Garai Gasâng É Mara Dam Byi Uwuq Shâm
5
Ahkuî, byù zo ê, htoq é shâm rahkyam yù mù, uwuq shâm dông kut luî, náng é xâm eq nhutmui lé wùq mù, haú pé lé jang èq chîn gam to aq. 2 Nàng, yhángmòq lé lhom tô é buìnyì byíng jáng, xâm eq nhutmui sum gâmbùm mâ é ragàmbùm lé gi, wàhkaû má nyhê hkyô pyám aq; ragàmbùm lé gi, wà lhînghkyùq má to mù, sham èq zân jàp aq; ragàmbùm lé gi, lai èq mùt tâng ló nhâng àq. Hkâsu mù gâ le, Ngò gi, shâm shê mù, yhángmòq lé châng hkat râ nghut lhê. 3 Nghut kôlhang, xâm eq nhutmui ra-tsuí yù mù, náng é mèbû èq htup to aq. 4 Hau htoq agó, haú mâ é ra-tsuí dum yu htoq mù, myi má du kat luî, nyhê hkyô pyám aq. Haú mai, Isira-elaq a-myû gón lé nyé dàp ló râ nghut lhê.5 Haû Ahko Ahkáng lhúnglháng wó Sû Yhûmsîng Garai shî su ga taî ri; shî gi, byù myû wui é agùng má Ngò xuq tô é Yerusalem wà mó nghut ri; mîngdán pé gi, yhâng é lhînghkyùq má jòq tô ri. 6 Nghut kôlhang, yhang gi, yhâng é awui ayàm mâ é byù myû wuì eq mîngdán pê htoq, yhang kut shut é agè ashop hkyô mai Ngá é târâ pé eq hkunmó pé lé je riyhang lu laî ri. Yhang gi, Ngá é târâ pé lé he-ngìk pyám mù, Ngá é hkunmó pé lé a cháng nghut ri.
7 Haû mù, Ahko Ahkáng lhúnglháng wó Sû Yhûmsîng Garai shî su ga taî ri; núngmòq gi, núngmòq é awui ayàm mâ é byù myû wui htoq je riyhang târâ a chûng kut kômù, Ngá é hkunmó pé lé le, Ngá é târâ pé lé le, a cháng kó nghut ri. Núngmòq gi, núngmòq é awui ayàm mâ é byù myû wui é nyì yàp a-tsáng lháng a hkyit kó nghut ri.
8 Haû mù, Ahko Ahkáng lhúnglháng wó Sû Yhûmsîng Garai shî su ga taî ri; Yerusalem ê, Ngò yhang, nang lé htuqhtíng râ nghut lhê; Ngò gi, gótû byù myû wui é myòq hí má núngmòq lé mara dam byi râ nghut lhê. 9 Ngò gi, náng é achaq achyut é hparà hpôlhô pê é yánmai, nang lé, hkâ-nhám le a kut wú, htâng má le dum kut râ a nghut é mara dam byi râ nghut lhê. 10 Haû nghut é yánmai, náng chyáng, mó wuî gi, zo wuî lé zo, zo wuî gi, mó wuî lé zo kut kôrâ nghut lhê. Ngò gi, nang lé mara dam mó byi mù, náng chyáng nyi myìt gyó tô é bang lé jowò hkangmó shut lhoqpyo hâng pyám râ nghut lhê. 11 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; nàng gi, náng é a sansêng é hparà lhô azòng pé eq agòt a-û hkyô pé bànshoq èq, Ngá é sân-yúng jowò lé agòt a-û kut pyám bê nghut é yánmai, Ngò rû dui nyi é eq rajung za, Ngò gi, nang lé lhoqyom pyám râ nghut lhê; Ngò gi, nang lé shogyo myìt mai wú râ a nghut é htoq agó, nang lé ha bun râ a nghut. 12 Náng é byu pé sum gâmbùm mâ é ragàmbùm gi, wúm mai shi ló bûm mù, náng é ahkaû má mùtmó gyó é hui luî, htûm byùq râ nghut lhê; ragàmbùm gi, wàhkûm pê é shinggan má sham èq sat pyâm é hui kôrâ nghut lhê; ragàmbùm lé gi, jowò hkangmó shut Ngò lhoqpyo hâng kat mù, sham èq châng hkat râ nghut lhê.
13 Haû mù, yhángmòq é yánmai Ngò nhikjum yô é hkyô zîm byùq luî, Ngò nhikmó-yô é hkyô yom ló byùq râ nghut lhê; Ngò nhikmó-yô é hkyô lé yhángmòq chyáng lhoqdìk é hkûn, Ngò, Yhûmsîng Garai gi, nhik-yo naû luî taî é ru nghut é hkyô lé, yhángmòq wó sé kôrâ nghut lhê.
14 Ngò gi, náng é lhînghkyùq mâ é byù myû wui é hí má le, ayàm mai laî ló é bang bànshoq é hí má le, nang lé, chamchyuîyui é jowò eq lùmù gànsang é jowò dùt nhâng râ nghut lhê. 15 Ngò gi, nang lé, nhikjum yo mù, nhikmó-yo luî, htân htân tân mhoq shit é hkûn, nàng gi, náng é lhînghkyùq mâ é byù myû wui chyáng, lùmù gànsâng hkyô, wuìzuì kut pyám hkyô, sidìq byi hkyô eq gyùq chiq hpo dùt râ nghut lhê. Haú hkyô lé Ngò Yhûmsîng Garai taî é nghut lhê. 16 Ngò gi, mùtmó gyó hkyô nghu é, shi byùq nhâng sê é eq lhoqhtên pyám sê é myoshi lé bìk kat é hkûn, núngmòq lé lhoqhtûm pyám râ nghut lhê. Ngò gi, núngmòq chyáng mùtmó je riyhang gyó nhâng mù, núngmòq lé htuqbáng nyi é zoshuq nghu é dumbáng lé lhoqhkyuî pyám berâ nghut lhê. 17 Ngò gi, núngmòq chyáng mùtmó gyó é hkyô eq tân jung yòsô zè pé lé nhang kat râ nghut mù, haú pé gi, núngmòq é awùt ashîn pé lé lhoqhtûm pyám byi râ nghut lhê. Wúm gyó é eq suí shun pyâm é hkyô núngmòq chyáng mai lai râ nghut lhê; Ngò gi, núngmòq chyáng shâm jé nhâng râ nghut lhê. Haú hkyô lé Ngò Yhûmsîng Garai taî é nghut lhê.” gâ ri.