Myìqhtoi Dùt Râ Matú Ezekela Lé Wùt Yu É Hkyô
2
Yhang gi, ngo lé, “Byù zo ê, toq yàp àq; Ngò, nang lé dang nyô râ nghut lhê.” ga taî ri. 2 Yhang haû su ga taî é u, Sô gi, ngá chyáng wàng mù, ngo lé toq yàp nhang ri; haú hkûn, Yhang, ngo lé taî é dang lé ngò wó gyô ri.3 Yhang gi, ngo lé, “Byu zo ê, Ngò gi, nang lé, Ngo lé gumlau toq bang nghut é, gumlau toq a-myû Isira-elaq byu pê chyáng nhang kat lhê; yhángmòq eq yhángmòq é îchyí îwâ pé gi, hkû-nyí jé shoq Ngo lé gumlau toq nyi akô nghut ri. 4 Ngò gi, nang lé, ngegáng htu é eq myìt htan é byu pê chyáng nhang kat é nghut lhê. Yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri.’ nghû taî kyo aq. 5 Yhángmòq gi, gumlau toq é a-myû nghut é yánmai, gyo kôlhang, a gyo kôlhang, yhángmòq chyáng myìqhtoi rayùq nyi é hkyô lé wó sé kôrâ nghut lhê. 6 Byù zo ê, nàng gi, yhángmòq lé le, yhángmòq é dang pé lé le, hkâgyùq. Nàng gi, náng é lhînghkyùq má hpepat eq zu pé jòq tô é htoq agó, gogok pê chyáng nyi to kôlhang, hkâgyùq. Yhángmòq gi, gumlau toq é byu pé nghut kôlhang, yhángmòq taî é dâng é yánmai hkâgyùq, yhángmòq é yánmai hkâgyùq ngha byùq. 7 Yhángmòq gi, gumlau toq é bang nghut lhê mù, gyo kôlhang, a gyo kôlhang, nàng gi, yhángmòq lé Ngá é dang taî kyo ra râ nghut lhê. 8 Nghut kôlhang, byù zo ê, nang lé Ngò taî é dang gyo aq. Gumlau toq é byù haú bang su, nàng gumlau hkâtoq; náng é nhut há mù, Ngò byî é lé zo aq.” ga taî ri.