Jujúm Myìt A Bo É Isira-elaq Byu Pé
3
Byù rayùq gi, yhâng é yhûmsîng myhí lé lhoqkâng pyâm é nghut mù,myiwe myhí haû gi, gâng ló luî, yùqgè góyùq eq hâng lhûm é nghut jáng,
byù haú yùq gi, myiwe myhí haú lé wó dum gùq yù râ lhú?
Haû su kut é mîngdán gi, agòt a-û dùt râ a nghut lhú?
Nghut kôlhang, nàng gi, shiwa myhí dông, nàng chyit é bang myo myo eq zùm yàp pyám bê nghut ri.
Haû su nghut kôle, nàng gi, Ngá chyáng wó lhing taû lo lhê lhú?” ga,
haû Yhûmsîng Garai taî pyo ri.
2 Hau htoq agó, “Myhang é dánpyut kong pé má tu wú kat àq;
nàng myi shut làng shut hkyô kut mù, a lèq é jang hká má jòq ri lhú?
Nàng gi, yòso mâ é Arabi byu pé su,
hkyô yàm má, nàng eq chyit lhûm é bang lé láng zung tô é nghut ri.
Nàng gi, náng é gùngsho zùm yàp hkyô eq agè ashop hkyô pê é yánmai,
ra-mau gón lé agòt a-û kut pyám bê nghut ri.
3 Haû mù, zàn a wang byùq é eq
ló htâng é mau a wo byùq dùt é nghut ri.
Nghut kôlhang, nàng gi, shiwa myhî é ngelang dàp mù,
ngegáng htu byùq bê nghut ri.
4 Nàng gi, Ngo lé,
‘Ngá wa ê, Nàng gi, ngò sak rám hkun lhê é luzúm nghut lhê.
5 Nàng gi, ngo lé ayang nhikjum yô nyì râ lhú?
Náng é nhikmó-yo hkyô gi, ahtum abyùq jòq nyì râ lhú?’ ga ahkuî za taî é a nghut lhí?
Nghut kôlhang, nàng gi, agè ashop hkyô bànshoq lé
wó kut é myhó kut bê nghut ri mhaî.” ga le taî pyo ri.
Isira-elaq Eq Yudaq Myìt Lhîng Wó Râ Dùt É Hkyô
6 Hkóhkâm Yosi-a ùp é u lé, haû Yhûmsîng Garai gi, ngo lé, “A jujúm é Isira-elaq a-myû kut é hkyô lé nàng myàng bê, a nghut lhí? Yhángmòq gi, myhang é bùm hkangmó má dòq ê mù, sikkoq hkyâm lam é sikgâm ô hkangmó má le, myi shut làng shut hkyô kut bekô nghut ri. 7 Shí hkyô pé bànshoq lé yhángmòq kut é htâng má, yhángmòq, Ngá chyáng lhing lò râ nghut lhê nghû Ngò myìt kôlhang, yhángmòq a lhing lò kó nghut ri; a jujúm é yhángmòq é gu-nhá Yudaq le, haú lé myàng bê nghut ri. 8 Ngò gi, a jujúm é Isira-elaq lé, yhángmòq é myi shut làng shut hkyô bànshoq é yánmai, lhoqkang laiká ká byi luî, nhang pyám bê nghut kôlhang, yhángmòq é a jujúm é gu-nhá Yudaq gi, a gyùq shi nghut é hkyô lé Ngò myang ri; yhang le, htoq ê mù, myi shut làng shut hkyô kut bê nghut ri. 9 Isira-elaq gi, mehpye hpye hkyô lé haî su a ngàm kut é yánmai, mîngdán lé agòt a-û kut pyám luî, lùqgòk eq sikhtung pé lé noq é dông myi shut làng shut hkyô kut bekô nghut ri. 10 Haú hkyô pé bànshoq jòq to kôlhang, a jujúm é yhángmòq é gu-nhá Yudaq gi, i-myìt nhiklhum bànshoq èq a nghut é za, i-myìt goí é dông Ngá chyáng lhing lo ri.” ga taî ri; haû gi, Yhûmsîng Garai taî pyo ri.
11 Haû Yhûmsîng Garai gi, ngo lé, “Lùmjíng myìt a bò lô é Isira-elaq gi, a jujúm é Yudaq htoq díngmán ri. 12 Ê mù, mautsûng shut hû luî, shî su nghû taî pyô aq;
‘Lùmjíng myìt a bò lô é Isira-elaq ê, lhing taû lò àq.’ nghû àq; haû gi, Yhûmsîng Garai taî pyo ri.
‘Ngò gi, nang lé nhik-yô nyì râ a nghut;
hkâsu mù gâ le, Ngò gi, jujúm Sû nghut lhê.’ nghû àq; haû gi, Yhûmsîng Garai taî pyo ri.
‘Ngò gi, nang lé ahtum abyùq nhikjum yô nyì râ a nghut.
13 Nàng gi, náng é Garai Gasang nghut é, haû Yhûmsîng Garai lé gumlau toq mù,
sikkoq hkyâm lam é sikgâm ô hkangmó má,
gó-mîng é hparà pé lé châng hkat ho gó wún luî,
Ngá é jì-no a gyo kut é hkyô lé za yín yû àq.’ nghû àq.” ga le taî pyo ri;
haû gi, Yhûmsîng Garai taî pyo ri.
14 Hau htoq agó, “Lùmjíng myìt a bo é byu pé ê, taû lhing lò keq.” ga le, haû Yhûmsîng Garai taî pyo ri. Hau htoq agó, “Hkâsu mù gâ le, Ngò gi, núngmòq é yhûmsîng hpó nghut lhê. Ngò gi, wà rawà mai byu rayùq, a-myû koq rakoq mai byù í yùq hkyin yù mù, Zi-un wà mó má shuî ló râ nghut lhê. 15 Haû mù, Ngò gi, hpàqchyî bo é eq sê gyô é u-nuq bo é mai núngmòq lé shuî-u râ nghut é, Ngò nhik htûng é sau zúng bang lé, núngmòq é lòq má àp byi râ nghut lhê. 16 Haú yòq haú bun lé, mîngdán haú má núngmòq é byù du gyai yhang myô jàt lò râ nghut lhê.” ga haû Yhûmsîng Garai taî pyo ri. Hau htoq agó, “Haú hkûn, byu pé gi, ‘Haû Yhûmsîng Garaî é dangshikaq sàksé dò.’ ga taí kôrâ a nghut lo. Haú lé, ó yùq le myìt má kat to râ a nghut lo; ó yùq le myìt tuî nyì râ a nghut lo; ó yùq le dum saî saí râ a nghut lo. 17 Haú u lé, yhángmòq gi, Yerusalem wà mó lé, haû Yhûmsîng Garaî é hkóhkâm Tángmyhâng ga kôrâ nghut mù, a-myû bànshoq bang gi, haû Yhûmsîng Garaî é myìng lé hkúngga hpautap râ matú, Yerusalem wà mó má lé zùp zing kôrâ nghut lhê. Yhángmòq gi, yhûmsing é agè ashop é myìt mai shuî lhoqnghoq ló é shut cháng kôrâ a nghut lo. 18 Haú buìnyì pé má, Yudaq byu pé gi, Isira-elaq byu pê chyáng lé xoq mù, yhángmòq bànshoq bang rahá, mautsûng mau mai, silî wunlî dông Ngò núngmòq é îchyí îwâ pé lé byî tô é mau má lé jé kôrâ nghut lhê.
19 Ngá gûng Ngò,
‘Ngò gi, hkâ-í yhang gabú é myìt mai, núngmòq lé Ngá zô pé dông kut yû nau é nghut mù,
a-myû wuì bànshoq htoq mâ é je ge é silî wunlî maumyî nghut é,
nyì ngón yùqyo é mîngdán, núngmòq lé byí nau é nghut lhê.’ nghû myìt yu é nghut lhê.
Ngò gi, núngmòq, Ngo lé, ‘Âwa’ ga wùt mù,
Ngá htâng châng nyì kô é mai a lhing ló byùq kôrâ nghû myìt yu é nghut lhê.
20 Nghut kôlhang, myiwe rayùq, yhâng é yhûmsîng hpó lé sidìq a zung é su,
Isira-elaq byù núngmòq gi, Ngo lé sidìq a zùng kó nghut ri.” ga,
haû Yhûmsîng Garai taî pyo ri.
21 Dánpyut kong pé má, Isira-elaq byu pé wùt ngau nyi é eq
dûng tôngbán nyi bùm kô é htê lé, Ngò wó gyô ri.
Hkâsu mù gâ le, yhángmòq gi, gyai yhang hkyô nghoq byùq kômù,
yhángmòq é Garai Gasang nghut é, haû Yhûmsîng Garai lé tô-myhî pyám bekô nghut ri.
22 “Lùmjíng myìt a bo é bang ê, lhing taû lò keq;
núngmòq a nghut é shut lhîng taû ló é hkyô lé, Ngò yâ gè byi râ nghut lhê.” ga,
haû Yhûmsîng Garai taî pyo ri.
Haú hkûn, “Ge rô! Ngá-mòq, Náng chyáng lé râ nghut lhê;
hkâsu mù gâ le, Nàng gi, ngá-mòq é Garai Gasang nghut é, haû Yhûmsîng Garai nghut ri.
23 Gè gè yhang, kong pé má gi, hparà lé noq é garu htê htoq luî,
bùm pé má gi, mhaú zo mhaú shuq é htê htoq nyi ri;
gè gè yhang, Isira-elaq byu pê é hkyi yù hkyô gi,
ngá-mòq é Garai Gasang nghut é, haû Yhûmsîng Garaî chyáng nghut nyi ri.
24 Ahoq ahî hkyô nghut é hparà pé gi,
ngá-mòq é îchyí îwâ pé zui saî shi-kùt é ashi pé nghut é,
yhángmòq é sau bainám hpúng pé, no hpúng pé,
yhángmòq é yùqzo byìzô pé lé,
ngá-mòq chyungxe zànwut rám é hkûn mai lhoqhtûm pyám bê nghut ri.
25 Ngá-mòq gi, hoq dik é eq lèq tô é nghut mù,
hoq hpu hkyô gi, ngá-mòq lé nghop pyám sháng gàq.
Ngá-mòq eq ngá-mòq é îchyí îwâ pé gi,
ngá-mòq é Garai Gasang nghut é, haû Yhûmsîng Garai lé mara kut shut bekô nghut ri;
ngá-mòq gi, chyungxe zànwut rám ashî hkûn mai hkû-nyí jé shoq, ngá-mòq é Garai Gasang nghut é,
haû Yhûmsîng Garaî é jì-no a gyo kut pyám bê nghut lhê.” ga tû taî akô.