Hîng Alhô Zòng Eq Gyúng Nyi É Myi Bunghkyûng
3
Hkóhkâm Nebuhkatneza gi, hkyuq xê dúng myhâng é eq hkyuq dúng lam é hîng alhô zòng saí mù, Babelon mau túm mâ é Dura pá má tsung tô ri. 2 Haû mù, yhang gi, yhang saî tsung tô é alhô zòng haú lé àp nhông poî kut râ matú, ming sûwún wuî, ming zau wuî, mau zau pé, hpàqchyî byi bang, sùt zum bang, târâ agyì pé, wà zau pé eq ming túm pé lé ùp é zau bànshoq lé ji yu ri. 3 Haû mù, ming sûwún wuî, zau wuî, gyèzaû pé, hpàqchyî byi bang, sùt zum bang, târâ agyì pé, wà zau pé eq ming túm pé lé ùp é zau bànshoq gi, Hkóhkâm Nebuhkatneza saî tsung tô é alhô zòng àp nhông poi é matú, lé chôm zing mù, hau é hí má yàp tô bum akô nghut ri.4 Haú hkûn, dang kyo sû gi, “Byù myû wuì eq myíng gótû tû mu é byu pé ê, núngmòq kut râ nghut é hkunmó lé gyo keq. 5 Núngmòq gi, tut, sámpyí, tíng ajung jung pé, tíng góng, baja eq bàt mùt é jûng bànshoq é htê lé wó gyo eq yhang, Hkóhkâm Nebuhkatneza saî tsung tô é hîng alhô zòng lé paî ngóm gòp ra kôrâ nghut lhê. 6 A paî ngóm gòp é sû ó yùq nghut kôle, radá dâm, gyúng nyi é myi bunghkyûng má dú kat pyâm é hui zo râ nghut lhê.” ga garû taî ri.
7 Haû mù, byù myû wuì bànshoq eq myíng gótû tû mu é byu pé gi, tut, sámpyí, tíng ajung jung pé, tíng góng eq bàt mùt é jûng bànshoq é htê lé wó gyo eq yhang, Hkóhkâm Nebuhkatneza saî tsung tô é hîng alhô zòng lé paî ngóm gòp bekô nghut ri.
8 Haú hkûn jáng, mauhkûng hkyô sê wú bang gi, Yudaq byu pé lé mara hûn dang taí râ matú hí shut lé lô kômù, 9 Hkóhkâm Nebuhkatneza lé, “Hkóhkâm gi, chyung hîng xê hing nyì sháng gàq! 10 Nàng hkóhkâm yhang, tut, sámpyí, tíng ajung jung pé, tíng góng, baja eq bàt mùt é jûng bànshoq é htê lé wó gyô é yùq hkangmó gi, hîng alhô zòng lé paî ngóm gòp ra râ nghut mù, 11 a paî ngóm gòp é sû gi, gyúng nyi é myi bunghkyûng má dú kat pyâm é hui râ nghut lhê ga târâ wàng hkunmó hkyô to bê nghut ri. 12 Nghut kôlhang, Babelon mau túm mâ é múzó lé àp byî to huî é Yudaq byù Shadrak, Meshak eq Abetnego pé gi, nàng hkóhkam é dang lé haî su a ngàm kut akô nghut ri. Yhángmòq gi, náng é hparà pé lé le a dójaú kô é htoq agó, nàng saî tsung tô é hîng alhô zòng lé le a noq kó nghut ri.” ga taî akô nghut ri.
13 Haú hkûn, Nebuhkatneza gi, nhikmó gyô yo luî, Shadrak, Meshak eq Abetnego pé lé ê wùt lò râ matú hkunmó hkyô ri. Haû mù, yhángmòq lé hkóhkam é hí má shuî jé wâng bekô nghut ri; 14 haú hkûn, Nebuhkatneza gi, yhángmòq lé, “Shadrak, Meshak eq Abetnego ê, núngmòq, ngá é hparà pé lé a dójaú kô é htoq agó, ngò saî tsung tô é hîng alhô zòng lé le, a noq kó gâ é gi, têng akô lhú? 15 Ahkuî, tut, sámpyí, tíng ajung jung pé, tíng góng, baja eq bàt mùt é jûng bànshoq é htê lé núngmòq wó gyô é hkûn, ngò saî tô é alhô zòng lé paî ngóm gòp râ matú rì rì nghut to bê nghut kôjáng, gyai gê bê. Nghut kôlhang, núngmòq gi, haú lé a paî ngóm gòp kô é nghut jáng, radá dâm, gyúng nyi é myi bunghkyûng má dú kat pyâm é hui bekó râ nghut lhê. Haú hkûn, ngá é lòq mai núngmòq lé hai hparà èq wó hkyi xe yù râ lhú?” ga taî kyuq ri.
16 Haú hkûn, Shadrak, Meshak eq Abetnego pé gi, yhang lé, “Hkóhkâm Nebuhkatneza ê, shí hkyô eq séng luî, náng é hí má ngá-mòq gùng taî hung yù nó a ra. 17 Gyúng nyi é myi bunghkyûng má dú hkyô pyâm é ngá-mòq hui kôlhang, ngá-mòq dójaú nyi é Garai Gasang gi, ngá-mòq lé haú mai wó hkyi xe yù râ nghut lhê; hkóhkâm ê, Yhang gi, ngá-mòq lé, nàng hkóhkam é lòq mai hkyi xe yù râ nghut lhê. 18 Nghut kôlhang, Yhang, ngá-mòq lé a hkyi yù kôle, ngá-mòq gi, náng é hparà pé lé dójaú râ a nghut é htoq agó, nàng saî tsung tô é hîng alhô zòng lé le noq râ a nghut é hkyô lé, nàng hkóhkâm lé sé nhâng nau ri.” ga tû taî akô nghut ri.
19 Haû mù, Nebuhkatneza gi, Shadrak, Meshak eq Abetnego pé lé nhikjum mó yo luî, yhâng é myòqdong htên byùq bê nghut ri. Yhang gi, myi bunghkyûng lé, ayò yo htoq nyhit tú nyé dùq nhâng râ matú dangmó hkyó mù, 20 Shadrak, Meshak eq Abetnego pé lé tuî shung luî, gyúng nyi é myi bunghkyûng má dú hkyô kat râ matú, lòq wum je bo é gyèzô pé ra-am lé hkunmó hkyô ri. 21 Haû mù, yhángmòq sum yuq lé, yhángmòq wùt tô é buhîng pé, ahte lho zo pé, uhtup pé eq gótû mèbu pé le mù tui luî, gyúng nyi é myi bunghkyûng haú má dú hkyô kat bekô nghut ri. 22 Haû hkóhkam é hkunmó gi, lûm htân luî, myi bunghkyûng lûm nyé é yánmai, myishâm gi, Shadrak, Meshak eq Abetnego pé lé wàq dú hâng é bang lé nyé dùq sat pyám bê nghut ri. 23 Haû sum yuq gi, kíng kíng tuî to gù, gyúng nyi é myi bunghkyûng má byìt gyó wang ló bekô nghut ri.
24 Haú hkûn, hkóhkâm Nebuhkatneza gi, maú dân mù, byam toq luî, yhâng é hpàqchyî byi bang lé, “Byù sum yuq lé za ngá-nhúng tui luî, myi má dú hkyô kat é ru nghut lhê, a nghut lhí?” ga myî ri.
Yhángmòq gi, “Hkóhkâm ê, nghut lhê.” ga tû taî akô nghut ri.
25 Haû jáng, hkóhkâm hpó gi, “Wú keq! Byù myi yuq gi, tuî shûng tô é a nghut é za, hai dàm le a dàp é, myihkaû má sô lhing wún é lé, ngò myang ri; myi yuq nghû râ yùq gi, hparà pê é yùqzo su dùt ri.” ga taî ri.
26 Hau htâng, Nebuhkatneza gi, gyúng nyi é myi bunghkyûng yàm má huî ê luî, “Myhang Htáng Garai Gasâng é duìnhâng zoshâng wuì, Shadrak, Meshak eq Abetnego pé ê, htoq lô keq; shî má htoq lô keq ô!” ga wùt garû kat ri.
Haû mù, Shadrak, Meshak eq Abetnego pé gi, myi hkaû mai htoq lô bekô nghut mù, 27 ming sûwún wuî, zau wuî, gyèzaû pé eq hkóhkam é hpàqchyî byi bang gi, yhángmòq é lhînghkyùq má zîng tô bum akô nghut ri. Yhángmòq gi, haû sum yuq é gùngdu pé má dàm a dàp é htoq agó, yhángmòq é xâm rahkat lháng a nyé kuî tô é lé myang akô; yhángmòq é mèbu le a nyé nyhûng byùq é htoq agó, myi shôm lháng a nam é lé le, myang akô nghut ri.
28 Haû mù, Nebuhkatneza gi, “Shadrak, Meshak eq Abetnego pê é Garai Gasang gi, hkungsô wó nyi ri! Yhang gi, Yhâng é maumang lagyo lé nhang kat mù, Yhâng é duìnhâng zoshâng wuì lé hkyi xe yù nhâng bê nghut ri nhung! Yhángmòq gi, yhûmsing é Garai Gasang mai lai luî, gótû hparà pé lé a dójaú a noq kôrâ matú, Yhang lé lùmhkaû mù, hkóhkam é hkunmó lé lu lai luî, yhûmsing é chyungxe lé lháng àp pyám bekô nghut ri. 29 Haû mù, byù myû ra-myû myû nghut nghut, gótû myíng mu é rahú hú nghut nghut, Shadrak, Meshak eq Abetnego pê é Garai Gasang lé htuqhtîng é bang gi, jàp pyâm é hui zo mù, yhángmòq é yhûm pé le, a-pyâng bùm dùt shoq nyhê hkyô pyâm é hui râ nghut lhê nghû ngò hkunmó hkyô lhê; hkâsu mù gâ le, haú dông wó hkyi yu é hparà gótû a nyì nghut ri.” ga taî ri.
30 Haû mù, hkóhkâm gi, Shadrak, Meshak eq Abetnego pé lé, Babelon mau túm má je lhoqtoq to bê nghut ri.