4
“Isira-elaq a-myû ê, nàng lhing taû lò râ nghut jáng,Ngá chyáng lhing taû lò àq.” ga,
haû Yhûmsîng Garai taî pyo ri.
Hau htoq agó, “Náng é achaq achyut é hparà hpôlhô pé lé,
Ngá é myòq hí mai tô pyám mù, hkyô a nghoq lo râ nghut jáng,
2 tengmán é hkyô, târâ ràp-rá é hkyô eq díngmán é hkyô má,
nàng, ‘Haû Yhûmsîng Garai rû dui nyì nyì.’ nghû dâkam é nghut jáng,
gótû a-myû wuì gi, Yhâng é myìng lang luî yhûmsing gùng yhûmsîng shimân byi kôrâ nghut mù,
Yhang lé lùm luî nghutbun kôrâ nghut lhê.” ga le taî ri.
3 Haû Yhûmsîng Garai gi, Yudaq eq Yerusalem byu pé lé shî su ga taî ri;
“Núngmòq hâm tô é maumyî lé dum hpuq keq;
zu yô má kyó hkâhkyó kó.
4 Yudaq byu pé eq Yerusalem wà mó má nyi é bang ê,
haû Yhûmsîng Garaî é matú yhûmsing gùng yhûmsîng ahpyo-kuq hpyit keq;
núngmòq é i-myìt nhiklhum má ahpyo-kuq hpyit keq;
haû a nghut jáng, núngmòq kut é agè ashop hkyo é yánmai,
Ngá é nhikmó-yo hkyô gi, myi su htoq lô mù,
ó yùq le a wó lhoqjôm pyám loshoq nyé gyó râ nghut lhê.
Mautsûng Shut Mâ É Byò Dàn Byò Sho Hkyô
5 ‘Ra-mau gón tut mùt myhíng keq!’ nghû,
Yudaq mau má shit kyo mù, Yerusalem wà mó má taî pyô luî,
‘Rahá chôm zing keq!
Gingtîng é wà mó pé shut hpang ê sháng!’ nghû htê mó èq taí keq.
6 Zi-un Bùm shut ê râ matú donghkón tu shap keq!
A nô nyi é za wó lùt râ matú hpâng keq!
Hkâsu mù gâ le, Ngò gi, mautsûng hkyam mai,
gyùq chiq hpo htên byòq hkyô mó nghut é,
byò dàn byò sho hkyô lhoqhtoq kat râ nghut lhê.” gâ ri.
7 Byù myû wuì lé lhoqhten lhoqhpyoq râ nghut é,
hkanghkyi nghû sû gi, yhâng é hkyûng mai htoq lô bê nghut ri.
Yhang gi, náng é maumyî lé chamchyuîyuì kut pyám râ matú,
yhâng é jowò mai htoq lé bê nghut ri.
Náng é wà pé gi, ó a nyì byùq loshoq htên byòq to râ nghut lhê.
8 Haû mù, jimê tu wùt luî,
ngaùhkyûng ngaùyang kut mù, yón ngau nyì keq;
hkâsu mù gâ le, haû Yhûmsîng Garaî é nhikmó-yo hkyô gi,
ngá-nhûng chyáng mai a lhing taû ló byùq shi nghut ri.
9 “Haú buìnyì má, hkóhkâm eq zaugun wuì gi,
myìt htûm byùq kôrâ nghut lhê;
hkyangjông pé gi, gyùq ngha byùq bùm mù,
myìqhtoî pé gi, maú hong byùq kôrâ nghut lhê.” ga,
haû Yhûmsîng Garai taî pyo ri.
10 Haú hkûn, ngò gi, “Ahko Ahkáng lhúnglháng wó Sû Yhûmsîng Garai ê! Shâm gi, ngá-mòq é lìngzing má nghut tô é hkûn, ‘Núngmòq nguì ngón yùqyò kôrâ nghut lhê.’ ga Nàng taî é dông, byù shí bang eq Yerusalem wà mó mâ é bang lé hkâ-í yhang mhaú zô pyám bu-nhung!” nghû taî é nghut lhê.
11 Haú u lé, byù shí bang eq Yerusalem wà mò mâ é bang eq séng luî taî é gi, “Yòso mâ é dánpyut kong pé mai, Ngá é byu pê chyáng hkyíng hkyíng nyé é laì lò râ nghut lhê; nghut kôlhang, haû gi, gùqhkyó râ eq lhoq sanséng râ matú lo é laì a nghut. 12 Hau htoq je htan é laì Ngá chyáng mai lò râ nghut lhê. Ahkuî, Ngò, yhángmòq lé târâ jéyáng râ nghû taî htoq kyô lhê.” gâ ri.
13 Wú aq! Yhang gi, mhut su jé râ nghut lhê;
Yhâng é gyèlhêng gi, laìlhíng su lé lo ri;
Yhâng é myang pé gi, zùn pê htoq wó yang ri.
Ngá-nhúng gi, dingnyé wó ri! Lhoqhten lhoqhpyoq é hui bê nghut ri ô!
14 Yerusalem ê, nàng hkyi yu é hui sháng gàq,
náng é myìt mâ é agè ashop hkyô lé chî hkyô pyám aq.
Náng é agè ashop é myìt gi, náng chyáng hkâ-myháng jé shoq lúng to râ lhú?
15 Dan mau mai shit kyô é htê htoq mù,
Ehprim mau mai byò dàn byò sho hkyô lé taî pyo myhîn é gi,
16 “Byù myû wuì lé shí hkyô taî kyo mù,
Yerusalem eq séng luî shî su nghû taî pyô keq;
‘Wú keq; htîm lóm râ gye pé gi, mau we mai lé lô mù,
Yudaq mau mâ é wà pé lé majan zan râ matú garû bum akô nghut ri.
17 Yudaq mau gi, Ngo lé gumlau toq é yánmai,
yhángmòq gi, yò zúng é bang su, haú mau lé lóm tô akô nghut ri.’ nghû keq.” gâ ri.
Haû gi, Yhûmsîng Garai taî pyo é nghut ri.
18 Hau htoq agó, “Nàng kut é hkyô eq náng é hkyîzó lòqzó pê é yánmai,
haú hkyô lé nàng hui zô é nghut ri.
Haû gi, nàng hui zô é mara dàm nghut ri.
Haû gi, hkâ-í yhang kô ri myhî-nhung!
Haû gi, náng é i-myìt má yhang htaû ròt tô ri nhung!” ga taî pyo ri.
19 Dik shoq hpuzô rô! Dik shoq hpuzô rô!
Ngá é myìt hkaû má no hpuzô nyi ri ô!
Ngá é i-myìt nhiklhum gi, dìk shoq no hpuzô nyi rô!
Ngá chyáng sing gùq htûng nyi é nghut mù,
ngò zim za a wó nyî nghut ri.
Hkâsu mù gâ le, ngò gi, tut mùt htê lé le,
majan garu htê lé le, wó gyo bê nghut lhê.
20 Byò dàn byò sho hkyô htoq má byò dàn byò sho hkyô jé bê nghut ri;
ra-mau gón htên byòq yeq to bê nghut ri.
Ngá é zúm pé gi, byò dàn htik htên byòq byùq mù,
ngá é pán-gyang pé gi, razùp má za htên byùq bê nghut ri.
21 Ngò gi, hkâ-myháng jé shoq, donghkón lé myang nyì mù,
tut mùt htê lé wó gyô nyì râ lhú?
22 “Ngá é byu pé gi, nghâ bang nghut akô;
yhángmòq gi, Ngo lé a sé kó nghut ri.
Yhángmòq gi, nâ é zoshâng wuì nghut mù,
sê gyô é u-nuq a bò kó nghut ri.
Yhángmòq gi, agè ashop hkyô kut é má kung kômù,
ge é hkyô lé hkâsu kut râ a sé kó nghut ri.” ga haû Yhûmsîng Garai taî ri.
23 Ngò gi, myìdàm htoq lé wú kat le,
haû gi, azòng a htoq shî é nghut mù,
pyutlutsut dùt tô é nghut luî,
mauhkûng lé wú kat le,
maubó a jòq byùq lo nghut ri.
24 Ngò gi, bùm pé lé wú kat é hkûn,
haú pé nún nyi bùm mù,
kong pé bànshoq gi, nùn nùn dui lû nyi bum ri.
25 Ngò tu wú kat le, byù a nyì nghut ri;
maulat nghoqzô pé le dâng ló byùq bê nghut ri.
26 Ngò tu wú kat le, hôwa nùqhpyí byíng é mau gi,
yòso dùt byùq mù, haú mâ é wà pé bànshoq gi,
haû Yhûmsîng Garai eq Yhâng é nhikmó-yo hkyo é hí má htên byòq to bê nghut ri.
27 Haû Yhûmsîng Garai shî su ga taî ri;
“Ra-mau gón lé Ngò a lhoqhtên pyám kôlhang,
ra-mau gón gi, chamchyuîyuì dùt byùq râ nghut lhê.
28 Haû mù, myìdàm htoq gi, iyon yon râ nghut mù,
mauhkûng gi, nòq byùq râ nghut lhê;
haû gi, Ngò taí bê nghut é yánmai, dùt râ za nghut lhê;
Ngò myìt hpyit to bê nghut mù, a kut htoq é a to râ nghut lhê.” gâ ri.
29 Myangji ji bang eq lai bik bâng é htê mó é yánmai,
wà hkangmó mâ é bang hpâng kôrâ nghut lhê.
Ra-am gi, yòso mó má hpang ê mù,
ra-am gi, lungmó zîng pé má hpang dòq kôrâ nghut lhê.
Wà pé bànshoq gi, chamchyuîyuì dùt to râ nghut mù,
haú pé má ó le nyì râ a nghut.
30 Htên byòq huî é myiwe ê, nàng haî kut nyi lhê lhú?
Nàng gi, haî mù, zam zam ne é mèbu wùt luî,
hîng zè pé mhôn chung lhê lhú?
Nàng gi, haî mù, myòqchi bùt lhê lhú?
Nàng gi, akôm má mhôn pyám mù,
nàng chyit é bang gi, nang lé wú tiq pyâm akô;
yhángmòq gi, nang lé sat pyám nau akô nghut ri.
31 Ngò gi, zo hkû nò nò su é htê su ga le,
zo-mún hkû sû nò-kying kyîng é htê su ga le,
Zi-un Byìzo ngaù htung htut nyi é htê lé wó gyô ri;
yhang gi, “Goì yê! Ngò mòq ló nyi rô;
ngá é chyungxe gi, byù sat bâng é lòq má àp byî é hui bê nghut ri.” ga,
yhâng é lòq lham mù, garû taî ri.