Maumyî Gam É Hkyô
48
Haû Yhûmsîng Garai taî é gi, “Isira-elaq a-myû up pê é maumyî gàmbùm myìng gi, a-ô mâ é eq rajung za nghut lhê; Dan up gi, maumyî ragàmbùm wó râ nghut lhê; haû gi, mautsûng hkyam shut Hetlon mâ é hkyô châng ló luî, Lebo Hamat jé; haú mai, Hamat eq xoq xoq nghut é Damasikuq é mautsûng maukyo eq Hazara Enan jé nghut ri; haû gi, buìhtoq hkyam mai buìwàng hkyam jé shoq é maukyo nghut lhê.2 Asheri up gi, maumyî ragàmbùm wó râ nghut lhê; haû gi, Dan up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
3 Naphtali up gi, maumyî ragàmbùm wó râ nghut lhê; haû gi, Asheri up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
4 Manase koq gi, maumyî ragàmbùm wó râ nghut lhê; haû gi, Naphtali up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
5 Ehprim koq gi, maumyî ragàmbùm wó râ nghut lhê; haû gi, Manase koq maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
6 Rubin up gi, maumyî ragàmbùm wó râ nghut lhê; haû gi, Ehprim koq maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
7 Yudaq up gi, maumyî ragàmbùm wó râ nghut lhê; haû gi, Rubin up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
8 Yudaq up maukyo yàm mâ é buìhtoq hkyam mai buìwàng hkyam jé shoq lé gi, núngmòq gótû kut hkyin masàt nhông byi ra kôrâ nghut lhê; haû gi, làm hpyang 25000 dúng nghut mù, hîng hpyang lé, buìhtoq hkyam mai buìwàng hkyam jé shoq, a-myû up ra-up é gàmbùm eq rajung za bò râ nghut lhê; sân-yúng jowò gi, maumyî hau é agùng má nghut râ nghut lhê.
9 Haû Yhûmsîng Garai lé núngmòq nhông byi râ maumyî gàmbùm gi, hîng hpyang 25000 dúng bò mù, làm hpyang 10000 dúng bò râ nghut lhê. 10 Haû chyoiyúng é maumyî gàmbùm gi, hkyangjông pê é matú nghut râ nghut lhê. Haû gi, hîng hpyang mautsûng hkyam shut 25000 dúng bò mù, làm hpyang buìwàng hkyam shut 10000 dúng bò luî, làm hpyang buìhtoq hkyam shut 10000 dúng bò mù, hîng hpyang maupyî hkyam shut 25000 dúng bò râ nghut lhê. Hau é agùng má gi, haû Yhûmsîng Garaî é sân-yúng jowò dùt râ nghut lhê. 11 Nhông byî é maumyî haû gi, Ngo lé dójaú é má jujúm nyi é, Zadok é chyoiyúng awùt ashín hkyangjông pê é matú nghut râ nghut lhê; yhángmòq gi, Isira-elaq byu pé hkyô nghoq ló byùq kô é hkûn, Lewiq byu pé su, hkyô nghoq ló byùq é bang a nghut kó. 12 Nhông byî é maumyî haû gi, Lewiq byu pê é maukyo yàm má, hkyangjông pê é matú, mîngdán mâ é chyoiyúng htâng é gàmbùm dùt râ nghut lhê.
13 Hkyangjông pê é maukyo nàm má, Lewiq byu pé gi, hîng hpyang 25000 dúng bò mù, làm hpyang 10000 dúng bo é maumyî wó kôrâ nghut lhê; maumyî haû bànshoq gi, hîng hpyang 25000 dúng, làm hpyang 10000 dúng bo é nghut râ nghut lhê. 14 Yhángmòq gi, maumyî haú lé ge ung zo kôrâ le a nghut, ge htaî pyám kôrâ le a nghut. Maumyî haû gi, mîngdán má je ge é maumyî nghut mù, góyùq lòq má ge htòt byî pyám râ a nghut; hkâsu mù gâ le, maumyî haû gi, Yhûmsîng Garaî é matú chyoiyúng ri.
15 Myìt gyó tô é, làm hpyang 5000 dúng, hîng hpyang 25000 dúng bo é maumyî gi, wà mâ é mâyû byu pê é matú, yhûm kut râ eq mhan nú yô kut râ matú dùt râ nghut lhê. Wà mó gi, hau é agùng má nghut râ nghut lhê. 16 Wà mó é laké gi, mautsûng hkyam shut 4500 dúng, maupyî hkyam shut 4500 dúng, buìhtoq hkyam shut 4500 dúng eq buìwàng hkyam shut 4500 dúng bò ra râ nghut lhê. 17 Wa é matú mhan nú yo é laké gi, mautsûng hkyam shut 250 dúng, maupyî hkyam shut 250 dúng, buìhtoq hkyam shut 250 dúng eq buìwàng hkyam shut 250 dúng bò ra râ nghut lhê. 18 Haû chyoiyúng é maumyî gàmbùm yàm mâ é, buìhtoq hkyam shut 10000 dúng hîng, buìwàng hkyam shut 10000 dúng hing é, myìt gyó tô é maumyî gi, wà eq sêng é nghut mù, haú mai htoq é kyôshi myuishi gi, wà haú má mú zui bâng é matú zoshuq dùt râ nghut lhê. 19 Isira-elaq a-myû up bànshoq mai lé é, wà mâ é mú zui zo bang gi, maumyî hau má ho zo ho shuq ra kôrâ nghut lhê. 20 Gótû kut hkyin htoq tô é maumyî gàmbùm haû bànshoq gi, myi chyûn mâ é nghut luî, myî hkyâm é shut 25000 dúng dúng bò ra râ nghut lhê. Wà eq sêng é maumyî eq rahá, chyoiyúng maumyî gàmbùm haú lé, núngmòq gótû kut hkyin htoq mù, nhông byi ra kôrâ nghut lhê.
21 Haû chyoiyúng é maumyî gàmbùm eq, wà eq sêng é maumyî hé hkyam shí hkyam mâ é maumyî gi, zau hpô é matú nghut râ nghut lhê. Haû gi, chyoiyúng é maumyî gàmbum é buìhtoq hkyam shut 25000 dúng, buìwàng hkyam shut 25000 dúng làm luî, a-myû up ra-up eq ra-up wó yu é eq rajung za, zau hpó le haú lé wó sing yù râ nghut lhê; chyoiyúng é maumyî gàmbùm eq noqkuq yhûm mâ é sân-yúng jowò gi, hau é agùng má nghut râ nghut lhê. 22 Haû mù, Lewiq byu pê é maumyî eq, wà eq sêng é maumyî gi, zau hpô é maumyî agùng má nghut râ nghut lhê; zau hpó eq sêng é maumyî gi, Yudaq up é maumyî eq Ben-yamin up é maumyî gyoro má nghut râ nghut lhê.
23 Myìt gyó tô é a-myû up bâng é matú gi, a-ô mâ é eq rajung za nghut ri; Ben-yamin up gi, maumyî ragàmbùm wó râ nghut lhê; haû gi, buìhtoq hkyam mai buìwàng hkyam jé shoq nghut râ nghut lhê.
24 Sime-on up gi, maumyî ragàmbùm wó râ nghut lhê; Ben-yamin up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
25 Yisahka up gi, maumyî ragàmbùm wó râ nghut lhê; Sime-on up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
26 Zebulun up gi, maumyî ragàmbùm wó râ nghut lhê; Yisahka up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
27 Gat up gi, maumyî ragàmbùm wó râ nghut lhê; Zebulun up maukyo yàm mâ é buìhtoq hkyam mai buìwàng hkyam jé shoq nghut râ nghut lhê.
28 Gat é maupyî hkyam maukyo gi, Tamari mai gyó ló luî, Meriba Kadesha mâ é wuìbúm jé mù, haú mai Egutuq ming mâ é Wuìlàng cháng luî, Medihteri-an Wuimau jé shoq nghut râ nghut lhê.
29 Shî gi, Isira-elaq a-myû up pê é matú silî wunlî maumyî dông hkyîn shosé shê mù, gàm râ maumyî nghut lhê; shí pé gi, yhángmòq é gàmbùm maumyî pé dùt râ nghut lhê.” gâ ri; haû gi, Ahko Ahkáng lhúnglháng wó Sû Yhûmsîng Garai taî pyo ri.
Wà Sik É Hkum Pé
30 Hau htoq agó, “A-ô mâ é gi, wà mai htoq é hkyô pé nghut râ nghut lhê; wà mâ é mautsûng hkyam shut mai hî râ nghut lhê; haû gi, 4500 dúng lam ri; 31 wà hkum pé lé gi, Isira-elaq é a-myû up má cháng luî, myìng myhíng râ nghut mù, mautsûng hkyam shut, Rubin hkum, Yudaq hkum eq Lewiq hkum gâ é sûm hkum hpông tô ri.
32 4500 dúng lam é buìhtoq hkyam shut, Yosep hkum, Ben-yamin hkum eq Dan hkum gâ é sûm hkum hpông tô ri.
33 4500 dúng lam é maupyî hkyam shut, Sime-on hkum, Yisahka hkum eq Zebulun hkum gâ é sûm hkum hpông tô ri.
34 4500 dúng lam é buìwàng hkyam shut, Gat hkum, Asheri hkum eq Naphtali hkum gâ é sûm hkum hpông tô ri.
35 Wà hau é lhînghkyùq lé kê wú le, bànshoq 18000 dúng bò râ nghut lhê.
Haú nyí mai, wà hau é myìng lé,
‘YHÛMSÎNG GARAI HAÚ MÁ NYI RI.’ ga myhíng bekô râ nghut lhê.” le gâ ri.