gyó byùq bê nghut ri.
12 Gye pé eq gumlau toq é bang gi,
Yerusalem wà hkum pé mai wó wâng kôrâ nghut é hkyô lé,
myìdàm htoq mâ é hkóhkam pé le a jíng;
mingkan htoq mâ é byù ó le a jíng kó nghut ri.
13 Nghut kôlhang, haú hkyô gi,
wà hkaû má díngmán bâng é sui lhoqshun é,
haú mâ é hkyangjông pé kut shut é mara pê é yánmai le,
myìqhtoî pê é yubàk marâ é yánmai le, dùt htoq é nghut ri.
14 Ahkuî, yhángmòq gi, myòqjìt bang su,
wà hkyô pé má sop sô wún bekô nghut ri.
Yhángmòq gi, sui lhu lhu dàp byùq bekô nghut mù,
ó yùq le, yhángmòq é mèbu pé lé a wám záng lo kó nghut ri.
15 Byu pé gi, “A sansêng é bang núngmòq, huî ló byùq keq!
Hui keq! Hui keq! Ngá-mòq lé hkâzáng kó!” ga,
yhángmòq lé garû taî akô nghut ri.
Yhángmòq gi, hpâng luî, yông lhing wún kô é hkûn,
byù myû wuì mâ é bang gi,
“Yhángmòq, shí má ge nyì râ a nghut lo.” ga taî akô nghut ri.
16 Haû Yhûmsîng Garai yhang, yhángmòq lé lhoqpyo pyâm é nghut ri;
Yhang gi, yhángmòq lé dum wú magûm râ a nghut lo.
Hkyangjông pé gi, hkúnggâ é a hui lo kô é htoq agó,
sûwún wuî lé le, myòqdong byî é a hui lo kó nghut ri.
17 Hau htoq agó, ngá-mòq é myòqjí a myang byùq loshoq,
garúm yû râ hkyô lé akôm má myòqbyu pyám bê nghut lhê;
ngá-mòq gi, ngá-mòq é mâchya pé mai,
ngá-mòq lé a wó hkyi yu é byù myû lé wú gôm pyám bê nghut lhê.
18 Ngá-mòq gi, ngá-mòq é hkyô pé má a wó so loshoq,
byu pé gi, ngá-mòq é hkyîbyè hkangmó lé châng hkat akô nghut ri.
Ngá-mòq htûm byùq râ ahkyíng jé bê nghut é yánmai,
ngá-mòq htum râ ahkyíng jé bê nghut mù, ngá-mòq é buìnyì byíng bê nghut ri.
19 Ngá-mòq lé châng hkat é bang gi,
maulat mâ é zùn pé htoq yang akô;
yhángmòq gi, bùm pé lai shoq shoq ngá-mòq lé châng hkat kômù,
yòso má ngá-mòq lé gyám láng tô akô nghut ri.
20 Ngá-mòq é chyungxe soq nghut é, haû Yhûmsîng Garaî é namngón xû but é hui sû gi,
yhángmòq é donghkong má chyup yu pyâm é hui bê nghut ri.
Ngá-mòq gi, yhâng é buìshûm hkaû mai,
byù myû wui chyáng ngá-mòq wó nyi to râ nghû myìt pyâm é nghut lhê.
21 Uza mau má nyi é Edom byìzo ê,
gabú byam chyu mù, myìt nguì ngón nyî àq.
Nghut kôlhang, ihkyùp gòm haû gi, náng chyáng le lai râ nghut mù,
nàng gi, haú lé shuq wùt luî, gùngchîn dùt byùq râ nghut lhê.
22 Zi-un Byìzo ê, nàng hui zô é mara dam gi, htûm byùq râ nghut lhê;
htâng má, Yhang gi, nang lé shúm zûng nhâng râ a nghut lo.
Nghut kôlhang, Edom byìzo ê, Yhang gi, náng é yubàk mara lé dam byi râ nghut mù,
náng é agè ashop hkyô lé lhoqhtoq shit râ nghut lhê.