Isira-elaq Lé Yhûmsîng Garai Nhikjum Yô É Hkyô
13
Ehprim up gi, dang nyô jáng, byu pé gyùq nán byùq bum ri;yhángmòq gi, Isira-elaq má je myhâng shoq wàq toq é hui bang nghut ri.
Nghut kôlhang, yhángmòq gi, Balaq lé noq é mara bò mù, shi byùq bê nghut ri.
2 Ahkuî, yhángmòq gi, je lé je mara kut shut akô;
yhángmòq gi, yhûmsing é matú, yhûmsing é ngùnhtung mai hparà hpôlhô pé saí mù,
u-nuq bo é dông hparà zòng pé saî htoq akô;
haú pé bànshoq gi, lòqmú kung bâng èq saî é chyat nghut akô.
Haû mù, yhángmòq eq séng luî,
“Hkungga nhông byî é bang gi,
no zo hparà lhô lé nhut èq puq byî akô nhung!” ga taî bum akô.
3 Hau é yánmai, yhángmòq gi, nàpsun lhê é nghânsoq su le,
noq le byùq byùq é nghân su le,
chyârâng mai lai èq mùt tâng pyâm é gùqsôm su le,
hkohot mai htoq byùq é myihkau su le, dùt byùq kôrâ nghut lhê.
4 “Nghut kôlhang, Ngò gi, núngmòq lé Egutuq ming mai shuî htoq lo é,
núngmòq é Garai Gasang nghut Sû,
haû Yhûmsîng Garai nghut lhê.
Núngmòq, Ngò Garai Gasang lé sê é mai lai luî, gótû lé a sé;
Ngò za núngmòq é Hkyi yù Sû nghut lhê.
5 Ngò gi, hkyíng hkyíng nyé é maumyî nghut é,
yòso má núngmòq lé wú gôn é nghut lhê.
6 Yhángmòq lé Ngò byi tso jáng, yhángmòq zô gyî bùm bekô nghut ri;
yhángmòq zô gyî bùm jáng, nghutbûn lò kômù,
Ngo lé tô-myhî pyâm akô nghut ri.
7 Haû mù, Ngò gi, yhángmòq é matú hkanghkyi su dùt râ nghut mù,
lo-ká mó su, hkyô yàm má gyám wú nyî râ nghut lhê.
8 Ngò gi, azo lhoqhpyuq é wàm su,
yhángmòq lé htim mù, yhángmòq é wànggàng myàq hkoq pyám byi râ nghut lhê;
Ngò gi, haú má, hkanghkyi su yhángmòq lé ngàt zô pyám râ nghut lhê;
tân jung yòsô zè pé su, yhángmòq lé lâng hkyâm myha pyám râ nghut lhê.
9 Isira-elaq byu pé ê, núngmòq lé garúm Sû, Ngo lé núngmòq htuqhtíng bekô nghut é yánmai,
núngmòq gi, lhoqhten lhoqhpyoq pyâm é hui râ nghut lhê.
10 Núngmòq lé wó hkyi yù âbe,
núngmòq é hkóhkâm gi, hká má kó lhú?
‘Ngá-mòq lé hkóhkâm eq zau wuî byi keq.’ ga núngmòq taî é,
núngmòq é wà pé mâ é zau wuî gi, hká má kó lhú?
11 Haû mù, Ngò gi, nhikjum yô é mai núngmòq lé hkóhkâm byi mù,
nhikmó-yô é mai yhang lé dum wùp yu pyâm é nghut lhê.
12 Ehprim kut shut é hkyô lé gyèq pyám mù,
yhâng é yubàk mara lé hkong to byi bê nghut lhê.
13 Yhang gi, zo hkû nò no é myiwe myhí su no hpu zo râ nghut lhê;
nghut kôlhang, yhang gi, hpàqchyî a bo é zoshâng nghut ri;
yhang gi, hku htoq kat râ hkyíng jé kôle,
înû wam hkaû mai a htoq lo é zo eq du ri.
14 Haû mù, Ngò gi, byù shí bang lé mosumhkung mai hkyi xe yù râ a nghut lhí?
Ngò gi, yhángmòq lé shî-nò hkyô mai hkyi xe yù râ nghut lhê.
Shî-nò hkyô ê, náng é wúm pé gi, hká má lhú?
Mosumhkung ê, náng é htên byòq hkyô gi, hká má lhú?
Ngò gi, shogyo nhikmyin myìt bò râ a nghut lo.
15 Ehprim gi, gu-mang wui pê chyáng myô lò jàt lò kôle,
dánpyut yòso mai mùt é laì nghut é,
haû Yhûmsîng Garaî chyáng mâ é buìhtoq laì lò râ nghut lhê.
Yhâng é wuìbúm gi, a htoq lo dùt byùq mù,
yhâng é wuì dong gi, kân byùq râ nghut lhê.
Yhâng é sùtdò mâ é hpaudap zê bànshoq lé gi,
lú yu pyám byi kôrâ nghut lhê.
16 Samariq byu pé gi, yhángmòq é Garai Gasang lé gumlau toq kô é yánmai,
yhángmòq é yubàk mara wò yù ra kôrâ nghut lhê.
Yhángmòq gi, sham èq sat pyâm é hui zo mù,
yhángmòq é zoshâng zo wuî gi, myigùng má wàq htûng pyâm é hui zo kôrâ nghut luî,
yhángmòq é zogûng wun é myiwe wuì gi,
yâm hkoq pyâm é hui zo kôrâ nghut lhê.” ga haû Yhûmsîng Garai taî ri.