Htûm Byùq Râ Ahkyíng Jé Bê Hkyô
7
Haû Yhûmsîng Garaî é mungdang ngá chyáng jé é gi, 2 “Byù zo ê, Isira-elaq mau lé, haû Ahko Ahkáng lhúnglháng wó Sû Yhûmsîng Garai shî su ga taî ri;‘Htûm byùq bê!
Maumyî myi chyûn má htûm byùq râ ahkyíng jé bê nghut ri!
3 Ahkuî, nàng htûm byùq râ nghut bê;
Ngò gi, Ngá é nhikjum yo hkyô lé náng chyáng hkyô kat râ nghut lhê.
Ngò gi, náng é hkyîzó lòqzó eq rajung za nang lé jéyáng râ nghut mù,
nàng kut é achaq achyut hkyô bànshoq é matú nang lé mara dam byi râ nghut lhê.
4 Ngò gi, nang lé shogyo myìt mai wú râ a nghut;
Ngò gi, nang lé myìt ha râ a nghut.
Ngò gi, náng é hkyîzó lòqzó é matú le,
náng chyáng kut é achaq achyut hkyo é matú le, hkyak nang lé mara dam byi râ nghut lhê.
Haú hkûn, Ngò gi, Yhûmsîng Garai nghut é lé, nàng sé râ nghut lhê.’ gâ ri.
5 Haû Ahko Ahkáng lhúnglháng wó Sû Yhûmsîng Garai shî su ga taî ri;
‘Byò dàn byò sho hkyô ô! Byò dàn byò sho hkyô rahkat ô!
Wú aq; haû jé lo nyì bê nghut ri ô!
6 Htûm byùq hkyô jé bê nghut ri ô!
Htûm byùq hkyô jé bê nghut ri ô!
Nang lé htim râ matú jé bê nghut ri.
Wú aq; haû jé lo nyì bê nghut ri ô!
7 Mau hkaû má nyì sû ê,
ihkyùp mó gi, náng chyáng jé bê nghut ri.
Ahkyíng jé bê nghut ri! Buìnyì chyáng bê nghut ri!
Haû gi, gye pê é garu garín htê jòq mù, bùm pé má gabú hkyô a jòq nghut ri.
8 Ngò gi, Ngá é nhikmó-yo hkyô lé náng chyáng hkyô kat berâ nghut mù,
Ngá é nhikjum yo hkyô lé náng chyáng lhoqdìk râ nghut lhê.
Ngò gi, náng é hkyîzó lòqzó eq rajung za nang lé jéyáng râ nghut mù,
nàng kut é achaq achyut hkyô bànshoq é matú nang lé mara dam byi râ nghut lhê.
9 Ngò gi, nang lé shogyo myìt mai wú râ a nghut;
Ngò gi, nang lé myìt ha râ a nghut.
Ngò gi, náng é hkyîzó lòqzó é matú lé,
náng chyáng kut é achaq achyut hkyo é matú, nang lé ahpau dum byi râ nghut lhê.
Haú hkûn, nang lé bàt kyop é Sû gi, Ngò, Yhûmsîng Garai nghut é lé nàng sé râ nghut lhê.
10 Buìnyì haú lé wú aq!
Wú aq; haû jé lo nyì bê nghut ri!
Ihkyùp mó gi, bùq htoq bê nghut ri;
dumbáng gi, abu bu bê nghut ri;
myìt myhâng nghutbun hkyô gi, abu bu bê nghut ri!
11 Lú lhum bàt zìk hkyô gi,
agè ashop sû lé dam byî é dumbáng dùt bê nghut ri.
Yhángmòq chyáng mai le,
yhángmòq é byù hpûng mó mai le,
yhángmòq é sùtzè pé mai le,
haî lháng myìt gyó to râ a nghut;
yhángmòq chyáng gù bo é hkyô le a jòq lo râ nghut lhê.
12 Ahkyíng jé bê nghut ri!
Buìnyì haû jé bê nghut ri!
Wui yù sû le a gabú sháng gàq;
ung byi sû le a yón sháng gàq;
hkâsu mù gâ le, Ngá é nhikmó-yo hkyô gi,
lhúnglháng bâng chyáng jé to bê nghut lhê.
13 Ung byi sû gi, chyungxe wó dui nyì kôlhang,
ûng kat bê zè lé dum wó taû yù râ a nghut;
hkâsu mù gâ le, lhúnglhâng bang eq sêng é dam byi shing-rán gi,
a dìk byùq é jòq râ a nghut.
Yhûmsing é yubàk marâ é yánmai,
yhûmsing é chyungxe lé wó zuî gîng tô é byù rayùq le a nyì.
14 Yhángmòq gi, tut mùt mù, gyèzè bànshoq hen ge to bekô nghut kôlhang,
byù rayùq le majan shut ê kôrâ a nghut.
Hkâsu mù gâ le, Ngá é nhikmó-yo hkyô gi,
lhúnglháng bâng chyáng jé to bê nghut ri.
15 Shinggan má gi, shâm jòq to mù,
ahkaû má gi, wúm eq mùtmó gyó hkyô jòq tô ri;
yòsô wà pé má nyì bang gi,
sham èq shi byùq kôrâ nghut mù,
wà mó pé má nyì bang gi,
mùtmó gyó é eq wúm gyó é èq htûm byùq kôrâ nghut lhê.
16 Wó hpang lùt é bang gi,
bùm pé shut hpang ê kômù,
langhkaû pé mâ é hpûngkyui pé su,
yhûmsing é yubàk marâ é yánmai,
yùq hkangmó i-myìt nò kying kyîng bùm kôrâ nghut lhê.
17 Lòq hkangmó gi, nyhuî lhâng byùq râ nghut mù,
hkyî lhumjup gi, ishî teq byùq râ nghut lhê.
18 Yhángmòq gi, jimê tû wùt mù,
gyùq chiq hpo lé puq wùt to kôrâ nghut lhê.
Myòqdong bànshoq hoq hpû byùq bùm mù,
ulhum bànshoq wùq pyâm é hui kôrâ nghut lhê.
19 Yhángmòq gi, yhángmòq é ngùnhtung pé lé hkyô pé má dú lheq pyám kôrâ nghut mù,
yhángmòq é hîng lé gi, a sansêng é zè dông sôn pyám kôrâ nghut lhê.
Haû Yhûmsîng Garai nhikmó-yô é buìnyì má,
yhángmòq é ngùn eq hîng gi, yhángmòq lé wó hkyi xe yù râ a nghut.
Haû gi, yhángmòq mara bò shoq myìt lèqbàt nhâng bê nghut é yánmai,
yhángmòq myìt ô nau é lé myìt a wó dìk nhâng râ nghut é htoq agó,
yhángmòq é wamdau lé le wó lhoqpyíng byi râ a nghut.
20 Yhángmòq gi, mhôn yúng lhâng chung jung zè pé má nghutbun kôluî,
haú pé lé chûng mù yhángmòq é achaq achyut hparà hpôlhô pé saî yu bum akô.
Yhángmòq gi, haú pé lé a sansêng é hparà lhô pé saí bekô nghut é yánmai,
Ngò gi, yhángmòq é matú wó sùt hkyô haú lé a sanséng dùt nhâng bê nghut lhê.
21 Ngò gi, yhángmòq é sùtzè pé lé, maigan byu pê é matú wó lú yu é zè dông le,
haú lé agòt a-û kut pyám râ nghut é,
myìdàm htoq mâ é agè ashop bâng é matú wó lú sing yu é zè dông le, byî pyám râ nghut lhê.
22 Ngò gi, byù shí bâng chyáng mai Ngá é myòqdong lhing pyám râ nghut mù,
da-myàq pé gi, Ngá é sùt-púnglhúng jowò lé agòt a-û kut pyám kôrâ nghut lhê.
Yhángmòq gi, haú má wàng luî,
agòt a-û kut pyám kôrâ nghut lhê.
23 Toqjâng pé saí aq!
Hkâsu mù gâ le, mîngdán gi, byù sat sui mara byíng zan to mù,
wà hkaû má gi, lú lhum bàt zìk hkyô byíng zan tô ri.
24 Ngò gi, yhángmòq é yhûm pé lé sing yù râ matú,
byù myû wuì mâ é je agè ashop dik é a-myû lé lhoqhâng yù râ nghut lhê.
Ngò gi, wum-o a-tsam bò bâng é nghutbun myìt lé lhoqhtûm pyám byi râ nghut mù,
yhángmòq é sân-yúng jowò pé gi, agòt a-û dùt byùq râ nghut lhê.
25 Dìk shoq hpu zo hkyô jé é hkûn,
yhángmòq gi, nguì ngón hkyô lé akôm má ho pyám kôrâ nghut lhê.
26 Wuîhke jamjau hpuzo hkyô rahkat htâng rahkat,
danglám rahkûn htâng rahkun htoq lô râ nghut lhê;
haú hkûn, yhángmòq gi, myìqhtoî chyáng shing-rán ê myi kôrâ nghut lhê;
hkyangjong mai târâ mhoq kyô é hkyô nô byùq râ nghut mù,
sûwún wuî hpàqchyî byî é hkyô htûm byùq râ nghut lhê.
27 Haû hkóhkâm hpó gi, iyon yôn ngaù mù,
hkóhkam é yhang zo gi, myìt htum nghu é mèbu wùt râ nghut luî,
mîngdán mâ é byu pê é lòq pé gi, nán bûm kôrâ nghut lhê.
Ngò gi, yhángmòq é hkyîzó lòqzó má cháng mù, yhángmòq lé taû kut luî,
yhángmòq hui zo gíng é eq rajung za, yhángmòq lé jéyáng râ nghut lhê.
Haú hkûn, Ngò gi, Yhûmsîng Garai nghut é lé, yhángmòq sé kôrâ nghut lhê.’ gâ ri.” gâ ri.