HOSE-A LAIKÁ
Laiká
(Hosea)
1
Yudaq hkóhkâm Uzi-a, Yohtam, Ahaza eq Hezeki-a pé ùp é u eq Isira-elaq hkóhkâm, Yeho-ashaa é yhang zo Yerobo-am ùp é u má, haû Yhûmsîng Garaî é mungdang gi, Beri é yhang zo Hose-a chyáng jé ri.Hose-a É Yhûmsîng Myhí Eq Zodù Wuì
2 Haû Yhûmsîng Garai gi, Hose-a dông dáng nyo hi é hkûn, yhang lé, “Ê mù, shiwa myhí lé ê hâng yù luî, yhang eq zoshâng wuì lé hkû àq; hkâsu mù gâ le, mîngdán shî gi, shiwa myhí kut é su, haû Yhûmsîng Garai lé a jujúm é mara kut shut bê nghut ri.” ga taî ri. 3 Haû mù, Hose-a gi, Dibila-im é yhang zo byìzo Gomera lé hâng yu é nghut mù, yhang gi, zogûng wùn luî, yhang lé yùqzo rayùq hkû byi bê nghut ri.
4 Haú hkûn, haû Yhûmsîng Garai gi, Hose-a lé, “Zoshâng haú lé Yezirela nghû myìng myhíng byi aq; hkâsu mù gâ le, Ngò gi, Yezirela Langhkaû má shun pyâm é suî é yánmai, a myáng má Yehu é yhûmbyù wuì lé mara dam byi râ nghut mù, Isira-elaq mîngdán lé lhoqhtûm pyám râ nghut lhê. 5 Haú buìnyì má, Ngò gi, Yezirela Langhkaû má Isira-elaq é lai lé lhoqhkyop pyám byi râ nghut lhê.”
6 Gomera gi, zogûng dum wùn mù, byìzo rayùq hku ri. Haú hkûn, haû Yhûmsîng Garai gi, Hose-a lé, “Yhang lé, Lo-Ruhamab nghû myìng myhíng byi aq; hkâsu mù gâ le, Ngò gi, Isira-elaq byu pé lé, yhángmòq é yubàk mara hkyut pyám byi shoq, chyitdàp myìt shit râ a nghut lo. 7 Nghut kôlhang, Ngò gi, Yudaq lé chyitdàp myìt shit râ nghut lhê. Ngò gi, yhángmòq lé hkyi yu é hkûn, lai, shâm, majan, myang pé eq myang ji ji bâng èq hkyi yù râ a nghut; yhángmòq é Garai Gasang nghut é, Ngò, Yhûmsîng Garai yhang, yhángmòq lé hkyi yù râ nghut lhê.” ga taî ri.
8 Gomera gi, Lo-Ruhama lé naú kâng é htâng, zogûng dum wùn mù, yùqzo góyùq dum hku ri. 9 Haú hkûn, haû Yhûmsîng Garai gi, “Yhang lé, Lo-Amic nghû myìng myhíng byi aq; hkâsu mù gâ le, núngmòq gi, Ngá é byu pé a nghut; Ngò le, núngmòq é Garai Gasang a nghut.
10 Nghut kôle, Isira-elaq byu pé gi, a ung lìk wú, a ung nghap loshoq é, wuimau yàm mâ é se-muî su myo kôrâ nghut lhê. Yhángmòq lé, ‘Núngmòq gi, Ngá é byu pé a nghut.’ nghû taî é jang má yhang, yhángmòq gi, ‘Rû dui nyi é Garai Gasâng é yhang zô pé.’ ga wùt é hui kôrâ nghut lhê. 11 Yudaq byu pé eq Isira-elaq byu pé gi, rahá chôm zùp zing mù, ushuq rayùq hkyin htoq luî, maumyî haú mai htoq lô kôrâ nghut lhê; hkâsu mù gâ le, Yezirela é buìnyì gi, buìnyì mó dùt râ nghut lhê.