Díngmán É Byù Rayùq Lháng A Nyi É Hkyô
5
“Yerusalem wà mó mâ é hkyô pé eqlam é jowò pé má ê ê lò lò sô lhîng mù, ho wú keq;
i-myìt díng é dông nyì yàp mù,
tengmán é hkyô lé ho é byù rayùq lé myang é nghut jáng,
Ngò gi, wà shî lé mara hkyut pyám byi râ nghut lhê.
2 Yhángmòq gi, ‘Haû Yhûmsîng Garai rû dui nyì nyì,’ ga taí kôlhang,
mhaû é dông ru dâkam ashi kô nghut ri.” ga haû Yhûmsîng Garai taî ri.
3 Yhûmsîng Garai ê, Náng é myòq gi, tengmán hkyô lé ho lhê, a nghut lhí?
Nàng, yhángmòq lé bàt kôlhang, yhángmòq nò htê a wó gyo kó nghut ri;
Nàng, yhángmòq lé lhoqhkyop kôlhang, mhoqshit é hkyô lé yhángmòq a hkam yù kó nghut ri.
Yhángmòq gi, lùqgòk htoq myìt htan byùq kômù,
myìt lhîng a wó naû kó nghut ri.
4 Haû mù, ngò gi, “Gè gè yhang, byù shí bang gi,
asho awuî é bang chyat nghut ri;
yhángmòq gi, haû Yhûmsîng Garaî é hkyô lé le,
yhángmòq é Garai Gasâng é târâ pé lé le,
a sé kô é yánmai, byù ngok pé nghut bum akô.
5 Haû mù, ngò gi, ushuq pê chyáng ê mù,
yhángmòq lé dang ê nyô râ nghut lhê.
yhángmòq gi, haû Yhûmsîng Garaî é hkyô lé le,
yhángmòq é Garai Gasâng é târâ pé lé le,
hkyak sé kôrâ nghut lhê.” nghû myìt yu é nghut lhê.
Nghut kôlhang, yhángmòq le, i-myìt rahkat za kut luî,
kyaú lé lhoqhkyop pyám mù, tuî tô é tui lé lhoqhpyit pyâm akô nghut ri.
6 Haû mù, yòso mhanpúng mó mâ é hkanghkyi gi,
yhángmòq lé htim râ nghut lhê;
yòso mâ é wàmhkui gi, yhángmòq lé lâng myha pyám râ nghut lhê;
lo-ká mó gi, wà shinggan má htoq lo é sû ó yùq lé le,
lhom lâng myha sat pyám râ matú, wà pé má láng up to râ nghut lhê;
hkâsu mù gâ le, yhángmòq gumlau toq é gyaí htan byùq mù,
ahkyô hkyô má a nghut é shut lhing taû ló byùq kô é yánmai nghut ri.
7 “Ngò gi, haî mù nang lé mara hkyut pyám byi râ lhú?
Náng é zodù wuì gi, Ngo lé tô pyâm to kômù,
haî le a nghut é hparà pê é myìng lang luî dâkam akô nghut ri.
Ngò gi, yhángmòq râ é bànshoq lé byi kôlhang,
yhángmòq gi, myi shut làng shut hkyô kut kômù,
shiwa myhî pê é yhûm pé má chôm chyun bum akô nghut ri.
8 Yhángmòq gi, rago tsô tô é myang pé su, wum-o byíng bûm mù,
góyùq é myiwe lé haq juí wú bum akô nghut ri.
9 Ngò gi, yubàk mara shi é matú yhángmòq lé mara dàm a byi kut râ lhú?” ga,
haû Yhûmsîng Garai taî pyo ri.
Hau htoq agó, “Shî su dùt é a-myû lé,
Ngò lató a hpuq kut râ lhú?
10 Hau é tsibyiq yô pé má ê mù, yhángmòq lé lhoqhtên pyám keq;
nghut kôlhang, htûm byùq shoq hkâkut kó.
Hau é akoq pé lé chû pyám keq;
hkâsu mù gâ le, haú bang gi, haû Yhûmsîng Garai eq a séng kó nghut ri.
11 Isira-elaq byu pé eq Yudaq byu pé gi,
Ngo lé a jujúm kut pyám bekô nghut ri.” ga,
haû Yhûmsîng Garai taî pyo ri.
12 Haû Yhûmsîng Garai eq séng luî yhángmòq mhaû taí kô é gi,
“Yhang haî kut râ a nghut!
Ngá-nhûng chyáng ihkyùp jé râ a nghut;
ngá-nhúng gi, hkâ-nhám le shâm eq mùtmó gyó é lé myàng râ a nghut.
13 Myìqhtoî pé gi, laì za nghut bum akô;
yhángmòq chyáng mungdang a bò nghut ri;
haû mù, yhángmòq taí kô é eq rajung za hui zo kó sháng gàq.” gâ akô nghut ri.
14 Haû mù, Wum-o a-tsam dìk shoq bò Sû, haû Yhûmsîng Garai Gasang taî le,
“Byù shí bang gi, dang haú pé lé taí bekô nghut é yánmai,
Ngò gi, Ngá é dang pé lé náng é nhut má myi dùt nhâng mù,
byù shí bang lé htang dùt nhâng râ nghut luî,
myi haû gi, yhángmòq lé nyé gyó pyám râ nghut lhê.” gâ ri.
15 Haû Yhûmsîng Garai taî pyo é gi,
“Isira-elaq byu pé ê, núngmòq lé htim râ matú,
mau we mâ é byù myû ra-myû lé Ngò shuî lò râ nghut lhê;
byù myû haû gi, wum-o a-tsam bo é htoq agó, góhkun lhê é a-myû nghut ri.
A-myû hau é dang lé núngmòq a sé,
yhángmòq nyo é lé núngmòq a sê gyo nghut ri.
16 Yhángmòq é myoshi htuq gi, hpông hâ tô é lùpdùng nghut mù,
yhángmòq bànshoq bang gi, sarhê mó pé chyat nghut bum ri.
17 Yhángmòq gi, núngmòq é kyôshi myuishi eq zoshuq pé lé zô pyám byi mù,
núngmòq é yùqzo byìzô pé lé myui pyám byi râ nghut lhê;
yhángmòq gi, núngmòq é sau bainám hpúng pé eq no hpúng pé lé le,
núngmòq é tsibyiq nuî pé eq hkohúm gâm pé lé le, myui pyám byi kôrâ nghut lhê;
yhángmòq gi, núngmòq lum tô é gingtíng wà mó pé lé le,
sham èq lhoqhtên pyám kôrâ nghut lhê.” gâ ri.
18 Haû Yhûmsîng Garai taî pyo é gi, “Nghut kôlhang, haú buìnyì pé má lháng, Ngò gi, núngmòq lé chyuí lhoqhtûm pyám râ a nghut. 19 Haú hkûn, byu pé gi, ‘Ngá-nhûng é Garai Gasang nghut é, haû Yhûmsîng Garai gi, haî mù ngá-nhúng lé shí hkyô pé bànshoq kut lhê làq?’ ga myi kôjáng, nàng, Yeremi-aq gi, yhángmòq lé, ‘Núngmòq gi, Ngo lé tô pyâm to kômù, núngmòq é mau má gó-mîng hparà pé lé dójaú kô é nghut mù, ahkuî, núngmòq gi, núngmòq é mau a nghut é jang má gó-mîng byu pé lé dójaú kôrâ nghut lhê.’ nghû taî kyo aq.
20 Yakup é awùt ashîn pê chyáng shî su nghû taî kyo mù,
Yudaq mau má shî su nghû taî pyô aq;
21 Myòq dàp to kôlhang a myàng,
nohkyap dàp to kôlhang a wó gyo dùt é,
byù nghâ eq nâ é bang ê, shí lé gyo keq.
22 Núngmòq gi, Ngo lé gyùq chiq nó a ra kó lhú?” ga haû Yhûmsîng Garai taî pyo ri.
Hau htoq agó, “Núngmòq gi, Ngá é hí má gyùq nán nó a ra kó lhú?
Ngò gi, se-muî lé, wuìshuq lung-au é matú maukyo tô to luî,
ahtum abyùq é dangmó dông nghut mù, haú mai a wó laî byìt nghut ri.
Wuìlhêng pé toq lô kôlhang, haú lé wó ûng râ a nghut;
mying hum kôlhang, haú lé wó laî byìt râ a nghut.
23 Nghut kôlhang, byù shí bang gi, myìt htân kômù,
gumlau toq é myìt bo akô nghut ri;
yhángmòq gi, rahkyam shut lhing ló byùq bekô nghut ri.
24 Yhángmòq gi, yhûmsing gùng yhûmsîng,
‘Ngá-nhûng é Garai Gasang nghut é, haû Yhûmsîng Garai lé gyùq hkúngga sháng;
Yhang gi, ngá-nhûng é matú, sânghi wo é mau eq wò htáng htâng é mau wò byi nhâng mù,
ayang kyô shu yòq hen to byi Sû nghut ri.’ ga taí kôrâ a nghut.
25 Núngmòq kut shut é hkyô gi, haú hkyô pé lé byùq ló nhâng mù,
núngmòq é yubàk mara gi, núngmòq é nyì ngón yùqyò hkyô lé xaû pyám byi bê nghut ri.
26 Ngá é byu pê chyáng agè ashop é bang bo ri;
haú bang gi, nghoq nhê é byu pé su le,
byù lé myhî yù râ dumzo htung é bang su le,
haq gyám láng nyi bum akô nghut lhê.
27 Nghoqhkyún má nghoq pé byíng tô é eq rajung za,
yhángmòq é yhûm pé má mhaú zo hkyô byíng zan tô ri;
haû mù, yhángmòq gi, wó bang dùt lò kôluî, wum-o a-tsam bo byùq mù,
28 xu byôn lò luî, nè shi pân dùt bê nghut ri.
Yhángmòq gi, agè ashop hkyô kut é má ladu lai bekô nghut luî,
târâ ràp-rá hkyô lé a hô kó nghut ri.
Yhángmòq gi, chuízô pê é mú lé a bo taî ûng byî é htoq agó,
asho awui dùt bâng é mú lé târâ ràp-rá é dông a bo hûng byi kó nghut ri.
29 Ngò gi, shí hkyo é yánmai, yhángmòq lé mara dàm byi râ dùt lhê,
a nghut lhí?” ga haû Yhûmsîng Garai taî pyo ri.
Hau htoq agó, “Shî su dùt é a-myû lé,
Ngò lató a hpuq râ nghut lhê lhú?
30 Gyùq chiq râ é eq byò dàn nhô zâ é hkyô rahkat,
mîngdán hkaû má dùt htoq bê nghut ri;
31 Myìqhtoî pé gi, mhaû é dông myìqhtoi htoî akô;
hkyangjông pé gi, yhûmsing é ahko ahkáng èq ùp akô;
Ngá é byu pé gi, haú dông kut é lé o bum akô nghut ri.
Nghut kôlhang, ló htáng má núngmòq hkâsu kut kôrâ lhú?