Nebuhkatneza É Yhupmòq
2
Nebuhkatneza gi, yhang ùp é í zan zàn má, yhupmòq pé myàng mù, myìt nhúngnhâng byùq luî, a wó yhup dùt byùq ri. 2 Haû mù, hkóhkâm hpó gi, yhâng é yhupmòq lichyúm taî kyo râ matú, myòqnghop hpàqchyî kut bang, lòng kat bang, myòqheq hpàqchyî kut bang eq mauhkûng hkyô sê wú bang lé tsing ji yu ri. Yhángmòq gi, wàng mù, hkóhkam é hí má yàp to kô é hkûn, 3 hkóhkâm gi, yhángmòq lé, “Ngò gi, ngo lé nhúngnháng nhang é yhupmòq rahkat myang ri; yhupmòq hau é lichyúm haî nghut é lé ngò sé nau ri.” ga taî ri.4 Haû jáng, mauhkûng hkyô sê wú bang gi, hkóhkâm lé, “Hkóhkâm gi, chyung hîng xê hing nyì sháng gàq! Náng é duìnhâng zoshâng ngá-mòq lé yhupmòq taî kyo laq; haû jáng, ngá-mòq, hau é lichyúm lé hpuq byi râ nghut lhê.” ga tû taî akô.
5 Hkóhkâm gi, mauhkûng hkyô sê wú bang lé, “Ngò shî su nghû myìt hpyit pyám bê nghut lhê; ngò myang é yhupmòq haî nghut é eq hau é lichyúm lé, núngmòq, ngo lé a taî kyo a hpuq kyo kô é nghut jáng, ngò gi, núngmòq lé jàp pyám nhâng mù, núngmòq é yhûm pé lé hkyi bûm dùt byùq nhâng râ nghut lhê. 6 Nghut kôlhang, núngmòq gi, ngo lé yhupmòq taî kyo mù, haú lé hpuq kyo kô é nghut jáng, ngá chyáng mai chyûnghuq pé, shigyaú chyûnghuq pé eq gyai yhang xânghpoq nge wó hkyô wó kôrâ nghut lhê. Haû mù, ngo lé yhupmòq taî kyo luî, hau é lichyúm lé hpuq kyo keq.” ga taî ri.
7 Haú hkûn, yhángmòq gi, “Hkóhkâm gi, yhâng é duìnhâng zoshâng wuì lé yhupmòq taî kyo sháng gàq; haú hkûn, ngá-mòq gi, hau é lichyúm lé hpuq kyo râ nghut lhê.” ga radàm dum tû taî akô nghut ri.
8 Haú hkûn, hkóhkâm gi, “Shí hkyô lé ngò myìt hpyit to bê nghut é lé núngmòq sê kô é yánmai, núngmòq gi, ahkyíng lhoqmyáng nyî kô é za nghut é hkyô lé, ngò hkyak sê ri. 9 Núngmòq, ngo lé yhupmòq haû a taî kyo kô é nghut jáng, núngmòq gi, shí hkyô htaî lhik byùq râ lé myòqbyù mù, ngo lé, hê mhaû taî kyô mhaú, mhô mhaû taî kyô mhaú kut nyî kô é yánmai, núngmòq lé mara dam byi râ hkyô rahkat za ru nghut alô. Haû mù, ngo lé yhupmòq haî nghut é taî kyo keq; haú hkûn, ngá é matú, hau é lichyúm lé núngmòq wó hpuq kyô é lé, ngò sé râ nghut lhê.” ga tû taî ri.
10 Mauhkûng hkyô sê wú bang gi, hkóhkâm lé, “Hkóhkâm taî é hkyô lé wó kut é byù, myìdàm htoq má a nyî! Hkâ-í kô hkìk wum mó bo é hkóhkâm le, myòqnghop hpàqchyî kut bang, lòng kat bang eq mauhkûng hkyô sé bang le, haû su ga a myî wú kô é nghut lhê. 11 Hkóhkam é dangmyi lûm wuî ri. Xângzo byu pê chyáng a nyi é hparà pé za a nghut jáng, ó yùq le haú hkyô lé wó hpuq kyo râ a nghut.” ga tû taî akô nghut ri.
12 Dang hau é yánmai, hkóhkâm gi, nhikjum gyô yo mù, nhikmó-yô lò luî, Babelon wà mó mâ é hpàqchyî bò bang bànshoq lé sat htûm pyám râ hkunmó hkyó bê nghut ri. 13 Haû mù, hpàqchyî bò bang lé sat pyám râ matú, târâ wàng hkunmó htoq bê nghut ri; Dani-elaq eq yhâng é luzúm wuî lé le tsing sat pyám râ matú, hô nhang akô nghut ri.
14 Hkóhkam é wú zúng bâng é zau Ari-ok gi, Babelon wà mó mâ é hpàqchyî bò bang lé sat pyám râ matú htoq e ló é hkûn, Dani-elaq gi, yhang lé, dang ngón dang nguî mai hpàqchyî bo é dông nyò mù, 15 “Hkóhkâm hpó gi, haî mù târâ wàng hkunmó shî han hkyô lhê lhâ?” ga myî ri. Haú hkûn, Ari-ok gi, Dani-elaq lé haú hkyô taî sân kyô ri. 16 Haû nghut mù, Dani-elaq gi, hkóhkam chyáng wàng luî, yhang lé yhupmòq haû wó hpuq kyo râ ahkyíng yù râ matú ahkáng dûng ri.
17 Haû mù, Dani-elaq gi, yhâng é yhûm má taû ló luî, yhâng é luzúm Hanani-a, Misha-ela eq Azari-a pé lé haú hkyô taî sân kyô ri. 18 Yhang gi, Babelon wà mó mâ é hpàqchyî bò bang eq rahá sat pyâm é yhángmòq a hui loshoq, nghop tô é hkyô haû eq séng luî, maúhkung é Garai Gasang mai shogyo nhikmyin hkyô shit râ matú, yhángmòq lé kyûdung ugó lung ri. 19 Haû mù, myín lé, shing-rán má, Dani-elaq lé nghop tô é hkyô haû hpông shit bê nghut ri. Haû mù, maúhkung é Garai Gasang lé Dani-elaq hkya-on kúngton é gi,
20 “Garai Gasâng é myìng gi, ahtum abyùq hkya-on kúngton é huî nyì sháng gàq;
hpàqchyî byéng-yá eq hpungwup a-tsam gi, Yhâng é nghut nyi ri.
21 Yhang gi, ahkyíng eq yàm-yòq lé htaî nyi ri;
Yhang gi, hkóhkâm rayùq lé lhoqhkyô pyám mù, góyùq lé lhoqtoq yu ri.
Yhang gi, hpàqchyî bò sû lé hpàqchyî byéng-yá byi mù,
sê gyô é u-nuq bò sû lé sê hkyang é hpàqchyî byî ri.
22 Yhang gi, nìk dik é hkyô eq nghop tô é hkyô pé lé hpông shit ri;
Yhang gi, mauchut má jòq é bànshoq lé sê é nghut mù,
maubó gi, Yhang eq rahá nghut nyi ri.
23 Ngá é îchyí îwâ pê é Garai Gasang ê, ngò gi, Nang lé jeju bun luî, hkya-ôn lhê ô!
Nàng gi, ngo lé, hpàqchyî byéng-yá eq hpungwup a-tsam byi bê nghut ri;
Nàng gi, ngo lé, ngá-mòq kyûdûng é eq rajung za sé nhâng mù,
hkóhkam é yhupmòq lé lhoqhtoq shit bê nghut ri.” gâ ri.
Dani-elaq Yhupmòq Lé Hpuq Kyô É Hkyô
24 Haû mù, Dani-elaq gi, Babelon wà mó mâ é hpàqchyî bò bang lé sat pyám râ matú, hkóhkam èq wò byî tô é hui sû Ari-ok chyáng ê mù, yhang lé, “Babelon wà mó mâ é hpàqchyî bò bang lé hkâsat pyám. Ngo lé hkóhkam chyáng shuî wang ê àq; ngò, yhang lé, yhâng é yhupmòq é lichyúm hpuq kyo râ nghut lhê.” ga taî ri.
25 Haú hkûn, Ari-ok gi, Dani-elaq lé radá dâm hkóhkam chyáng shuî wang ê mù, “Yudaq byu pé mâ é, shúm zung é bang má, hkóhkam é yhupmòq lichyúm lé wó hpuq kyô é byù rayùq ngo myàng ri.” ga taî ri.
26 Haú hkûn, hkóhkam gi, Beliteshaza le gâ é Dani-elaq lé, “Nàng gi, ngo myang é yhupmòq lé wó taî kyo mù, hau é lichyúm lé wó hpuq kyo râ nghut lhê lhú?” ga myî ri.
27 Haû jáng, Dani-elaq gi, “Hkóhkâm myî é nghop tô é hkyô lé, hpàqchyî bo é bang, lòng kat bang, myòqnghop hpàqchyî kut bang eq bùt hpyit é bang, ó yùq le wó ge taî sân kyo râ a nghut; 28 nghut kôlhang, nghop tô é hkyô pé lé hpông shit é Garai Gasang gi, mauhkûng htoq má nyi lhê. Yhang gi, Hkóhkâm Nebuhkatneza lé, htâng má dùt lò râ hkyô tûn shit bê nghut ri. Nang myang é yhupmòq eq nàng hpyang má lèq tô é hkûn myang é shing-rán gi, shî sû nghut ri.
29 Hkóhkâm ê, nàng gi, lèq tô é hkûn jé lô râ hkyô pé lé myìt nyi é nghut ri; haû nghop tô é hkyô pé lé hpông shit é Sû gi, náng lé, dùt lò râ hkyô tûn shit bê nghut ri. 30 Ngò gi, xângzo byù góbâng htoq má hpàqchyî byéng-yá je bò luî, ngo lé nghop tô é hkyô haû hpông shit é a nghut; nàng hkóhkâm hpó, hau é lichyúm lé wó sé luî, náng é myìt má bo é hkyô lé sê gyo râ matú shèq, ngo lé haú hkyô hpông shit é ru nghut lhê.
31 Hkóhkâm hpó ê, nàng wú nyi é hkûn, gyai kô é alhô zòng ralhum náng é hí má jòq tô é lé, nàng myang ri; alhô zòng haû gi, gyai myhâng mù, bó bó lam lam dùt nyi luî, gyaí wú gyùq nhô zâ é azòng nghut ri. 32 Alhô zòng hau é ulhum gi, hîng gyíng nghut ri; hau é wànggàng eq lòq gi, ngùn nghut ri; hau é wamdau eq tangbaú gi, gyi nghut ri; 33 hau é hkyîbú gi, jòqtoq nghut ri; hau é hkyîwa rahkyam gi, jòqtoq nghut luî, rahkyam gi, tso-myî nghut ri. 34 Nàng wú nyi é u, byu lòq èq kyûng tô é a nghut é, kyûng tô é lùqgòk mó racham gi, jòqtoq rahkyam, tso-myî rahkyam nghut é, alhô zòng hau é hkyî lé lo záng kat é nghut mù, hkyî haû lhoqhkyop pyám byi bê nghut ri. 35 Haû mù, jòqtoq, tso-myî, gyi, ngùn eq hîng pé bànshoq gi, gyòp htên pyám luî, nyé nám lhê é gùq chyârâng mâ é hpuichyap su dùt byùq bê nghut mù, lai èq mùt tâng pyám bê nghut luî, hká má le a myang hô lo nghut ri. Nghut kôlhang, alhô zòng haú lé záng é lùqgòk mó gi, kô myhang é bùm mó dùt lò mù, myìdàm gón lé nghop pyám bê nghut é lé, nàng myang ri.
36 Yhupmòq gi, haû nghut ri; ahkuî, ngá-mòq gi, hkóhkâm nang lé hau é lichyúm hpuq kyo râ nghut lhê. 37 Hkóhkâm hpó ê, nàng gi, hkóhkam pê é hkóhkâm nghut ri. Maúhkung é Garai Gasang gi, nang lé, ùp é ahkáng, hpungwup a-tsam, wum-o a-tsam mó eq hpungwup shingkang pé byi bê nghut ri; 38 Yhang gi, xângzo byù bànshoq lé le, pá pé mâ é tân jung yòsô zè pé lé le, maulat nghoqzô pé lé le, náng é lòq má àp byi bê nghut mù, hká má nyi é lé le, nang lé ùp nhâng bê nghut ri. Nàng gi, hîng ulhum nghut ri.
39 Náng é htâng má, nang lé a hkyit é mîngdán ralhum htoq râ nghut lhê. Hau htâng má, sûm lhum nghû râ gyi mîngdán ralhum htoq lô mù, myìdàm htoq bànshoq lé ùp râ nghut lhê. 40 Ló htáng má, myî lhum nghû râ mîngdán gi, jòqtoq su htan é mîngdán nghut râ nghut lhê; jòqtoq gi, azíng zê bànshoq lé wó lhoqhkyop pyâm é nghut mù, mîngdán haû gi, jung hkangmó lé jòqtoq eq lhoqhkyop hpyi pyâm é su, góbang bànshoq lé lhoqhkyop lhoqhpyi pyám râ nghut lhê. 41 Nàng myang é hkyî eq hkyî-nyhui, rahkyam gi, tso-myî nghut mù, rahkyam gi, jòqtoq nghut é eq rajung za, mîngdán haû gi, gam hkoq byùq é mîngdán dùt râ nghut lhê; nghut kôlhang, jòqtoq má tso-myî nyhô tô é lé nàng myang é eq rajung za, mîngdán haû gi, jòqtoq a-tsam ra-tsuí bò râ nghut lhê. 42 Hkyî-nyhui rahkyam gi, jòqtoq nghut mù, rahkyam gi, tso-myî nghut é eq rajung za, mîngdán haû gi, ra-túm wum bô mù, ra-túm wum nyhóm râ nghut lhê. 43 Jòqtoq gi, tso-myî eq nyhô tô é lé, nàng myang é eq rajung za, byu pé gi, nyhô byùq kôrâ nghut kôle, jòqtoq, tso-myî eq a dàp lhûm é su, rading ralhum za wó dùt nyì kôrâ a nghut.
44 Hkóhkâm haú bâng é i-pyàt pé má, maúhkung é Garai Gasang gi, hkâ-nhám le wó lhoqhten râ a nghut é mîngdán xuq to râ nghut mù, hau é ahkáng ayá gi, gótû byu pê é lòq má wàng râ a nghut. Mîngdán haû gi, gótû mîngdán bànshoq lé lhoqhkyop pyám râ nghut mù, haú pé lé lhoqhtûm pyám râ nghut lhê; mîngdán haû gi, yhâng é yhang ahtum abyùq jòq gîng nyì râ nghut lhê. 45 Nàng myang é ahtoq mâ é, byu lòq èq kyûng tô é a nghut é, kyûng tô é lùqgòk mó gi, bùm mai lêng gyó lo é nghut mù, jòqtoq, gyi, tso-myî, ngùn eq hîng pé lé lhoqhkyop pyâm é lichyúm gi, shî su nghut ri.
Haû gyaú é Garai Gasang gi, hkóhkâm lé, htângnùng má dùt htoq lô râ hkyô tûn shit bê nghut ri. Yhupmòq gi, têng ri; hau é lichyúm gi, lum gíng é nghut ri.” ga taî kyô ri.
46 Haú hkûn, hkóhkâm Nebuhkatneza gi, Dani-elaq é hí má ngóm gòp mù, paî é htâng má, yhang lé, hkungga eq namngón hkungga byi râ matú, hkunmó hkyô ri. 47 Hkóhkâm gi, Dani-elaq lé, “Gè gè yhang, náng é Garai Gasang gi, hparà pê é Garai Gasang; hkóhkam pê é Yhûmsîng eq nghop tô é hkyô pé lé hpông shit Sû nghut ri; hkâsu mù gâ le, nàng gi, nghop tô é hkyô shî lé wó hpông shit ri.” ga taî ri.
48 Hau htoq agó, hkóhkâm gi, Dani-elaq lé, myhang é jowò byi mù, yhang lé chyûnghuq myo myo byi luî, Babelon mau ra-túm gón lé ùp nhâng mù, hpàqchyî bò bang bànshoq lé wú gon râ zau kut nhâng bê nghut ri. 49 Haú hkûn, Dani-elaq gi, Shadrak, Meshak eq Abetnego pé lé, Babelon mau túm mâ é múzó má wò yù nhâng râ matú, hkóhkâm lé dûng tôngbán ri; Dani-elaq gi, hkóhkâm wâng má xoq nyi nyi ri.