2
Haû Yhûmsîng Garai shî su ga taî ri;“Moba mau gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, Edom hkóhkam é showui showang pé lé,
myiwap dùt shoq nyhê hkyô pyâm akô nghut ri;
2 haû mù, ngò gi, Moba mau htoq má myi hkyô kat râ nghut mù,
Keri-ot wà mâ é gingtíng jowò pé nyé gyó byùq râ nghut lhê.
Moba mau gi, mying hûm é, majan htê wùt ngau é eq tut mùt é htê mai,
shi htûm byùq râ nghut lhê.
3 Ngò gi, haú mau mâ é zau lé sat pyám râ nghut mù,
yhang eq rahá haú mâ é zaugun wuì bànshoq lé le sat pyám râ nghut lhê.” gâ ri;
haû gi, Yhûmsîng Garai taî ri.
4 Haû Yhûmsîng Garai shî su ga taî ri;
“Yudaq mau gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, haû Yhûmsîng Garaî é târâ lé he-ngìk pyám kômù,
Yhâng é târâ wàng hkunmó pé lé a cháng kó kut luî,
yhángmòq é îchyí îwâ pé châng é hparà pê èq,
hkyô shuî nghoq é hui zô bùm bekô nghut ri;
5 haû mù, Ngò gi, Yudaq mau htoq má myi hkyô kat râ nghut mù,
Yerusalem wà mó mâ é gingtíng jowò pé nyé gyó byùq râ nghut lhê.” gâ ri.
Isira-elaq Lé Târâ Jéyáng Râ Hkyô
6 Haû Yhûmsîng Garai shî su ga taî ri;
“Isira-elaq mau gi, sum dá myí dá mara kut shut kô é yánmai,
Ngò gi, yhángmòq lé mara dam a byî é za tô to râ a nghut.
Yhángmòq gi, mara a bò sû lé, ngùnhtûng èq,
asho awui dùt sû lé, hkyî-tsung razúm èq ung zô pyâm akô nghut ri.
7 Yhángmòq gi, myigùng mâ é hpuílhup lé nâng pyeq é su,
myùng bâng é ulhum lé nâng pyeq kômù,
zìk zo huî é bang lé târâ ràp-rá hkyô a kut byi kó nghut ri.
Yhâng wa eq yhang zo gi, zo-myi rayùq eq za gùngsho chôm zùm kô é yánmai,
Ngá é chyoiyúng myîng lé agòt a-û kut pyâm akô nghut ri.
8 Yhángmòq gi, masàt zè dông byam byî tô é mèbu lé yù mù,
hkungga gyàp hkangmó é a-nàm má hkang luî lèq akô nghut ri.
Yhángmòq gi, yhángmòq é hparà yhûm má,
chup yu é tsibyiq wing lé shuq akô nghut ri.
9 Nghut kôlhang, Ngò gi, kyám gâm pé su myhâng luî,
wàqmyòq gàm pé su htan é Amori byu pé lé,
yhángmòq é hí má sat pyám bê nghut lhê.
Ngò gi, yhángmòq é ahtoq shut mâ é ashi eq
yhángmòq é a-ô shut mâ é a-myìt lé, lhoqhtên pyâm é nghut lhê.
10 Ngò gi, núngmòq lé, Amori byu pê é maumyî lé byi râ matú,
Egutuq ming mai shuî htoq lô mù,
yòso má myi xê zàn shuî û wún é nghut lhê.
11 Ngò gi, núngmòq é zodù wuì mai myìqhtoî pé,
núngmòq é zorâm wuì mai Naziri byu pé lé, nyi htoq nhâng bê nghut lhê.
Isira-elaq byu pé ê, shí hkyô têng lhê, a nghut kó lhí?” gâ ri;
haû gi, Yhûmsîng Garai taî pyo ri.
12 “Nghut kôlhang, núngmòq gi, Naziri byu pé lé, tsibyiq wing shuq nhâng mù,
myìqhtoî pé lé, myìqhtoi a htoi râ matú hkunmó hkyô akô nghut ri.
13 Haû mù, ahkuî, Ngò gi, gùqzò muilhum byíng é lhêng gyòp byùq é su,
núngmòq lé lhoqhkyop pyám râ nghut lhê.
14 Haû gyai wó hân bang gi, wó hpang lùt râ a nghut;
wum bô bang gi, yhûmsing é wum wó kat kôrâ a nghut;
sârhe pé gi, yhûmsing é chyungxe lé wó hkyi xe yù kôrâ a nghut.
15 Lai chûng sû gi, wó yàp to râ a nghut;
gyaí ge din é gyèzo gi, wó lùt râ a nghut;
myang ji ji sû gi, yhûmsing é chyungxe lé wó hkyi xe yù râ a nghut.
16 Haú buìnyì má, myìt gyaí htan é sârhe pé lháng,
gùngchîn hpâng kôrâ nghut lhê.” gâ ri;
haû gi, Yhûmsîng Garai taî pyo ri.