DANI-ELAQ LAIKÁ
Laiká
(Daniel)
Dani-elaq Babelon Ming Má Hpàqchyî Mhoq Yu É Hkyô
1
Yudaq hkóhkâm Yehoi-akim ùp é súm zan zàn má, Babelon hkóhkâm Nebuhkatneza gi, Yerusalem wà mó lé htim râ matú lé lóm hkyuq tô ri. 2 Haû Yhûmsîng gi, Yudaq hkóhkâm Yehoi-akim eq Garai Garaî é noqkuq yhûm mâ é zèhkoq ra-am lé, Nebuhkatneza é lòq má àp byî pyâm é nghut mù, yhang gi, zèhkoq haú pé lé, Babelon mâ é yhâng é hpara é noqkuq yhûm má yu ló mù, yhâng é hpara é sùtdò má ló kat tô ri.3-4 Hkóhkâm Nebuhkatneza gi, yhâng é hkóhkâm wâng mâ é zaugun wuì lé ùp sû Ashipenazi lé wùt yù mù, haî le a râ é, gùnghkyâng îhpyô yúng é, hpàqchyî byéng-yá a-myû myû bo é, rago mhoq hkam yu to bê nghut é, sê gyo lui é u-nuq bo é eq hkóhkâm wâng má dójaú râ a-tsam bo é, Isira-elaq byù zorâm wuì ra-am lé, hkóhkam é múzó má dójaú râ matú, hkóhkâm a-myû mai le, xânghpoq nge wó bâng chyáng mai le, hkyin shuî htoq yû luî, Babelon byu pê é dang eq laiká mhoq byi râ matú hkunmó hkyô ri. 5 Hau htoq agó, hkóhkâm hpó gi, haú bang lé, yhâng é zangbó mai zoshuq eq tsibyiq wing nyí wuî gàm byi râ matú sang tô ri. Haú bang gi, sum zân yhang mhoq hkam yu é htâng má shèq, hkóhkam é múzó má dójaú râ matú ge wâng kôrâ nghut lhê.
6 Haû hkyin yù huî é bang má, Yudaq byù Dani-elaq, Hanani-a, Misha-ela eq Azari-a pé bo akô nghut ri. 7 Zau hpó mó gi, yhángmòq é myìng htaî myhíng byî é nghut mù, Dani-elaq lé Beliteshaza ga, Hanani-a lé Shadrak ga, Misha-ela lé Meshak ga, Azari-a lé Abetnego ga htaî myhíng byî ri.
8 Nghut kôlhang, Dani-elaq gi, hkóhkâm zoshuq eq tsibyiq wîng èq yhâng gùng lé agòt a-û kut yû râ a nghut ga myìt hpyit yû luî, haú dông mai yhâng gùng lé agòt a-û a kut yû râ matú, zau hpó mó lé ahkáng dûng ri. 9 Garai Gasang gi, Dani-elaq lé, zau hpô é hí má myòqdong wó nhang é htoq agó, zau hpô èq shogyo nhikmyîn yu é huí nhang ri. 10 Nghut kôlhang, zau hpó haû gi, Dani-elaq lé, “Ngò gi, núngmòq é matú zoshuq eq tsibyiq wing lajang byî é, ngá é yhûmsîng hkóhkâm nghut sû lé gyùq ri. Yhang gi, haî mù luî, núngmòq é i-pyàt í nghut é, gótû zorâm wui htoq núngmòq é myòqdong a yúng é lé myàng râ lhú? Yhang myàng jáng, núngmòq é yánmai ngá é ulhum gyó byùq râ za nghut lhê.” ga taî ri.
11 Haû jáng, Dani-elaq gi, zau hpó mó èq, Dani-elaq, Hanani-a, Misha-ela eq Azari-a pé lé wú gon râ matú wò byî to huî é wú zúng sû lé, 12 “Náng é duìnhâng zoshâng wuì ngá-mòq lé, raxê nyí, mhan-haq hpoqnòq eq wuì za byî chyam wú aq. 13 Hau htâng, ngá-mòq é myòqdong ihpyô eq, hkóhkam é zoshuq zô é zorâm wui é myòqdong ihpyô lé whuî wú mù, nàng myang é eq rajung za, náng é duìnhâng zoshâng wuì ngá-mòq lé kut àq.” ga taî ri. 14 Haû mù, wú zúng sû haû gi, yhâng é dang lé gyo byi mù, yhángmòq lé raxê nyí chyam to bê nghut ri.
15 Raxê nyí lai jáng, yhángmòq gi, je wángzán é su dùt mù, hkóhkam é zoshuq zô é zorâm wuì yùq hkangmó htoq je xu yúng bum akô nghut ri. 16 Haû mù, wú zúng sû gi, yhángmòq é je ge é zoshuq lé le, yhángmòq shuq râ tsibyiq wing lé le, a byi lô é za, mhan-haq hpoqnòq za byi bê nghut ri.
17 Garai Gasang gi, zorâm haû myi yuq lé, hpàqchyî byéng-yá, laili laiká a-myû myû lé sê gyô é u-nuq eq sê hkyang é myìt pé kat byî ri. Dani-elaq gi, shing-rán pé eq yhupmòq ajung jung lé le sê gyô ri.
18 Zorâm wuì haú bang lé, hkóhkam é múzó wang dójaú râ matú, hkóhkam èq tû ge tô é ahkyíng jé jáng, zau hpó mó haû gi, haú bang lé, Nebuhkatneza chyáng shuî wang ri. 19 Hkóhkâm hpó gi, yhángmòq lé dang nyô jáng, Dani-elaq, Hanani-a, Misha-ela eq Azari-a pé lé hkyit é byù a nyi é lé wó myang ri; haû mù, yhángmòq gi, hkóhkam é múzó wang zui bekô nghut ri. 20 Hkóhkâm myî é hpàqchyî byéng-yá eq sê gyô é u-nuq hkyô pé bànshoq má, zorâm haú bang gi, mîngdán gón mâ é myòqnghop hpàqchyî kut bang eq lòng kat bang bànshoq htoq má raxê tú sê bum akô nghut ri.
21 Dani-elaq gi, Hkóhkâm Kuru sânghî zàn ùp é hkûn jé shoq, haú má nyi nyi ri.