Myìt Lhîng Jáng Shimân Jeju Wó É Hkyô
14
Isira-elaq byu pé ê, núngmòq gi, yhûmsing é yubàk mara mai,lèqbàt bùm bekô nghut é yánmai,
núngmòq é Garai Gasang nghut é, haû Yhûmsîng Garaî chyáng lhing taû lò keq!
2 Tôngbán râ dang pé wun chûng mù,
haû Yhûmsîng Garaî chyáng lhing taû lò luî,
Yhang lé, “Ngá-mòq é shut mara bànshoq lé hkyut pyám byi luî,
jeju bo é myìt mai ngá-mòq lé hàp yù laq;
haû jáng, ngá-mòq gi, ngá-mòq é nhutwuî ashi lé
Náng chyáng wó nhông byi râ nghut lhê.
3 Asuri gi, ngá-mòq lé wó hkyi yu é a nghut;
ngá-mòq gi, gyè myang ji râ a nghut.
Ngá-mòq gi, ngá-mòq é lòq èq yhang saî tô é lé,
‘Ngá-mòq é hparà pé’ nghû, hkâ-nhám le dum taí râ a nghut;
hkâsu mù gâ le, chuízô pé gi,
Náng chyáng shogyo nhikmyin hkyô myang ho akô nghut ri.” nghû taí keq.
4 Haû Yhûmsîng Garai gi, “Ngò, yhángmòq lé nhikjum yô é hkyô bui byùq bê nghut é yánmai,
Ngò gi, yhángmòq zùt taû ló byùq é mara lé yâ gè byi mù,
yhángmòq lé laí laí chyitdàp râ nghut lhê.
5 Ngò gi, Isira-elaq é matú nghân su dùt râ nghut mù,
yhang gi, htupbó ban su bó râ nghut lhê.
Yhang gi, Lebanon bùm mâ é kyám gâm su,
a-myìt chín râ nghut lhê;
6 yhâng é a-nyùq pé gi, kô yúng râ nghut lhê.
Yhang gi, tsanlun gàm su kô hkìkhkam lò râ nghut mù,
yhâng é shôm gi, Lebanon bùm mâ é kyám gâm su namngón râ nghut lhê.
7 Byu pé gi, yhâng é buìshûm ô má dum nyì kôrâ nghut lhê;
yhángmòq gi, kyôzo muilhum su myô jàt râ nghut mù,
tsibyiq nuî su abó bó kôrâ nghut lhê.
Isira-elaq é myìng gi, Lebanon bùm mâ é tsibyiq wing su nam hom râ nghut lhê.
8 Ehprim gi, hparà hpôlhô pé eq haî sêng lhê lhú?
Ngò gi, yhang lé gyo byi mù, yhang lé wú gon râ nghut lhê.
Ngò gi, nyui yúng é htángmó gâm eq du lhê;
náng é ashi pé gi, Ngá chyáng mai lo é nghut lhê.” ga taî ri.
9 Hpàqchyî bò bang gi, ô pé nghut lhê lhú?
Yhángmòq shí hkyô pé lé sé kó sháng gàq.
Sê gyô é u-nuq bò bang gi, ô pé nghut lhê lhú?
Yhángmòq sê gyo kó sháng gàq.
Haû Yhûmsîng Garaî é hkyô pé gi, díngmán é nghut mù,
díngmán é bang gi, haú pé mai sô akô;
nghut kôlhang, gumlau toq é bang gi, haú pé má htûng lèqbàt akô nghut ri.