Yerusalem Wà Mó Lé Mara Dam Byî É Hkyô
2
Haû Yhûmsîng gi, yhâng é nhikmó-yo hkyô nghut é mhut èq,hkâsu mù Zi-un Byìzo lé nghop pyâm lhê lhâ!
Yhang gi, Isira-elaq é hkìkhkâm hkyô lé,
mauhkûng mai myìdàm htoq jé shoq wum kat dú hkyô kat bê nghut ri;
Yhang gi, Yhang nhikjum yô é buìnyì má,
Yhâng é hkyî nang tánghkuqa lé a myìtbun nghut ri.
2 Haû Yhûmsîng gi, Yakup é nyì jowò bànshoq lé,
shogyo myìt a bo é za myui pyám bê nghut ri;
Yhang gi, nhikmó-yô é mai,
Yudaq byìzô é gingtíng jowò pé lé lhoqhkyop pyám bê nghut ri.
Yhang gi, yhâng é mîngdán eq haú mâ é zau wuî lé,
myigùng má lhoqhkyô pyám mù, hoq hpu nhâng bê nghut ri.
3 Yhang gi, nhikjum mó yô é mai,
wum-o nghut é Isira-elaq é hkyuî bànshoq lé hpyit pyám bê nghut ri.
Yhang gi, gye pê hí mai Yhâng é lòqyo lòq lé,
she taû yù bê nghut ri.
Yhang gi, jowò hkangmó lé nyé gyó é myishâm su,
Yakup lé nyhê hkyô pyám bê nghut ri.
4 Yhang gi, gyè hpó su, Yhâng é lai lé lâng htûng mù,
Yhâng é lòqyo lòq lé rì rì kut to bê nghut ri.
Yhang gi, gyè kut sû su,
wú yúng é bang bànshoq lé sat pyám bê nghut ri;
Yhang gi, Yhâng é nhikmó-yo hkyô lé, myi lé su,
Zi-un Byìzô é zúm má hut hkyô kat bê nghut ri.
5 Haû Yhûmsîng gi, gyè hpó su,
Isira-elaq lé myui pyám bê nghut ri;
Yhang gi, yhâng é hkóhkâm wâng pé bànshoq lé myui pyám mù,
yhâng é gingtíng jowò pé lé lhoqhtên pyám bê nghut ri.
Yhang gi, Yudaq byìzô é matú,
iyon yon hkyô eq ngaùhkyang sâng hkyô myo myo lhoqhtoq byi bê nghut ri.
6 Yhang gi, hkyâm lé su Yhâng é nyì jowò lé tô sâ pyám mù,
Yhâng é zùphpong jowò lé lhoqhtên pyám bê nghut ri.
Haû Yhûmsîng Garai gi, Zi-un wà mó lé,
wà haú má kut é masàt tô é poî eq Bánno Buìnyì pé lé tô-myhî pyám nhâng bê nghut ri;
Yhang gi, nhikjum mó yô é mai,
hkóhkâm hpó eq hkyangjong hpó lé haî su a ngàm kut pyám bê nghut ri.
7 Haû Yhûmsîng gi, Yhâng é hkungga gyàp lé he-ngìk pyám luî,
Yhâng é sân-yúng jowò lé tô pyâm to bê nghut ri.
Yhang gi, wà hau é hkóhkâm wâng xêwâm pé lé,
gye pê é lòq má àp pyám bê nghut ri;
yhángmòq gi, masàt tô é poî buìnyì má su,
haû Yhûmsîng Garaî é yhûm má garû bum akô nghut ri.
8 Haû Yhûmsîng Garai gi, Zi-un Byìzo lhînghkyùq mâ é wàhkûm lé,
lhoqhpyoq pyám râ matú myìt hpyit to bê nghut ri.
Yhang gi, kê é tui lâng gyan luî,
lhoqhten lhoqhpyoq é hkyô mai Yhâng é lòq she taû yù râ a nghut.
Yhang gi, gadùk pé eq wàhkûm pé lé ngaùhkyang sâng nhang é nghut mù,
haú pé le rahá byòq yèq byùq bê nghut ri.
9 Haú mâ é hkum pé gi, myigùng má myùp wang ló bê nghut mù,
hkumkyáng pé lé gi, Yhâng èq lhoqhkyui lhoqhtên pyám bê nghut ri.
Haú mâ é hkóhkâm eq zau zô pé gi,
byù myû wui chyáng shúm zung é huî byùq bekô;
târâ a jòq byùq lo nghut ri.
Haú mâ é myìqhtoî pé gi, haû Yhûmsîng Garaî chyáng mai,
shing-rán a myang yù lo kó nghut ri.
10 Zi-un Byìzô é sûwún wuî gi,
zim za kut mù, myigùng má zung bum akô;
yhángmòq gi, yhûmsing é ulhum má hpuílhup kyaq gyun mù,
jimê tû wùt bum akô nghut ri.
Yerusalem wà mó mâ é myiwe zô pé gi,
myigùng má ulhum ngóm gòp bùm bekô nghut ri.
11 Ngá é myòqjí gi, ngau é yánmai myhám myhám dùt byùq bê;
ngò gi, myìt myo ûng wôm nyi ri;
ngá é i-myìt nhiklhum gi,
ngá é byu pé lhoqhten lhoqhpyoq huî é yánmai le,
wà hkyô pé má zoshâng wuì eq nyheqnú pé mòq byùq to kô é yánmai le,
iyon yôn ngau nyì bê nghut ri.
12 Yhángmòq gi, dàm dap zu záng bang su,
wà hkyô pé má mòq byùq ló luî,
înû é tanghkoí má kângsoq byìt ló nyî kô é u,
“Mùk eq tsibyiq wing gi, hká má jòq ri lhú?” ga,
yhángmòq é yhâng nû pé lé taî akô nghut ri.
13 Yerusalem Byìzo ê,
ngò gi, náng é matú haî wó taî hûng byi râ lhú?
Ngò gi, nang lé hai eq wó ké râ lhú?
Zi-un Byìzo Gyíng ê,
ngò gi, nang lé nhik wó tíng byi râ matú,
nang lé hai eq wó taî whuí râ lhú?
Náng é dàm gi, wuìshuq lung-aû su nìk é nghut mù,
nang lé ó yùq wó yâ gè byi râ lhú?
14 Náng é myìqhtoî pé myang é shing-rán pé gi,
mhaû é eq a-kyû a bo é chyat nghut ri;
yhángmòq gi, nàng, shúm zung é mai wó lùt htoq lô râ matú,
náng é yubàk mara lé a lhoqhtoq shit kó nghut ri.
Yhángmòq, nang lé myìqhtoi htoi byî é dang pé gi,
mhaû é eq hkyô shuî nghoq é chyat nghut ri.
15 Náng chyáng mai laî ló é bang bànshoq gi,
nang lé rhoi é dông lòqpyuq bàt kômù,
“Wà shî gi, yúng htâng é eq myìdàm htoq gón má gabú byam chyu hkyô ga taî é,
wà mó nghut lhê, a nghut lhí?” ga,
Yerusalem Byìzo lé rhoî dang taí kômù,
ulhîng he pyám byî akô nghut ri.
16 Náng é gyè bànshoq gi,
yhángmòq é nhut galhám lhám há mù, nang lé htuqhtíng dang taî akô;
yhángmòq gi, “Ngá-nhúng, yhang lé wó myui pyám bê;
haû gi, ngá-nhúng láng nyi é buìnyì nghut ri;
ngá-nhúng gi, haú hkyô lé wó myâng shoq chyungxe duì bê nghut ri.” ga,
zuì ngàt kyáng shoq rhoî dang taî bum akô nghut ri.
17 Haû Yhûmsîng Garai gi, Yhang htung tô é hkyô lé hkyak kut bê nghut ri;
Yhang gi, góhkûn mai Yhang hkunmó hkyô tô é dang lé,
lhoqdìk bê nghut ri.
Yhang gi, shogyo myìt a bo é za nang lé tu mhuq pyám mù,
náng é yánmai, gye pé lé gabú nhang ri;
Yhang gi, nang lé gyè kut bâng é wum-o nghut é hkyuî lé wàq toq byi bê nghut ri.
18 Byu pé gi, i-myìt nhiklhum mai,
haû Yhûmsîng lé wùt dûng ngau akô nghut ri.
Zi-un Byìzô é wàhkûm pé ê,
núngmòq é ngaùbyi lé,
nyí myín wuìlàng su yuì nhâng keq;
yhûmsing gùng yhûmsîng hkâ-nô yù kó;
núngmòq é myòqjí lé le hkâ-nô yù nhâng kó.
19 Toq àq; myín lé masàt tô é ahkyíng pé má,
wùt ngaù aq;
Haû Yhûmsing é myòq hí má,
wuì lé su, náng é myìt má lúng tô é lé hut htoq shit àq.
Zò-mut luî, hkyô chyûn hkangmó má mòq ló byùq é,
náng é zodù wui é chyungxê é matú,
Yhâng chyáng náng é lòq tû kyûdung aq.
20 Yhûmsîng Garai ê, wú mù, myàng byi aq;
Nàng gi, ó yùq lé wá haû su kut wú é lhú?
Myiwe wuì gi, yhûmsing é ûng mai gyó luî,
yhûmsîng yhang wú gôn nyi é zodù wuì lé ge hpyoq zo kôrâ lhú?
Hkyangjong hpó eq myìqhtoi hpó gi,
haû Yhûmsing é sân-yúng jowò má sat pyâm é, ge hui zo kôrâ lhú?
21 Mangzo eq zoshâng wuì gi,
hkyô pé mâ é hpuílhup yô má rahá lêng lèq to bekô nghut ri;
ngá é yùqzo byìzo zorâm wuì gi,
sham èq shi bùm bekô nghut ri.
Nàng gi, yhángmòq lé, Nàng nhikjum yô é buìnyì má sat pyám bê nghut ri;
Nàng gi, shogyo myìt a bo é za yhángmòq lé sat pyám bê nghut ri.
22 Nàng gi, poî buìnyì má byù ji tsîng é su,
ngá é lhînghkyùq má gyùq chiq hpo pé lé ji tsîng to bê nghut ri.
Haû Yhûmsîng Garai nhikjum yô é buìnyì má,
ó yùq le wó hpang lùt râ a nghut;
ó yùq le wó nyi myìt gyó to râ a nghut.
Ngò wú gon luî, kô lo é bang lé,
ngá é gye pê èq lhoqhtûm pyám byi bê nghut ri.