Yerusalem Wà Mó Htên Gyop Byùq É Hkyô
52
Zedeki-a gi, chyungxe zànwut í xe razàn má hkóhkâm dùt mù, Yerusalem wà mó má raxe razàn ùp ri. Yhâng nu gi, Lipna wà mó mâ é Yeremi-aq é yhang zo byìzo Hamutala nghut ri. 2 Yhang gi, Yehoi-akim kut é eq rajung za, haû Yhûmsîng Garaî é myòq hí má agè ashop é hkyô kut ri. 3 Haû mù, haû Yhûmsîng Garai gi, Yhâng é myòq hí mai byu pé lé hkat htoq pyâm é buìnyì jé shoq, nhikjum yô nyi é yánmai, Yerusalem wà mó eq Yudaq mau má shí hkyô pé bànshoq dùt htoq é nghut ri.Ahkuî, Zedeki-a gi, Babelon hkóhkâm lé gumlau toq ri.
4 Haû mù, Zedeki-a ùp é gaú zan zàn, lha-mó raxê hkyap, raxê nyí nyí má, Babelon hkóhkâm Nebuhkatneza gi, yhâng é gyè hpúng gón eq rahá Yerusalem wà mó lé lé htim luî, wà shinggan má wàp xuq mù, wàhkûm lhînghkyùq má zùmhtâng saî tap tô ri. 5 Hkóhkâm Zedeki-a ùp é raxe razan zàn jé shoq, wà lhînghkyùq má lhom tô akô nghut ri.
6 Haû lha-mó myi hkyap hkyap, gau nyí nyí, wà hkaû má mùtmó góng gyó é nghut mù, mingbyû wuì zo râ zoshuq a jòq lo nghut ri. 7 Haú hkûn, wà haú lé Babelon byu pê èq lhom hkyuq to kôlhang, gyèzô pé lhúnglháng gi, wàhkûm hput htông yù mù, myín lé, hkóhkâm hpô é hkyâm yàm mâ é wàhkûm í lhûm é gyoro mâ é hkum mai hpang htoq ló kômù, Araba pá shut hpang e ló akô nghut ri. 8 Nghut kôlhang, Babelon gyèzô pé gi, hkóhkâm Zedeki-a lé châng hkat kôluî, Yerihko pá má yhang lé ê châng hkyit kôjáng, yhâng é gyèzô pé bànshoq gi, yhâng chyáng mai hpang gâng ló kômù, byo myín byùq bekô nghut ri; 9 Zedeki-a gi, chyup yu é hui bê nghut ri.
Yhang lé gi, Hamat mau mâ é Ribala wà má nyi tô é Babelon hkóhkam chyáng shuî ló byi kô é nghut mù, haú má yhang lé târâ lhom jéyáng ri. 10 Babelon hkóhkâm gi, Ribala wà má, Zedeki-a é yhang zô pé lé, yhâng é myòq hí má yhang sat pyám mù, Yudaq zaugun wuì bànshoq lé le sat pyâm ri. 11 Hau htâng, yhang gi, Zedeki-a é myòqjí lé choq pyám byi mù, gyi kyum hut byi luî, Babelon wà mó má shuî ló mù, shi byùq é hkûn jé shoq yhang lé htóng má lhûng tô ri.
12 Babelon hkóhkâm Nebuhkatneza ùp é raxe gaú zan zàn, lha-mó ngo hkyap hkyap, raxê nyí nyí má, Babelon hkóhkâm lé dójaú nyi é chyungxe zúng zau Nebuzaradan gi, Yerusalem wà mó má lé jé ri. 13 Yhang gi, haû Yhûmsîng Garaî é noqkuq yhûm lé le, hkóhkâm wâng lé le, Yerusalem wà mó mâ é ahkyàk é yhûm mó bànshoq lé le, nyhê hkyô pyâm ri. 14 Chyungxe zúng zau hpó shuî-û é Babelon gyèzô pé lhúnglháng gi, Yerusalem wà mó lhînghkyùq mâ é wàhkûm pé bànshoq lé lhoqhpyoq pyâm akô nghut ri. 15 Chyungxe zúng zau Nebuzaradan gi, wà mâ é je myung é byù ra-am lé le, wà má nyi myìt tô é bang lé le, lòqmú kung bang lé le, Babelon hkóhkam htâng dàp byùq é bang lé le, shúm dông shuî ló nhâng bê nghut ri. 16 Nghut kôlhang, Nebuzaradan gi, tsibyiq hkyâm pé eq yò pé saí râ matú, haú mau mâ é je myung é byu pé lé nyhi hkyô tô ri.
17 Babelon byu pé gi, haû Yhûmsîng Garaî é noqkuq yhûm mâ é gyi zîng pé lé le, zìng hkyî tsûngjang pé eq gyi lànghkang mó lé le, lhoqhkyop pyám kômù, gyi haú pé bànshoq lé Babelon wà mó shut yu ló akô nghut ri. 18 Hau htoq agó, yhángmòq gi, au pé, gòt zè pé, nyàp pé, hkoq mó pé, gòmhtung pé eq noqkuq yhûm má chung é gyi zèhkoq bànshoq lé le yu ló akô nghut ri. 19 Chyungxe zúng zau hpó gi, hîng eq ngun èq saî é, lànghkang zo pé, namngón shôm nyhê é myihkoq pé, hkoq mó pé, au pé, myi-kok tsûngjang pé, gòmhtung pé eq shuq jung hkungga pê é matú chung é hkoq pé lé le, yu ló ri.
20 Haû Yhûmsîng Garaî é noqkuq yhum é matú hkóhkâm Sholumon saî tô é zìng í zîng, lànghkang mó eq hau é a-ô mâ é gyi nohtó lhô raxe í lhum eq wó huî htòt é tsûngjang pé mâ é gyi pé gi, a ung chín loshoq myô ri. 21 Zìng hkangmó gi, raxe shit dúng dúng myhâng mù, ko hpyang raxe í dúng dúng bò luî, ahkaû má dông é nghut mù, lòq myî shi shi htu ri. 22 Razìng mâ é gyi ahpyo gi, ngo dúng myhâng luî, hau é lhînghkyùq má tuijâng tap mù, tuijâng má gyi lungshi cham pé tsing lhâng byau tô bum ri. Zìng gózîng le, haû eq rajung za nghut mù, lungshi cham pé tsing lhâng byau tô bum ri. 23 Zìng myî hkyam shut má lungshi gaú xe hkyuq cham lhâng tô ri; tuijâng htoq lhînghkyùq má lhâng tô é lungshi cham bànshoq gi, rashô cham nghut ri.
24 Chyungxe zúng zau Nebuzaradan gi, hkyangjong agyì Serai-a, yhâng a-ô mâ é hkyangjong Zehpani-a eq hkum zúng bang sum yuq lé chyup yu ri. 25 Yhang gi, wà má nyi é gyè zan bâng é zau hpó lé le, hkóhkam é hpàqchyî byi bang nyhit yùq lé le, haú mau mâ é byu pé lé jihpán gùq é gyè jum é zau hpó lé le, wà hkaû má myang é byù hkyuq xê yùq lé le, shuî yu ri. 26 Zau hpó Nebuzaradan gi, yhángmòq bànshoq bang lé, Ribala wà má nyi é Babelon hkóhkam chyáng shuî ló byî ri. 27 Hkóhkâm hpó gi, Hamat mau mâ é Ribala wà má yhángmòq lé sat pyám nhang ri.
Haû mù, Yudaq byu pé gi, yhángmòq é mau mai shúm zung é hui bekô nghut ri. 28 Nebuhkatneza èq shúm byû kut yu é byù jihpán gi, a-ô mâ é eq rajung za nghut ri; yhang ùp é nyhit zan zàn má, 3023 yuq shuî yu ló ri; 29 yhang ùp é raxe shit zan zàn má, Yerusalem wà mó mai 832 yùq lé shuî yu ló ri; 30 yhang ùp é í xe súm zan zàn má, chyungxe zúng zau Nebuzaradan èq Yudaq byù 745 yuq lé shuî yu ló ri. Byù du bànshoq gi, 4600 yùq bo ri.
Yehoi-ahkin Lé Nhang Htoq Kat É Hkyô
31 Yudaq hkóhkâm Yehoi-ahkin shúm zung é súm xe nyhit zan zàn, Awela Marodak, Babelon hkóhkâm dùt é zàn, lha-mó raxe í hkyap hkyap, í xe ngo nyí nyí má, yhang gi, Yudaq hkóhkâm Yehoi-ahkin lé shogyo myìt shit mù, htóng mai nhang htoq kat ri. 32 Yhang gi, Yehoi-ahkin lé dang ngón nyò mù, Babelon wà má yhang eq rahá nyi é gótû hkóhkam pê htoq myhang é, xânghpoq nge wó tángmyhâng byî ri. 33 Haû mù, Yehoi-ahkin gi, htóng mèbu lé htaî pyám luî, yhâng é i-pyàt htum shoq hkóhkam é zangbó má bo myàng zô nyì bê nghut ri. 34 Babelon hkóhkâm gi, Yehoi-ahkin nyí wuî râ é zoshuq lé tû to mù, yhang shi byùq é buìnyì jé shoq hkâ-nhám le gàm byî nyi ri.