Hparà Hpôlhô Noq Bang Lé Mara Dam Byî É Hkyô
9
Hau htâng, ngò gi, “Wà shî lé mara dam byi râ bang ê, yhûmsing é shâm lhâm chûng mù, lé lô keq.” ga, htê mó èq Yhang wùt taî é lé wó gyô ri. 2 Haú hkûn, ngò gi, mautsûng hkyam shut hu tô é ahtoq hkum mai, byù hkyuq yùq, lòq má byù sat shâm lhâm chûng luî htoq lé lo é lé myang ri. Yhángmòq eq rahá, nú nhâm é jimê wùt luî, hpyidum má laiká kâ jung chi htuq lhâng chung é byù rayùq le bo htoq lo ri. Yhángmòq gi, wang lò mù, gyi kaúgyàp nàm má yàp tô bum akô nghut ri.3 Haú hkûn, Isira-elaq é Garai Gasâng é hpungwup shingkang gi, hkerubim má jòq tô é mai toq lô mù, noqkuq yhûm mâ é hkumtáng má jé ri. Haú hkûn, Yhang gi, nú nhâm é jimê wùt luî, hpyidum má laiká kâ jung chi htuq lhâng chung é byù haú yùq lé wùt kat ri. 4 Haû mù, Yhang gi, “Yerusalem wà mó má sô lhîng mù, wà hkaû má kut é achaq achyut é múzó bànshoq é yánmai, yón kuq luî, ngaùhkyang sang nyì bâng é ngelang má masàt lhô tap to byi aq.” ga yhang lé taî ri.
5 Ngò gyô nyi le, Yhang gi, haû hkyuq yùq lé le, “Shí yùq é htâng wàhkaû má châng sô lhîng mù, shogyo myìt eq hâ é myìt a bo é za bo châng sat keq. 6 Yùqge mangzô pé lé le, zorâm wuì eq myiwe wuì lé le, înû pé eq zoshâng wuì lé le sat pyám keq; nghut kôlhang, masàt lhô dàp é sû ó yùq lé le hkâzáng kó. Múzó haú lé Ngá é sân-yúng jowò mai hî keq.” ga taî ri. Haû mù, yhángmòq gi, noqkuq yhûm hkun má nyi tô é yùqgè mangzô pé lé hí sat hî bekô nghut ri.
7 Hau htâng, Yhang gi, yhángmòq lé, “Htoq ê keq! Noqkuq yhûm má agòt a-û kut mù, wânghkaû pé má, sat pyám bê nghut é byù màng lhoqpyíng keq.” ga taî ri. Haû mù, yhángmòq gi, htoq ê luî, wà hkaû gón má sat ló bekô nghut ri. 8 Yhángmòq sat nyî kô é hkûn, ngò baú nyi myìt gyó to mù, ngò gi, myòqdong ngóm gòp luî, “Ahko Ahkáng lhúnglháng wó Sû Yhûmsîng Garai ê, Nàng gi, Yerusalem wà mó má Náng é nhikmó-yo hkyô hut hkyô kat é hkûn, wó nyi myìt gyó tô é Isira-elaq byù bànshoq lé lhoqhtûm pyám râ nghut lhê lhú ô?” nghû wùt garû ngau é nghut lhê.
9 Haú hkûn, Yhang gi, “Isira-elaq up bang eq Yudaq up bâng é yubàk mara gi, mara mó dùt byùq bê nghut ri; mîngdán má gi, byù sat sui byíng zan to mù, wà hkaû má gi, târâ a chûng hkyô byíng zan tô ri. Hkâsu mù gâ le, ‘Haû Yhûmsîng Garai gi, mîngdán lé tô pyâm to bê nghut ri; haû Yhûmsîng Garai gi, myàng râ a nghut.’ ga yhángmòq taî akô nghut ri. 10 Haû mù, Ngò gi, yhángmòq lé shogyo myìt shit râ le a nghut, ha bun râ le a nghut; Ngò gi, yhángmòq kut é eq rajung za, yhángmòq é ulhum htoq má yhang lató hpuq râ nghut lhê.” ga ngo lé tû taî ri.
11 Haú hkûn, nú nhâm é jimê wùt luî, hpyidum má laiká kâ jung chi htuq lhâng chung é sû gi, “Nàng hkunmó hkyô é eq rajung za ngò kut bê nghut lhê.” ga hkyang lo taû shit ri.