Dinggám Pé Mai Sidìq Byî É Hkyô
2
Zi-un wà mó má tut mùt keq;Ngá é chyoiyúng bùm má sidìq byî é dông garu keq.
Mingbyû wuì bànshoq bang gi, gyùq nán bûm kó sháng gàq;
hkâsu mù gâ le, haû Yhûmsîng Garaî é buìnyì jé lo nyì bê nghut ri;
haû gi, chyáng bê nghut ri.
2 Buìnyì haû gi, mauchut luî, tuq tuq chut é nghut mù,
mhut htup luî, tîng tîng nòq é nghut ri.
Bùm pé má san za maubó byùq é su,
gyai myô é eq wum-o a-tsam bo é gyè hpúng jé râ nghut lhê.
Haú sû é gi, góhkûn le a dùt wú,
jé lô râ pyàt bán pé má le dùt htoq râ a nghut.
3 Yhángmòq é hí má gi, myi gyúng nyî mù,
yhángmòq é htâng má gi, myishâm dùq nyi ri.
Yhángmòq é hí mâ é maumyî gi, Edin hkyâm su dùt mù,
yhángmòq é htâng mâ é maumyî gi,
chamchyuîyui é yòso dùt byùq bê nghut luî,
yhángmòq chyáng mai haî le wó hpang lùt râ a nghut.
4 Yhángmòq é gùnghkyâng îhpyô gi, myang pé eq dù mù,
myang ji jî é gyèzô pé su din bum akô nghut ri.
5 Haú pé gi, bùm nyuq htoq pé má,
mying garû é gyèlhêng pé su le,
myi nyé jàp myhîng é htê su le,
majan zan râ matú hen tô é wum-o bo é gyè hpúng su le,
byam gó chyû nyi bum akô nghut ri.
6 Byù myû wuì gi, yhángmòq hí má dìk shoq hpu zô bum akô;
yùq hkangmó gi, myòqdong abósôm mâ é dùt bum akô nghut ri.
7 Yhángmòq gi, sârhe pé su din htim kômù,
gyèzô pé su wàhkûm pé má dòq bum akô nghut ri.
Yhángmòq gi, ó le ó e ló é mai a sô shai lhum kô é za,
bànshoq díng díng yán e ló bum akô nghut ri.
8 Yhángmòq gi, rayùq eq rayùq a záng htûng lhûm é za,
ó le ô é hí shut díng za yán e ló bum akô nghut ri.
Yhángmòq gi, lòqyò lòqpai a jau ló byùq é za,
lhom htuqhtîng é jang mai wó yán laî akô nghut ri.
9 Yhángmòq gi, wà má htîm din gó wún akô;
yhángmòq gi, wàhkûm htoq má din dòq yán bum akô.
Yhángmòq gi, yhûm pé má dòq wàng mù,
hkau bang su hkohot mai wang bum akô nghut ri.
10 Yhángmòq é hí má, myigùng nún byùq luî,
mauhkûng nán byùq mù,
buì eq lha-mó nòq byùq luî,
kyî pé le a dùq bó byùq lo nghut ri.
11 Haû Yhûmsîng Garai gi,
Yhâng é gyè hpúng hí má maugum gúm nhang ri;
Yhâng é gyè hpúng gi, a ung nghap loshoq myo mù,
Yhâng é jì-no lé gyô é bang gi, wúm htan bum akô nghut ri.
Haû Yhûmsîng Garaî é buìnyì gi,
kô hkìk é eq gyùq chiq hpo mó nghut ri.
Buìnyì haú lé ó yùq wá wó jan râ lhú?
Myìt Lhîng Wó Râ Matú Taî É Hkyô
12 Haû Yhûmsîng Garai taî pyo é gi,
“Ahkuî nghut kôlhang, zoshuq túm mù,
ngaùbyi ngaùnhap kut luî, yón kuq ngaû mù,
i-myìt nhiklhum bànshoq èq Ngá chyáng lhing taû lò keq.” gâ ri.
13 Núngmòq é mèbu lé a nghut é za,
núngmòq é i-myìt nhiklhum lé lâng cheq keq.
Núngmòq é Garai Gasang nghut é, haû Yhûmsîng Garaî chyáng lhing taû lò keq;
hkâsu mù gâ le, Yhang gi, jeju byî é eq shogyo myìt bo é,
luì za nhikjum a yô é eq chyitdàp myìt byíng é Sû nghut mù,
byò dàn byò sho hkyô jé nhang é mai myìt lhîng bê nghut ri.
14 Yhang gi, núngmòq é Garai Gasang nghut é, haû Yhûmsîng Garaî é matú,
gùqzò hkungga pé eq shuq jung hkungga pé wó nhông byi shoq,
Yhang myìt lhîng mù, myìt htaí luî,
núngmòq lé shimân jeju a byi nghû, ó yùq wó taí râ lhú?
15 Zi-un wà mó má tut mùt keq;
Zoshuq túm râ ahkyíng tû to keq;
shiwa byù lé shuî zùp zing keq.
16 Mingbyû wuì lé shuî tsing mù,
shiwa byù hpúng lé lhoq chyoiyúng keq;
sûwún wuî lé rahá shuî tsing mù,
zoshâng wuì eq naú shuq é zonú pé lé zing nhâng keq.
Lusik lé, yhâng é wàp mai htoq nhâng luî,
myisik lé, yhâng é gaû é wàp mai htoq nhâng keq.
17 Haû Yhûmsîng Garaî é hí má dójaú é hkyangjông pé gi,
laìshînhtâng eq hkungga gyàp gyoro má ngaù luî,
“Yhûmsîng Garai ê, Náng é byu pé lé wú shogyo nhikmyîn yù laq.
Náng é silî wunlî byu pé lé, góbang rhoi é hkâhui nhâng,
byù myû wui chyáng wuìzuì tú sânghkyang le hkâdùt nhâng.
‘Yhángmòq é Garai Gasang gi, hká má lhú?’ ga, haî mù luî byu pê chyáng
yhángmòq taî bùm kôrâ lhú?” ga taí kó sháng gàq.
Haû Yhûmsîng Garai Gyo Byî É Hkyô
18 Haú hkûn, Yhûmsîng Garai gi, Yhâng é mîngdán lé ha bun mù,
Yhâng é byu pé lé shogyo bê nghut ri.
19 Hau htoq agó, haû Yhûmsîng Garai yhángmòq lé tû taî é gi,
“Ngò gi, núngmòq chyáng, gùqzò, tsibyiq wing asik eq tsanlun xû pé byi râ nghut mù,
núngmòq gi, gyî daû bùm kôrâ nghut lhê;
Ngò gi, núngmòq lé, byù myû wui chyáng
rhoi é dum hui zo nhâng râ a nghut lo.
20 Ngò gi, mautsûng hkyam mâ é dinggám ajùm ayò lé,
núngmòq chyáng mai hkat htoq râ nghut mù,
kyuq huî é eq chamchyuîyuì dùt é maumyî má
tsing dûn chyûn hâng kat râ nghut lhê;
buìhtoq hkyam mâ é haú pé lé gi,
Xo Nhông shut hkat hâng kat mù,
buìwàng hkyam mâ é haú pé lé gi, Medihteri-an Wuimau shut hkat hâng kat râ nghut lhê.
Haû nam é shôm eq bùp nam é shôm htoq byo myín lô râ nghut lhê.” gâ ri.
Gè gè yhang, haû Yhûmsîng Garai gi, múzó mó pé kut bê nghut ri!
21 Maumyî ê, hkâgyùq;
myìt ngón luî gabú byam chyu aq.
Gè gè yhang, haû Yhûmsîng Garai gi, múzó mó pé kut bê nghut ri!
22 Tân jung yòsô zè pé ê, hkâgyùq kó;
hkâsu mù gâ le, yòso mâ é mhan nú yô pé gi, dum nyui yúng lo bùm bê nghut ri.
Shigâm pé gi, ashi zuî to bê nghut ri;
hkohúm gâm eq tsibyiq nuî pé gi, ashi já tô bùm bê nghut ri.
23 Zi-un mâ é byu pé ê, myìt ngón keq;
núngmòq é Garai Gasang nghut é, haû Yhûmsîng Garaî chyáng gabú byam chyu keq;
hkâsu mù gâ le, Yhang gi, jujúm Sû nghut mù,
núngmòq lé mau mún wò byi nhâng bê nghut ri.
Yhang gi, hí lhê su, mau mún eq wò htáng htâng é mau lé,
agùn agó núngmòq chyáng wo hkyó byi nhâng bê nghut ri.
24 Haû mù, chyârâng má gùqzò muilhum byíng râ nghut lhê;
shi pyik xû pyik jang má tsibyiq wing asik eq tsanlun xû byíng muî râ nghut lhê.
25 “Ngò, núngmòq chyáng nhang kat é, Ngá é gyè hpúng mó nghut é,
dinggám mó, dinggám nyuî, dinggám nê eq bau pé zô pyâm é zànwut pê é matú,
Ngò, núngmòq lé dum tau byi râ nghut lhê.
26 Haú hkûn, núngmòq gi, zoshuq agùn agó wó mù, gyi gyi dau dau myàng zo luî,
núngmòq é matú maúhpo múzó pé kut byî é,
núngmòq é Garai Gasang nghut é, haû Yhûmsîng Garaî é myìng lé hkya-on kúngtôn kôrâ nghut lhê;
Ngá é byu pé gi, hkâ-nhám le hoq hpû é dum hui kôrâ a nghut lo.
27 Hau htoq agó, Ngò gi, Isira-elaq má nyi nyi é lé le,
Ngò gi, núngmòq é Garai Gasang nghut é, haû Yhûmsîng Garai nghut é lé le,
Ngò mai lai luî gótû a nyi é lé le,
núngmòq sé kôrâ nghut lhê;
Ngá é byu pé gi, hkâ-nhám le hoq hpû é dum hui kôrâ a nghut lo.
Yhûmsîng Garaî é Buìnyì
28 Hau htâng má, Ngò gi, Ngá é Sô lé byù lhúnglhâng bâng é ahtoq má hut gyun râ nghut lhê.
Haû mù, núngmòq é yùqzo byìzô pé gi, myìqhtoi htoi kôrâ;
núngmòq é hpaû mâng pé gi, yhupmòq myàng kôrâ;
núngmòq é zorâm wuì gi, myòqwùp shing-rán pé myàng kôrâ nghut lhê.
29 Buìnyì haú pé má, Ngá é duìnhâng zoshâng hpô pé eq
duìnhâng zoshâng myhî pê é ahtoq má lháng,
Ngò Ngá é Sô lé hut gyun râ nghut lhê.
30 Ngò gi, mauhkûng htoq má le, myigùng htoq má le, maúhpo múzó pé lé,
sui eq, myi eq, myihkau dùm pê èq kut mù tûn shit râ nghut lhê.
31 Haû Yhûmsîng Garaî é kô hkìkhkam é eq gyùq chiq hpo buìnyì a jé shi-má,
buì gi, mauchut byùq, lha-mó gi, sui dùt byùq é hí dùt râ nghut lhê.
32 Haú hkûn, Yhûmsîng Garaî é myìng lé lâng é bang yùq hkangmó gi,
hkyi yu é hui kôrâ nghut lhê.
Hkâsu mù gâ le, haû Yhûmsîng Garai taî tô é eq rajung za,
Zi-un Bùm eq Yerusalem wà mó má,
hkyi xe yù hkyô jòq râ nghut lhê;
haû Yhûmsîng Garai ji yù mù,
nyi myìt gyó tô é bâng chyáng lháng jòq râ nghut lhê.