3
Hau htâng, Yhang gi, ngo lé, “Byù zo ê, náng é hí má jòq tô é lé zo aq; laiká ding shî lé zo mù, Isira-elaq byu pé lé dang ê nyô àq.” ga taî ri. 2 Haû mù, ngò gi, ngá é nhut há jáng, Yhang gi, laiká ding haû zo râ matú ngo lé byî ri.3 Hau htâng, Yhang gi, ngo lé, “Byù zo ê, Ngò, nang lé byî é laiká ding shî zo mù, náng é wam má haú lé lhoqpyíng aq.” ga taî ri. Haû mù, ngò gi, haú lé zo jáng, ngá é nhut má byo-î su yhang chuî nghâm ri.
4 Hau htâng, Yhang gi, ngo lé, “Byù zo ê, ahkuî, Isira-elaq byu pê chyáng ê mù, yhángmòq lé Ngá é dang pé ê hko kyo aq. 5 Ngò gi, nang lé, gó-mîng dáng nyo é eq sê gyo wuî é dáng nyo é bâng chyáng nhang kat é a nghut; Isira-elaq byu pê chyáng nhang kat é shèq ru nghut lhê. 6 Nàng a sê gyô é, gó-mîng dáng nyo é eq sê gyo wuî é dáng nyo é bâng chyáng nang lé nhang kat é a nghut. Gè gè yhang, Ngò, nang lé, yhángmòq chyáng nhang kat é ru nghut le gi, náng é dang lé yhángmòq gyo berâ nghut lhê. 7 Nghut kôlhang, Isira-elaq byu pé gi, Ngá é dang lé a kâm gyo kó nghut é yánmai, náng é dang lé le kâm gyo kôrâ a nghut; hkâsu mù gâ le, Isira-elaq byù bànshoq gi, myìt htan é eq ngegáng htu é byu pé chyat nghut akô. 8 Nghut kôlhang, Ngò gi, yhángmòq dùt nyi bum é su, nang lé ngegáng htû nhâng mù, myìt htân nhâng râ nghut lhê. 9 Ngò gi, náng é ngegáng lé, lùqgòk htoq le, paihpoi lùq htoq le htû nhâng râ nghut lhê; yhángmòq gi, gumlau toq é byu pé nghut kôle, yhángmòq lé hkâgyùq; yhángmòq é yánmai hkâgyùq ngha byùq nhâng.” ga taî ri.
10 Haû mù, Yhang gi, ngo lé, “Byù zo ê, Ngò, nang lé taî é dang bànshoq lé rago gyô yù mù, myìt má kat to aq. 11 Ahkuî, shúm zung é náng é byu pê chyáng ê mù, yhángmòq lé dang ê nyô àq. Yhángmòq gyo kôlhang, a gyo kôlhang, ‘Haû Ahko Ahkáng lhúnglháng wó Sû Yhûmsîng Garai shî su ga taî ri.’ nghû yhángmòq lé taí aq.” ga taî ri.
12 Haú hkûn, Sô gi, ngo lé bún toq kat jáng, ngá é nùnghtáng má, “Haû Yhûmsîng Garaî é hpungwup shingkang gi, Yhâng é jowò má hkya-ôn é hui sháng gàq ô!” gâ é htê mó mying htoq lo é lé ngò wó gyô ri. 13 Hau htoq agó, kângsoq bo é dui jung pê é dùng záng bàt lhum kô é htê eq ayàm mâ é lhêngchap pé mying é htê nghut é, mying hum htê mó lé le ngò wó gyô ri. 14 Hau htâng, Sô gi, ngo lé bún ló bê nghut mù, ngò gi, myìt nò luî, ngá é i-myìt sô nhikjum yô byùq bê nghut ri; haû Yhûmsîng Garaî é wúm bo é lòq gi, ngá é ahtoq má chyìk chyìk laî tô ri. 15 Ngò gi, Hkebara Wuìlàng yàm mâ é Tela Abiba jowò má shúm zung nyi é bâng chyáng lé jé mù, yhángmòq nyi tô é jang haú má nyhit nyí yhang myìt myo ûng wom luî, zung nyi é nghut lhê.
Ezekela Lé Wú Zúng Râ Wò Byî É Hkyô
16 Nyhit nyí byíng jáng, haû Yhûmsîng Garaî é mungdang ngá chyáng jé é gi, 17 “Byù zo ê, Ngò gi, nang lé, Isira-elaq byu pé lé wú zúng râ sû kut nhâng bê nghut lhê; haû mù, Ngò taî é dang lé gyô yù luî, yhángmòq lé sidìq byi aq. 18 Ngò gi, agè ashop sû lé, ‘Nàng gi, gè gè yhang shî râ nghut lhê.’ nghû taî é hkûn, nàng gi, yhang lé sidìq a byî é htoq agó, yhâng é chyungxe wó lùt râ matú, yhang lé hkyô shit dang a taî é nghut jáng, haú yùq gi, yhâng é yubàk marâ é yánmai shi byùq râ nghut lhê; Ngò gi, nang lé haú yùq é sui yui chyîn bùt râ nghut lhê. 19 Nghut kôlhang, nàng gi, agè ashop sû haú yùq lé sidìq byi kôle, yhang gi, yhâng é agè ashop hkyô eq yhang mara kut shut nyi é hkyô pé mai a lhing lo é nghut jáng, yhâng é yubàk marâ é yánmai shi byùq râ nghut lhê; nghut kôlhang, nàng yhang gi, chyungxe wó lùt râ nghut lhê.
20 Hau htoq agó, díngmán sû rayùq gi, yhâng é díngmán hkyô mai lhing ló mù, agè ashop é hkyô kut é nghut luî, Ngò gi, yhâng é hí má htûng lèqbàt jowò to byî é nghut jáng, yhang gi, shi byùq râ nghut lhê. Nàng gi, yhang lé a lhoqpûn é yánmai, haú yùq gi, yhûmsing é mara mai shi byùq râ nghut lhê. Haú yùq kut é díngmán hkyô pé lé gi, myìtbun byi râ a nghut; Ngò gi, nang lé haú yùq é sui yui chyîn bùt râ nghut lhê. 21 Nghut kôlhang, nàng, díngmán sû haú yùq lé mara a kut shut râ matú sidìq byî é nghut mù, yhang gi, mara a kut shut é nghut jáng, sidìq byî é hkyô lé gyô yù bê nghut é yánmai, gè gè yhang, haú yùq gi, chyungxe wó dui nyì râ nghut lhê; haû mù, nàng gi, yhûmsing é chyungxe wó lùt râ nghut lhê.” gâ ri.
22 Haú má, haû Yhûmsîng Garaî é lòq gi, ngá é ahtoq má jòq nyi é nghut mù, Yhang gi, ngo lé, “Toq mù, pá mau shut e ló aq; haú má, Ngò, nang lé dang nyô râ nghut lhê.” ga taî ri. 23 Haû mù, ngò gi, toq luî, pá mau má ê bê nghut lhê. Haú má, Hkebara Wuìlàng yàm má ngò myang é hpungwup shingkang su dùt é, haû Yhûmsîng Garaî é hpungwup shingkang jòq tô é nghut mù, ngò gi, myigùng má myòqdong ngóm gòp é nghut lhê.
24 Haú hkûn, Sô gi, ngá chyáng wàng mù, ngo lé tu shap kat ri; hau htâng, Yhang, ngo lé dáng nyo é gi, “Ló mù, náng é yhúmhkaû má ló lúng to aq. 25 Byù zo ê, wú aq; byu pé gi, nang lé chyup yû mù, tuî èq tui kôrâ nghut lhê; nàng gi, tuî zing pyâm é hui râ nghut mù, shiwa byu pê chyáng a wó htoq ê râ nghut lhê. 26 Ngò gi, nàng zim za nyì byùq luî, yhángmòq lé a wó tan loshoq, náng é shô lé, náng é ahtoq âm má lhoqtap pyám byi râ nghut lhê; hkâsu mù gâ le, yhángmòq gi, gumlau toq é byù myû nghut akô. 27 Nghut kôlhang, Ngò gi, nang lé Ngò dáng nyo é hkûn, náng é nhuthkum hpóng byi râ nghut mù, nàng, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri.’ nghû hko taí ra râ nghut lhê. Gyo râ sû gi, gyô yù sháng gàq; he-ngìk pyám râ sû gi, he-ngìk pyám sháng gàq; hkâsu mù gâ le, yhángmòq gi, gumlau toq é byù myû nghut akô nghut ri.