Isira-elaq É Bùm Pé Ihkyùp Mó Hui Râ Hkyô
6
Haû Yhûmsîng Garaî é mungdang ngá chyáng jé é gi, 2 “Byù zo ê, Isira-elaq bùm pé shut myòqdong hû mù, haú pé lé htuqhtîng é myìqhtoi htoi aq; 3 nàng gi, ‘Isira-elaq bùm pé ê, haû Ahko Ahkáng lhúnglháng wó Sû Yhûmsîng Garaî é dang lé gyo keq. Haû Ahko Ahkáng lhúnglháng wó Sû Yhûmsîng Garai gi, bùm pé, kong pé, langhkung pé eq langhkaû pé lé shî su ga taî ri; Ngò gi, núngmòq chyáng shâm jé nhâng berâ nghut mù, núngmòq é myhang é hparà noq jowò pé lé lhoqhtên pyám râ nghut lhê. 4 Núngmòq é kaúgyàp pé gi, lhoqhtên pyâm é hui mù, núngmòq é namngón jung nyhé kaúgyàp pé gi, bàt hkyop pyâm é hui râ nghut lhê; Ngò gi, núngmòq é byu pé lé, núngmòq é hparà hpôlhô pê é hí má sat pyám râ nghut lhê. 5 Ngò gi, Isira-elaq byu pê é màng pé lé, yhángmòq é hparà hpôlhô pê é hí má tô to mù, núngmòq é showui pé lé, núngmòq é kaúgyàp lhînghkyùq má tsing lhoqhkyô to râ nghut lhê. 6 Núngmòq é kaúgyàp pé gi, lhoqhkyop pyâm é eq gyòp zang tô é hui mù, núngmòq é hparà hpôlhô pé gi, bàt hkyop pyâm é eq byòq yèq pyâm é hui luî, núngmòq é namngón jung nyhê é kaúgyàp pé gi, byòq yèq byùq mù, núngmòq saî tô é pé lé bànshoq huî sêng pyám râ matú, núngmòq nyi é jowò hkangmó má, wà pé chamchyuîyuì dùt byùq mù, myhang é hparà noq jowò pé lhoqhtên pyâm é hui râ nghut lhê. 7 Núngmòq é byu pé gi, núngmòq chyáng sat pyâm é hui kôrâ nghut mù, Ngò gi, haû Yhûmsîng Garai nghut é lé núngmòq sé kôrâ nghut lhê.8 Nghut kôlhang, Ngò, byù ra-am lé hkyi xe htoq to râ nghut mù, gó-ming pé eq gótû byù myû wui chyáng núngmòq byo myín wang ló kô é hkûn, núngmòq chyáng mâ é ra-am, shâm mai wó hpang lùt bùm kôrâ nghut lhê. 9 Haú hkûn, Ngá chyáng mai lhing taû ló byùq mù, myi shut làng shut nau é myìt mai le, yhángmòq é hparà hpôlhô pé lé yùt yùt wú ô nau é yhángmòq é myòqjí èq le, Ngo lé hká dông yón kuq nhang é hkyô lé, wó hpang lùt é bang gi, yhángmòq lé shúm ló zûng nhang é byù myû wui chyáng, Ngo lé myìtbun kôrâ nghut lhê; haû mù, yhángmòq gi, yhángmòq kut é agè ashop hkyô eq yhángmòq kut é achaq achyut hkyô bànshoq é yánmai, yhûmsing gùng yhûmsîng chaq pyám kôrâ nghut lhê. 10 Haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê; yhángmòq chyáng shî sû é wuîhke jamjau hpuzo hkyô jé nhâng râ nghû Ngò taî tô é gi, akôm má taî kyuq pyâm é a nghut.
11 Haû Ahko Ahkáng lhúnglháng wó Sû Yhûmsîng Garai shî su ga taî ri; Isira-elaq byu pé kut shut é agè ashop é hkyô eq achaq achyut é hkyô bànshoq é yánmai, “Dingnyé wó ri ô!” nghû, nàng, lòq bàt bàt luî, hkyî nâng htíng aq; yhángmòq gi, shâm, mùtmó gyó é eq wúm gyó é èq shi lêng byùq kôrâ nghut lhê. 12 We má nyì sû gi, wúm èq shi byùq râ nghut lhê; chyáng má nyì sû gi, sham èq shi lêng byùq râ nghut lhê; wuîhke jamjau mai wó lùt luî, nyi myìt gyó to sû gi, mùtmó gyó é eq shi byùq râ nghut lhê. Haú dông, Ngò gi, yhángmòq é ahtoq má Ngá é nhikmó-yo hkyô hut hkyô kat râ nghut lhê. 13 Yhángmòq é kaúgyàp pê é lhînghkyùq mâ é yhángmòq é hparà hpôlhô pê chyáng le, myhang é kong hkangmó eq bùmnyuq pé bànshoq htoq má le, sikkoq hkyâm lam é sikgâm ô hkangmó eq sikhaq nyui yúng é wàqmyòq gàm ô hkangmó nghut é, yhángmòq é hparà hpôlhô pé bànshoq lé namngón jung nhông byî é jang pé má le, yhángmòq é byu pé lé sat lhêng to kô é hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê. 14 Hau htoq agó, Ngò gi, yhángmòq lé htuqhtíng râ matú Ngá é lòq lhâm kat râ nghut mù, yhángmòq nyi tô é jowò bànshoq nghut é, yòso mai Dibila jowò jé shoq chamchyuîyuì lhoqsâ pyâm to râ nghut lhê. Haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.’ nghû taí aq.” gâ ri.