AMO LAIKÁ
Laiká
(Amos)
1
Uzi-a gi, Yudaq hkóhkâm kut nyì mù, Yeho-asha é yhang zo Yerobo-am gi, Isira-elaq hkóhkâm kut nyi é u, layàng nún râ hí í zân má, sau zúng bang mâ é rayùq nghut sû, Teko-a wà byù Amo gi, Isira-elaq eq sêng é mungdang bo é shing-rán myang ri.2 Yhang gi, “Haû Yhûmsîng Garai gi, Zi-un Bùm mai wùt garu mù,
Yerusalem wà mó mai maugum htê pé lhoqhtoq nhâng râ nghut lhê;
sau zúng bâng é mhan nú yô pé gi, kyuq shi byùq mù,
Hkarimela bùm nyuq gi, nyhuî kyuq byùq râ nghut lhê.” ga taî ri.
Isira-elaq É Awui Ayàm Bang Lé Târâ Jéyáng Râ Hkyô
3 Haû Yhûmsîng Garai shî su ga taî ri;
“Damasikuq wà bang gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, gùq bàt é jòqtoq kyángsê èq bàt é su,
Gile-at ming lé bàt bekô nghut ri;
4 haû mù, ngò gi, hkóhkâm Haza-ela é yhûm má myi hkyô kat mù,
hkóhkâm Ben Hadat é gingtíng jowò pé lé nyhê hkyô pyám râ nghut lhê.
5 Ngò gi, Damasikuq wàhkum lé lhoqhkyop pyám mù,
Awen Langhkaû má nyi é hkóhkâm eq
Bet Eden má ùp é dumbáng chûng sû lé lhoqhtûm pyám râ nghut lhê.
Aram mau mâ é byu pé gi, Kira ming shut shúm zung é hui kôrâ nghut lhê.” gâ ri.
Haû gi, Yhûmsîng Garai taî é nghut ri.
6 Haû Yhûmsîng Garai shî su ga taî ri;
“Gaza wà bang gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, shúm byû dông chyup yu é byù hpúng gón lé,
Edom byu pê chyáng ung zô akô nghut ri;
7 haû mù, Ngò gi, Gaza wa é wàhkûm htoq má myi hkyô kat mù,
hau é gingtíng jowò pé lé nyhê hkyô pyám râ nghut lhê.
8 Ngò gi, Ashidot wà mâ é hkóhkâm lé le,
Ashikelon wà má ùp é dumbáng chûng sû lé le, lhoqhtûm pyám râ nghut lhê.
Ngò gi, Ekron wà lé Ngá é lòq èq htim râ nghut mù,
ló htáng má myìt gyó tô é Hpilisiti byu pé gi, shi byùq kôrâ nghut lhê.” gâ ri.
Haû gi, Ahko Ahkáng lhúnglháng wó Sû Yhûmsîng Garai taî é nghut ri.
9 Haû Yhûmsîng Garai shî su ga taî ri;
“Turuq wà bang gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, gu-mang yhangchang tô tô é dangshikaq lé a cháng kó kut mù,
shúm byû dông chyup yu é byù hpúng gón lé,
Edom byu pê chyáng ung zô akô nghut ri;
10 haû mù, Ngò gi, Turuq wa é wàhkûm htoq má myi hkyô kat mù,
hau é gingtíng jowò pé lé nyhê hkyô pyám râ nghut lhê.” gâ ri.
11 Haû Yhûmsîng Garai shî su ga taî ri;
“Edom ming bang gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, nhikjum ru jâng yô nyì mù,
yhûmsing é gu-mang lé sham èq châng hkat luî,
haú mau mâ é myiwe wuì lé sat pyám mù,
hkâ-nhám le nhik a dik kó nghut ri;
12 haû mù, Ngò gi, Teman wà htoq má myi hkyô kat mù,
Bozira é gingtíng jowò pé lé nyhê hkyô pyám râ nghut lhê.” gâ ri.
13 Haû Yhûmsîng Garai shî su ga taî ri;
“Ammon byu pé gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, yhûmsing é maukyo lé lhoqlam yù râ matú,
Gile-at wà mâ é zogûng wun é myiwe wuî lé yâm htông akô nghut ri;
14 haû mù, Ngò gi, gyè zân é buìnyì má wùt garû ngau é eq
laìdun mó lo é buìnyì má laì htan é u,
Raba wàhkûm htoq má myi hkyô kat mù,
hau é gingtíng jowò pé lé nyhê hkyô pyám râ nghut lhê.
15 Yhángmòq é hkóhkâm eq yhâng é zaugun wuì gi,
shúm zung é rahá hui kôrâ nghut lhê.” gâ ri.
Haû gi, Yhûmsîng Garai taî ri.