Noqkuq Yhûm Má Hparà Hpôlhô Noq Hkyô Jòq É Shing-rán
8
Hkyuq zan zàn, lha-mó hkyuq hkyap ngo nyí nyí má, ngò gi, ngá é yhûm má zung to mù, Yudaq sûwún wuî ngá é hí má zung tô bum é u lé, haû Ahko Ahkáng lhúnglháng wó Sû Yhûmsîng Garaî é lòq gi, ngá chyáng jé ri. 2 Haú hkûn, ngò wú kat le, byù su dùt é azòng lé myang ri. Yhâng é hpyidum mai hkyî túm shut gi, myi su dùt to mù, hpyidum mai ulhum túm shut gi, wìk wìk dùt é jòqtoq su dùq bang tô ri. 3 Yhang gi, lòq su dùt é lé lhâm kat mù, ngá é xâm mai ngo lé lâng she yu ri; Sô gi, ngo lé myìdàm htoq eq mauhkûng gyoro má bún toq yû mù, Garai Gasâng é shing-rán má, ngo lé, Yerusalem wà mó mâ é wânghkaû mautsûng hkyam mâ é hkum má shuî jé ló ri; haú má, Garai Gasang lé nhiksoqsup nhang é hparà lhô jòq tô ri. 4 Haú hkûn, haú má, ngò pá mau má myang é shing-rán mâ é su, Isira-elaq é Garai Gasâng é hpungwup shingkang, ngá é hí má jòq tô ri.5 Haú hkûn, Yhang gi, ngo lé, “Byù zo ê, mautsûng hkyam shut wú kat àq.” ga taî ri. Haû mù, ngò wú kat le, kaúgyàp é mautsûng hkyam hkum má, nhiksoqsup nhâng gâ é hparà lhô jòq tô é lé myang ri.
6 Hau htâng, Yhang gi, ngo lé, “Byù zo ê, yhángmòq haî kut nyi bum é lé nàng a myàng lhú? Isira-elaq byu pé gi, Ngo lé, Ngá é sân-yúng jowò mai we we má hkat kat râ nghut é, achaq achyut dik é múzó pé lé, haú má kut nyi bum akô nghut ri. Nghut kôlhang, nàng gi, hau htoq je riyhang achaq achyut dùt é múzó pé lé lháng myàng shirâ nghut lhê.” ga taî ri.
7 Hau htâng, Yhang gi, ngo lé, wâng hkum má shuî ló ri. Ngò gi, wú kat le, wâng lé wam tô é xêwâm má dong dông tô é lé myang ri. 8 Haú hkûn, Yhang gi, ngo lé, “Byù zo ê, wâng lé wam tô é xêwâm má dû wang ló aq.” ga taî ri. Haû mù, ngò haú má dû wang ló le, hkum rahkum lé myang ri.
9 Hau htâng, Yhang gi, ngo lé, “Wang ló mù, haú má yhángmòq kut nyi é, agè ashop é eq achaq achyut é múzó pé lé wú aq.” ga taî ri. 10 Haû mù, ngò gi, wang e wú le, dô yê é jung lhúnglháng eq a sansêng é gaunyhaú pê é alhô pé le, Isira-elaq byu pê é hparà lhô bànshoq lé le, xêwâm pé bànshoq má kyûng tap to kô é lé myang ri. 11 Haú pê é hí má, Isira-elaq byù myû mâ é sûwún wuî nyhit xê yùq yàp tô é nghut mù, Shahpan é yhang zo Yazani-a le yhángmòq é gyoro má bo yàp tô ri. Yùq hkangmó gi, yhûmsing é lòq má myihkoq tsing chung tô bùm mù, namngón shôm myihkau dùm gi, haú mai htoq nyi ri.
12 Haú hkûn, Yhang gi, ngo lé, “Byù zo ê, Isira-elaq byù myû mâ é sûwún wuî gi, mauchut hkaû má, yhûmsing é hparà zòng yhúmhkaû má haî kut nyî kô é lé, nàng myàng bê a nghut lhú? Yhángmòq gi, ‘Ngá-nhúng lé haû Yhûmsîng Garai a myàng; haû Yhûmsîng Garai gi, mîngdán haú lé tô pyâm to bê nghut ri.’ ga taî akô.” ga taî ri. 13 Hau htoq agó, Yhang gi, “Hau htoq je riyhang achaq achyut dùt é múzó lé lháng, yhángmòq kut nyi é le nàng myàng shirâ nghut lhê.” ga le taî ri.
14 Hau htâng, Yhang gi, ngo lé, haû Yhûmsîng Garaî é yhûm mâ é mautsûng hkum má shuî e é nghut mù, ngò gi, haú má, Tamuza hpara é matú ngaùhkyang sang nyi bum é myiwe wuì lé myang ri. 15 Yhang gi, ngo lé, “Byù zo ê, nàng gi, haú lé myang lhê, a nghut lhú? Hau htoq je riyhang achaq achyut dùt é múzó lé lháng nàng myang shirâ nghut lhê.” ga taî ri.
16 Hau htâng, Yhang gi, ngo lé, haû Yhûmsîng Garaî é yhûm mâ é wânghkaû má shuî wang ló ri; haû noqkuq yhûm mâ é hkum hí, laìshînhtâng eq kaúgyàp gyoro má yùqgè í xe ngo yuq nyi tô bum ri. Yhángmòq gi, haû Yhûmsîng Garaî é noqkuq yhûm shut nùnghtáng hû, buìhtoq hkyam shut yhángmòq é myòqdong hû kut mù, buìhtoq hkyam mâ é buì lé paî gòp nyi bum akô nghut ri.
17 Hau htâng, Yhang gi, ngo lé, “Byù zo ê, haú pé lé nàng myang lhê, a nghut lhí? Yudaq up bang shî má kut nyi bum é achaq achyut é múzó pé gi, tiq ri lhú? Yhángmòq gi, mîngdán má lú lhum bàt zìk hkyô lhoqpyîng é dông, Ngo lé nhikjum lhoqyo nhang nyì râ dùt akô lhú? Wú aq; yhángmòq gi, yhûmsing é nhôdong má sik kyâng chyoi é dông Ngo lé rhoi akô nghut ri. 18 Haû mù, Ngò gi, yhángmòq lé nhikjum yô é mai dàm byi râ nghut lhê; Ngò gi, yhángmòq lé shogyo myìt mai wú râ a nghut é htoq agó, yhángmòq lé ha bun râ le a nghut. Yhángmòq gi, Ngá é nohkyap yâm má wùt garu kôlhang, yhángmòq lé Ngò gyo byi râ a nghut.” ga taî ri.