Yerusalem Wà Mó Lhom Hkyùq Tô É Hui Râ Alhô Agàn
4
Ahkuî, byù zo ê, tsohtung rahtung yù mù, náng é hí má to luî, haú má Yerusalem wà mó é alhô kyûng htoq to aq. 2 Hau htâng, wà lhô haú lé lhom hkyuq to râ dông, hau é lhînghkyùq má wàhkûm wam to mù, zùmhtâng saî to luî, gyèzô pé lé hau é hí má lhôm nhang to mù, hau é lhînghkyùq má wà hpyoq râ sikdum mó tô to aq. 3 Hau htoq agó, jòqtoq long yù mù, nàng eq wà hau é gyoro má jòqtoq wàhkûm saî to luî, wà haú shut náng é myòqdong hu to aq. Haû mù, wà haû gi, lhom hkyùq tô é hui râ nghut luî, nàng gi, wà haú lé lhom to râ nghut lhê. Haû gi, Isira-elaq byu pê é matú alhô agàn dùt râ nghut lhê.4 Hau htâng, nàng gi, lòqpaî hkyam shut lèq nghe to mù, Isira-elaq byu pê é mara lé náng é ahtoq má kê to aq. Haú dông, nàng gi, nàng lèq nghe tô é buìnyì gyoro pé má yhángmòq é mara lé wùn wàq to ra râ nghut lhê. 5 Hkâsu mù gâ le, Ngò gi, yhángmòq mara kut shut é zànwut pé eq rajung za, nang lé wò byî to bê nghut mù, nàng gi, Isira-elaq byu pê é mara lé buìnyì 390 nyí wùn wàq râ nghut lhê.
6 Buìnyì haú pé byíng jáng, nàng gi, lòqyo hkyam shut dum lèq nghe to mù, Yudaq byu pê é mara lé myi xê nyí wùn wàq byi râ matú, razan é malaî ra-nyí dông, Ngò, nang lé wò byî to bê nghut lhê. 7 Nàng gi, haû lhom hkyùq to bê nghut é Yerusalem wà mó shut náng é myòqdong hû mù, htim râ lòqbú tu toq to luî, wà haú lé htuqhtîng é myìqhtoi htoi aq. 8 Wú aq; Ngò gi, nàng, wà haú lé wó ban htîm yu é buìnyì byíng shoq, nàng shí shut hé shut a wó lhîng dùt râ matú, tui pê èq nang lé tuî zing to râ nghut lhê.
9 Nàng gi, súngsô, mùk-yó gùq, nùq mó, nùqpup nùq, yó eq lìk pé lé yù mù, yam má tsing kat to luî, haú pé lé náng é matú mùk saí aq. Nàng lèq nghe tô é buìnyì 390 nyí gyoro má haú lé zo ra râ nghut lhê. 10 Nyí wuî zo râ matú zoshuq sum rûng kô kô chîn yù mù, tû tô é ahkyíng pé má haú lé zo aq. 11 Hau htoq agó, ûchyam le rahkyún zo zo hut yù mù, tû tô é ahkyíng pé má shuq ra râ nghut lhê. 12 Nàng gi, zoshuq lé, mùk-yó mùk long lé su zo râ dùt lhê; haú lé gi, shiwa byu é myòq hí má, byu é hkyi-kyuq myî èq bûng yù râ dùt lhê.” gâ ri. 13 Haû Yhûmsîng Garai gi, “Isira-elaq byu pé le, yhángmòq lé Ngò hkat hâng kat é byù myû wui chyáng, haú dông agòt a-u é zoshuq lé zo kôrâ nghut lhê.” ga taî ri.
14 Haú hkûn, ngò gi, “Ahko Ahkáng lhúnglháng wó Sû Yhûmsîng Garai ê! Haú dông a gè; ngò gi, hkâ-nhám le agòt a-û a dùt wú shi ô. Ngò gi, zorâm hkûn mai ahkuî jé shoq, yhang baú shi é lé le, tân jung yòsô ze èq ngàt sat é lé le, hkâ-nhám a zô wú é nghut lhê; htûngli dông a sansêng é sho lé ngá é nhut má hkâ-nhám a kat wú é nghut lhê.” nghû taî é nghut lhê.
15 Haû jáng, Yhang gi, “Ge ri; Ngò gi, nàng lé, byu é hkyi-kyuq èq náng é mùk lé bung nhâng râ malaî, nohkyî èq bung nhâng râ nghut lhê.” ga taî ri.
16 Hau htâng, Yhang gi, ngo lé, “Byù zo ê, Ngò gi, Yerusalem wà mó lé htuqbáng nyi é zoshuq nghu é dumbáng lé lhoqhkyuî pyám berâ nghut lhê. Wà byù wuì gi, myìt myo myìt chiq é mai mùk lé chín luî zo mù, myìt htûm é mai ûchyam lé kê hut shuq kôrâ nghut lhê. 17 Yhángmòq gi, zoshuq eq ûchyam langhpyùt é yánmai, rayùq eq rayùq é hí má gyùq ngha bùm mù, yhûmsing é marâ é yánmai, htûm ló byùq kôrâ nghut lhê.