YO-ELA LAIKÁ
Laiká
(Joel)
1
Haû Yhûmsîng Garaî é mungdang Pehtu-ela é yhang zo Yo-ela chyáng jé ri.Dinggám Wúm Jé É Hkyô
2 Sûwún wuî ê, shî gyô yù keq;
mîngdán hkaû má nyi é bànshoq bang ê, gyo keq.
Núngmòq é i-pyàt má le, núngmòq é îchyí îwâ é i-pyàt má le,
shî sû é múzó dùt htoq wú akô lhú?
3 Shí hkyô lé, núngmòq é zodù wuì lé taî kyo keq;
yhángmòq gi, yhûmsing é zodù wuì lé shí hkyô taî kyo kó sháng gàq;
zodù wuì haú bang gi, yhángmòq é htâng mâ é pyàt bán bang lé taî kyô gyó ló kó sháng gàq.
4 Baû pê èq zô myhit tô é lé gi,
dinggám jûm mó èq zô pyám;
dinggám jûm mó èq zô myhit tô é lé gi,
dinggám ne pê èq zô pyám;
dinggám ne pê èq zô myhit tô é lé gi,
dinggám nyui èq zô pyám râ nghut lhê.
5 Î shuq wùt bang ê, yhup bûn lò mù, ngaù keq!
Tsibyiq wing shuq laî é bànshoq bang ê, ngaùhkyûng ngaùyang kut keq;
núngmòq é nhutwuî mai tsibyiq wing asik lé lú kyaq yu pyám byi bê nghut é yánmai,
ngaùhkyûng ngaùyang kut keq.
6 Hkâsu mù gâ le, a ung nghap é, wum mó bo é a-myû gi,
Ngá é mîngdán lé lé htim bê nghut ri;
yhángmòq é zuì gi, hkanghkyî é zuì su dùt mù,
yhángmòq é zuì mó gi, hkanghkyi zing é zuì su dùt ri.
7 Haú pé gi, Ngá é tsibyiq nuî pé lé lhoqhtên pyám byi mù,
Ngá é hkohúm gâm pé lé lhoqhtên pyám byi bê nghut ri.
Haú pé gi, sikkuq pé lé hî shang pyám mù, dú pyâm to kôluî,
hpyu é akoq a-kyâng za jòq tô bùm bê nghut ri.
8 Chyungxe zànwut rám tô u, yhang lé dûng tô é sû shi byùq mù,
jimê wùt luî yón kuq ngau é zo-myi gyíng su,
ngaùhkyûng ngaùyang kut keq.
9 Haû Yhûmsîng Garaî é yhûm má,
gùqzò hkungga pé eq shuq jung hkungga pé htûm byùq bê nghut ri.
Haû Yhûmsîng Garaî é múzó wùn wàq é,
hkyangjông pé gi, yón ngau bùm bekô nghut ri.
10 Yò pé gi, htên byùq mù,
myigùng gi, kyuq huî byùq bê nghut ri;
gùqzò muilhum gi, lhoqhtên pyâm é hui mù,
tsibyiq wing asik gi, kân byùq luî,
tsanlun xû le, kân byùq bê nghut ri.
11 Yò mú zui zo bang ê, myìt gyuî ngaù keq;
tsibyiq hkyâm saí bang ê, ngaùhkyûng ngaùyang kut keq;
kyô shu yòq mâ é yò lé lhoqhtên pyám byi bê nghut é yánmai,
súngsô eq mùk-yó gùq é matú yón ngaû keq.
12 Tsibyiq nuî gi, kyuq shi byùq mù,
hkohúm gâm gi, nyhuî kyuq byùq bê nghut ri;
lungshi gàm, ma-ûn gàm, jawú-mân shi gâm eq,
yò mâ é sikgâm bànshoq kyuq shi byùq bê nghut ri.
Gè gè yhang, byu pê é myìt ngón gabú hkyô gi,
byùq byùq bê nghut ri.
Yón Ngau Garu Râ Hkyô
13 Hkyangjông pé ê, jimê tû wùt mù yón ngaû keq;
hkungga gyàp hí má múzó wùn wàq é bang ê, yón ngau garu keq.
Ngá é Garai Gasâng é hí má dójaú é bang ê, lé keq,
jimê tû wùt mù ra-myin mau nyi to keq;
hkâsu mù gâ le, gùqzò hkungga pé eq shuq jung hkungga pé gi,
núngmòq é Garai Gasâng é yhûm má a nhông byi lo kó nghut ri.
14 Zoshuq túm râ matú tû to keq;
shiwa byù lé shuî zùp zing keq.
Sûwún wuî eq mingbyû wuì lé,
núngmòq é Garai Gasang nghut é,
haû Yhûmsîng Garaî é yhûm má ji tsing mù,
haû Yhûmsîng Garai lé wùt dûng ngaù keq.
15 Goì ê, buìnyì haû jé bê nghut ri;
haû Yhûmsîng Garaî é buìnyì gi, chyáng bê nghut ri;
haû gi, htên byòq hkyô su, Wum-o a-tsam dìk shoq bò Su chyáng mai htoq lô râ nghut lhê.
16 Ngá-nhûng é myòq hí mai zoshuq,
ngá-nhûng é Garai Gasâng é yhûm mai,
gabú nguì ngón hkyô eq gabú myìt ngón hkyô,
htûm byùq bê a nghut lhí?
17 Kyô myui gi, myì hkaû má kyuq byùq bê nghut ri;
gùqchyî pé gi, htên byòq byùq mù,
kyôshi myuishi kat jang pé gi,
byòq htên byùq bê nghut ri;
hkâsu mù gâ le, gùqzò muilhum gi, kyuq shi byùq bê nghut ri.
18 No hpúng gi, gyai yhang bo ngau nyi bum ri!
No myang pé gi, mhan yô a jòq lô é yánmai,
myìt htûm byùq bùm bê nghut luî,
sau hpúng pé lháng hpu zô nyi bùm bê nghut ri.
19 Yhûmsîng Garai ê, Nang lé ngò wùt dûng lhê;
hkâsu mù gâ le, myi gi, yòso mâ é mhan yô lé myui pyám byi mù,
myishâm gi, pá pé mâ é sikgâm bànshoq lé nyhê hkyô pyám bê nghut ri.
20 Haû tân jung yòsô zè pé lháng,
Nang lé myìt tuî nyi bum ri;
hkâsu mù gâ le, wuìbúm wuìlàng pé kân byùq mù,
yòso mâ é mhan nú yô pé nyé gyó byùq bê nghut ri.