Mara Dam Byi Hkyô, Myìt Lhîng Wó Hkyô Eq Myòqbyù Hkyô
3
Ngò gi, haû Yhûmsîng Garaî é nhikmó-yo hkyô nghut é dumbáng èq,no hpû é hui zo sû nghut nyi lhê.
2 Yhang gi, ngo lé hkat htoq mù,
maubó má a nghut é za, mauchut hkaû má só nhang ri;
3 Gè gè yhang, Yhâng é lòq èq,
ra-nyí buî, ngo lé dàm mó dum byi byi kut nyi ri.
4 Yhang gi, ngá é sho eq sho-kuq lé wôm ló nhâng mù,
ngá é showui showang pé lé gyuî gyòp nhang ri.
5 Yhang gi, ngá é hí má gadùk du mù,
no hpu zô é hkyô eq wuîhkê hkyô èq ngo lé lhom hkyuq tó nhang ri.
6 Yhang gi, góhkûn shi byùq bê bang lé su,
ngo lé mauchut hkaû má nyì nhang to bê nghut ri.
7 Yhang gi, ngò a wó hpâng shoq kyâm lhûng to mù,
ngo lé chyìk chyìk laî é jòqtoq tuî èq tuî tô ri.
8 Ngò wùt ngaù mù, garúm wùt dung kôlhang,
Yhang gi, ngá é kyûdung dang lé hkûm pyám byî ri.
9 Yhang gi, ngò e ló é hkyô má, hkoq tô é lùqgòk pê èq xaû pyám byi mù,
ngá hkyô lé agoí agùq kut pyám byi bê nghut ri.
10 Yhang gi, haq láng up tô é wàm su le,
haq gyám nyi é hkanghkyi su le,
11 hkyô mai ngo lé lâng she yù mù, ngo lé lâng myhâ luî,
ngo lé baú asho awui kut tô pyâm tô ri.
12 Yhang gi, yhâng é lai lâng htûng mù,
ngo lé, Yhâng é myoshi pé wing díng é jowò kut pyâm ri.
13 Yhang gi, yhâng é myoshi htuq mâ é myoshi pê èq,
ngá é nhiklhum lé bìk ròt byi bê nghut ri.
14 Ngò gi, ngá é byù bànshoq bâng èq wuìhô hkyô é byù dùt byùq mù,
yhángmòq gi, ra-nyí buî mahkôn dông ngo lé rhoi bum akô nghut ri.
15 Yhang gi, ngo lé hko pân pan é ahaq pé lhoqpyíng byi mù,
ngo lé singkyî shuq wùt nhang ri.
16 Yhang gi, ngo lé lùqjàp nyó é se-muî byi mù, ngá é zuì lhoqhkyop pyám byi bê nghut ri;
Yhang gi, ngo lé hpuílhup yô má nâng myhup pyám bê nghut ri.
17 Ngò gi, nguì ngón hkyô eq wê gâng é hui zo bê nghut lhê;
ngò gi, nyì ngón yùqyò hkyô lé tô-myhî pyám bê nghut lhê.
18 Haû mù, ngò gi, “Ngá é hkìkhkâm hkyô le,
haû Yhûmsîng Garai lé ngò myòqbyu é hkyô bànshoq le, byùq byùq bê nghut rô!” nghû taî é nghut lhê.
19 Ngò gi, ngò no hpu zô é hkyô eq yông wún é hkyô lé le,
kyî kyî hkô é eq singkyî lé le, myìtbûn ri.
20 Ngò gi, haú pé lé rago myìtbûn é nghut mù,
ngá é i-myìt nhiklhum gyuî gyòp byùq bê nghut ri.
21 Nghut kôlhang, ngò gi, shí hkyô lé myìtbûn kat é nghut mù,
myòqbyù jang wó bê nghut lhê.
22 Haû Yhûmsîng Garaî é kô hkìk é chyitdàp myìt é yánmai, ngá-mòq htûm byùq râ a nghut;
Yhâng é shogyo nhikmyin myìt gi, hkâ-nhám le htûm byùq é a nghut.
23 Haú pé gi, nàp wuì asik nghut nyi ri;
Náng é jujúm hkyô gi, ko hkìk nyi ri.
24 Ngò gi, ngá gûng ngò, “Haû Yhûmsîng Garai gi, ngá é gàmbùm nghut mù,
ngò gi, Yhâng chyáng myòqbyu nyì râ nghut lhê.” nghû taî é nghut lhê.
25 Haû Yhûmsîng Garai gi, Yhang lé myòqbyu é bang eq,
Yhang lé ho é sû lé, jeju tûn shit é nghut ri.
26 Haû Yhûmsîng Garaî é hkyi yù hkyô lé,
i-myìt zim za kut mù láng nyi é gi, ge ri.
27 Zorâm hkûn má kyaú wun é gi,
byù rayùq é matú ge ri.
28 Haû Yhûmsîng Garai gi, yhâng é ahtoq má haú lé kê to byi bê nghut é yánmai,
yhang baú zim za kut luî zung to sháng gàq.
29 Myòqbyù jang jòq âbe,
yhâng é myòqdong lé hpuílhup yô má myhup pyám sháng gàq.
30 Yhang lé bàt é sû lé, yhâng é bowâm hkâm byi sháng gàq;
yhang gi, hoq mó hpû é hui zô nyì sháng gàq.
31 Hkâsu mù gâ le, haû Yhûmsîng Garai gi,
byù rayùq lé ahtum abyùq tô pyâm é a nghut.
32 Yhang gi, yón kuq é hui nhâng kôlhang, Yhâng é ru gîng nyi é chyitdàp myìt gi,
kô hkìk nyi é nghut mù, Yhâng é shogyo myìt tûn shit râ nghut lhê.
33 Hkâsu mù gâ le, Yhang gi, kám luî,
byù rayùq lé no hpu nhâng mù, yón kuq nhang é a nghut.
34 Mîngdán má shúm zung é bang bànshoq lé,
hkyi èq nâng pyeq pyám râ lé le,
35 Myhang htáng Su é hí má,
byu pê é ahko ahkáng lé he-ngìk pyám byi râ lé le,
36 byu pê é târâ ràp-rá hkyô lé lhoqhtên pyám râ lé le,
haû Yhûmsîng Garai a byu myàng nhô ngam akô lhú?
37 Haû Yhûmsîng Garai hkunmó a hkyô tô é nghut jáng,
ó yùq wá dang dông wó dùt htoq nhâng râ lhú?
38 Wuîhke jamjau hpu zo hkyô pé eq ge é hkyô pé gi,
haû Myhang htáng Su é nhut mai htoq lo é nghut lhê, a nghut lhí?
39 Kângsoq dui nyi é sû gi, yhûmsing é yubàk marâ é matú,
mara dam byi huî é hkûn, haî mù taî pùt nyi lhê lhú?
40 Ngá-nhúng gi, yhûmsing é hkyô lé chyam lìk wú, gôn wú kut mù,
haû Yhûmsîng Garaî chyáng lhing taû ló lo sháng.
41 Ngá-nhúng gi, mauhkûng mâ é Garai Gasâng shut,
ngá-nhûng é i-myìt nhiklhum eq lòq pé lé tú toq mù,
42 “Ngá-mòq gi, mara kut shut mù, gumlau toq bê nghut lhê;
Nàng gi, mara a hkyut byi nghut ri.
43 Nàng gi, nhikjum yo hkyô lé yùp chûng mù, ngá-mòq lé châng hkat bê nghut ri;
Nàng gi, shogyo myìt a bo é za sat pyám bê nghut ri.
44 Nàng gi, kyûdung htê a hkyang ròt lo sháng gàq ga,
Náng gûng lé mhut htup nhang to bê nghut ri.
45 Nàng gi, byù myû wui chyáng,
ngá-mòq lé a-pyâng bùm kut pyám luî, he-ngìk pyám bê nghut ri.
46 Ngá-mòq é gyè bànshoq gi, ngá-mòq lé,
yhángmòq é nhuthkum galhám lhám hâ akô nghut ri.
47 Ngá-mòq gi, gyùq chiq é, dong má byìt gyó wang é,
byòq yèq é eq htên byòq é hkyô hpu zo bê nghut ri.” nghû taí keq.
48 Ngá é byu pé htên byùq é hui zo kô é yánmai,
ngá é myòqjí mai wuìlàng su ngaùbyi yui htoq lo ri.
49-50 Ngá é ngaùbyi gi, mauhkûng mai,
Yhûmsîng Garai wú hkyô kat mù,
myàng byî é hkûn jé shoq,
a nô byùq é za ru jâng yui htoq nyì râ nghut lhê.
51 Ngá é wà mâ é myiwe wuì hpu zô kô é yánmai,
ngá é myòq èq myang é pé gi, ngá é i-myìt lé nò nhang ri.
52 Jumgú má ngo lé gyè kut é bang gi,
nghoq lé gyám é su, ngo lé châng gyám akô nghut ri.
53 Yhángmòq gi, ngá é chyungxe lé dong má lhoqhtûm pyám râ hên kômù,
ngo lé lùqgòk èq chôm dú kê to bekô nghut ri;
54 ngá é ulhum má wuì ûm nghop pyám bê nghut mù,
ngò gi, htûm byùq berâ nghû myìt pyâm é nghut lhê.
55 Yhûmsîng Garai ê, ngò gi,
nìk é dong mai Náng é myìng lé lâng é nghut lhê.
56 “Ngò yùqyo byùq râ matú wùt dûng é dang lé a gyo byi hkâkut.” nghû,
ngò dûng tôngbán é lé, Nàng wó gyo bê nghut lhê.
57 Ngò, Nang lé wùt jáng, Nàng gi, ngá shut chyâng lé mù,
“Hkâgyùq.” ga taî ri.
58 Yhûmsîng ê, Nàng gi, ngá é mú lé bo hûng byi mù,
ngá é chyungxe lé hkyi xe yù bê nghut ri.
59 Yhûmsîng Garai ê, Nàng gi, ngò zing-ri huî é lé myàng byi bê nghut mù,
ngá é mú lé bo taî hpyit byi laq!
60 Nàng gi, yhángmòq ngo lé lató hpuq é hkyô eq
yhángmòq ngo lé htuqhtíng râ hen é hkyô bànshoq lé, myàng bê nghut ri.
61 Yhûmsîng Garai ê, Nàng gi, yhángmòq rhoî dang taí mù,
yhángmòq ngo lé htuqhtíng râ hen é hkyô bànshoq nghut é,
62 ra-nyí buî ngá é gye pé mai ngo lé htuqhtíng dang taí luî,
pùt dang haq taî é hkyô lé, wó gyo bê nghut ri.
63 Yhángmòq zung tô é eq toq lo é lé wú aq!
Yhángmòq gi, jidang pé dông ngo lé rhoi akô nghut ri.
64 Yhûmsîng Garai ê, yhángmòq é lòq èq kut é eq rajung,
yhángmòq lé lató hpuq byi laq.
65 Yhángmòq é i-myìt lé lhoqhtan pyám byi mù,
Náng é nhinghkun lé yhángmòq chyáng zùq nhâng laq!
66 Nàng nhikjum yô é mai yhángmòq lé châng hkat luî,
haû Yhûmsîng Garaî é mauhkûng ô mai yhángmòq lé lhoqhtûm pyám aq.