Târâ Jéyáng Hkyô Eq Myòqbyù Hkyô
66
Haû Yhûmsîng Garai shî su ga taî ri;“Mauhkûng gi, Ngá é zùng tánghkuq;
myigùng gi, Ngá é hkyî nang jang nghut nyi lhê;
Ngá é matú núngmòq saí râ yhûm gi, hká má nghut akô lhú?
Ngò nô yù râ jang gi, hká má nghut kôrâ lhú?
2 Haú pé bànshoq lé gi, Ngá é lòq èq saî tô é nghut mù,
haú pé dùt htoq lo é nghut lhê, a nghut kó lhí?” ga,
haû Yhûmsîng Garai taî pyo ri.
“Nghut kôlhang, Ngò gi, myìt lhoqnyhûm luî, myìt wum gyuî byùq mù,
Ngá é dang má gyùq nán é sû lé za, wú magûm râ nghut lhê.
3 Nghut kôlhang, nohtó nhông byî é sû gi,
byù sat é sû eq pung ri;
sau zo lé nhong é sû gi,
hkuî lìngzing myhik hkyui sû eq pung ri;
zoshuq hkungga byî é sû gi,
wàq sui nhông byi sû eq pung ri;
namngón jung nyhê é sû gi,
hparà lhô lé noq sû eq pung ri.
Yhángmòq gi, yhûmsing é hkyô lé hkyin yù kômù,
yhángmòq é i-myìt nhiklhum gi,
yhángmòq é achaq achyut hkyô pé lé myìt nguì ô nau akô nghut ri;
4 haû mù, Ngò le, yhángmòq é matú no hpu hkyô hkyin to byi mù,
yhángmòq gyùq chiq é hkyô lé, yhángmòq é ahtoq má jé nhâng râ nghut lhê.
Hkâsu mù gâ le, Ngò wùt é hkûn, ó yùq le a tu kó nghut ri;
Ngò dáng nyo é hkûn, ó yùq le a gyo kó nghut ri.
Yhángmòq gi, Ngá é myòq hí má agè ashop hkyô kut kômù,
Ngò a ngui é hkyo lé hkyin yu akô nghut ri.” gâ ri.
5 Yhûmsîng Garaî é dang lé gyùq nán é bang ê,
Yhâng é dang lé gyo keq. Haû gi,
“Núngmòq lé a naù a wom mù,
Ngá mying é yánmai núngmòq lé tô pyâm tô é núngmòq é gu-mang wuì gi,
‘Núngmòq gabú byam chyû é hkyô lé ngá-mòq wó myâng shoq,
Yhûmsîng Garai gi, hpungwup shingkang bo nyì sháng gàq!’ ga taî akô nghut ri.
Nghut kôle, yhángmòq gi, hoq hpû é hui zo kôrâ nghut lhê.
6 Haû wà mó mai mying hûm é htê lé gyo keq!
Haû noqkuq yhûm mai mying é htê lé gyo keq!
Haû gi, Yhûmsîng Garai mai Yhâng é gye pé lé
lató hpuq é htê nghut ri.
7 Zi-un gi, zo hkû nò a nò shi-má,
zo hkû bê nghut ri;
yhang gi, nò htê a wó gyo shi-má,
yùqzo hkû bê nghut ri.
8 Haû sû é hkyô lé ó wó gyô wú é lhú?
Haû sû é hkyô lé ó myang wú é lhú?
Mîngdán ralhum lé ra-nyí má za wó hku htoq râ lhú?
Byù myû ra-myû lé razùp má za wó hku htoq râ lhú?
Nghut kôle, Zi-un gi, zo hkû nò no é a myáng má,
yhâng é zodù wuì lé hku kat bê nghut ri.
9 Ngò gi, yhang lé zo hkû hkyíng jé nhâng luî,
zo a hkû nhang é nyì râ lhú?” ga haû Yhûmsîng Garai taî ri.
“Ngò gi, zo hkû nhâng râ dông kut to luî,
zoyhûm lé myhî pyám râ lhú?” ga núngmòq é Garai Gasang taî ri.
10 “Yerusalem lé chyit é bang bànshoq ê,
yhang eq rahá gabú byam chyu luî, yhâng é matú myìt ngón keq;
yhâng é hkyô lé ngaù hkyangsang é bang bànshoq ê,
yhang eq rahá dìk shoq gabú byam chyu keq.
11 Hkâsu mù gâ le, núngmòq gi, yhâng é nhiktíng naúwang má shuq luî,
shuq gyî bùm kôrâ nghut lhê;
núngmòq gi, gyai yhang naú chyup shuq luî,
yhâng é agùn agó yui nyi é naú má gabú myìt nguì kôrâ nghut lhê.” gâ é nghut ri.
12 Hkâsu mù gâ le, haû Yhûmsîng Garai taî le,
“Ngò gi, nguì ngón hkyô lé wuìlàng su,
byù myû wui é sùtzè lé wuìwúm wúm é wuì zo làng su, Yerusalem má jé nhâng râ nghut lhê;
núngmòq gi, naú shuq luî, yhâng é lòq má bún lhoî é eq,
yhâng é hkyîhput má he nhûn é hui kôrâ nghut lhê.
13 Înu rayùq gi, yhang zo lé nhiktíng byî é su,
Ngò gi, núngmòq lé nhiktíng byi mù,
núngmòq gi, Yerusalem wà mó má nhiktíng byî é hui kôrâ nghut lhê.” gâ ri.
14 Núngmòq gi, haú hkyô lé myàng kô é hkûn, núngmòq é i-myìt nhiklhum gabú byam chyu mù,
núngmòq é showui gi, wàhu mhan su nyún lô râ nghut lhê;
haû Yhûmsîng Garaî é lòq gi, Yhâng é duìnhâng zoshâng wuì eq rahá nghut nyi é hkyô lé sé kôrâ nghut lhê;
nghut kôle, Yhâng é gye pé lé gi, Yhâng é nhikmó-yo hkyô shit râ nghut lhê.
15 Wú keq, haû Yhûmsîng Garai gi, myi eq rahá lé lô mù,
Yhâng é gyè myanglhêng gi, laìlhíng su dùt ri;
Yhang gi, myìt nyé luî, nhikjum yo mù,
myîsham èq tân mhoqshit râ nghut lhê.
16 Hkâsu mù gâ le, haû Yhûmsîng Garai gi,
myî èq le, Yhâng é sham èq le, byù bànshoq bang lé târâ jéyáng râ nghut mù,
Yhûmsîng Garaî èq sat pyâm é byù myo râ nghut lhê.
17 “Haû wàq sho, ngo-nòq sho eq achaq achyut é zè pé zo luî, hkyâm gùng má jòq é alhô ralho é nàm má wang ê mù, yhûmsing gùng lé lhoqchyoi lhoqyúng, lhoqsan lhoqsêng yu é bang gi, rahá htûm byùq râ nghut lhê.” ga haû Yhûmsîng Garai taî pyo ri.
18 “Ngò gi, yhángmòq é hkyîzó lòqzó pé eq yhángmòq myìt jé é hkyo pê é yánmai, lé lô râ za nghut mù, byù myû bànshoq bang lé le, myíng gótû mu é bang lé le, tsîng yù râ nghut lhê; haû mù, yhángmòq gi, lé luî, Ngá é hpungwup shingkang lé myàng kôrâ nghut lhê.
19 Ngò gi, yhángmòq chyáng alhô agàn ralhum tûn shit mù, wó nyi lùt tô é bang lé, byù myû wuì nghut é, Tarishi, Pula, lai dàt bìk é Luda, Tubala eq Grik pê chyáng le, Ngá é hkyô lé a wó gyô wú shî é eq Ngá é hpungwup shingkang lé a myang wú shî é, mau we mâ é zinlóng pé má le, nhang kat râ nghut lhê. Yhángmòq gi, Ngá é hpungwup shingkang lé byù myû wui chyáng taî pyô kôrâ nghut lhê. 20 Hau htoq agó, Isira-elaq byu pé gi, yhûmsing é zoshuq hkungga lé, htûngli dông sansêng é hkoq mai haû Yhûmsîng Garaî é noqkuq yhûm má yu lé kô é eq rajung za, yhángmòq gi, núngmòq é gu-mang wuì bànshoq lé, myang mai le, lhêng mai le, wàq dang jung mai le, loze mai le, gola-uk mai le hto kômù, Yhûmsîng Garai lé nhông byi râ hkungga dông ming hkangmó mai, Ngá é chyoiyúng bûm nghut é Yerusalem wà mó má shuî lé kôrâ nghut lhê.” ga haû Yhûmsîng Garai taî ri. 21 “Haû mù, Ngò gi, yhángmòq mâ é ra-am lé, hkyangjông pé eq Lewiq pé kut nhâng râ matú hkyin yù râ nghut lhê.” ga le haû Yhûmsîng Garai taî ri.
22 “Haû Ngò hpan tô é mauhkûng asik eq myigùng asik gi, Ngá é hí má gîng nyi é su, núngmòq é myìng eq núngmòq é awùt ashín pé le gîng nyì râ nghut lhê.” ga haû Yhûmsîng Garai taî pyo ri. 23 “Lhôxan Lhôsik hkangmó má le, Bánno Buìnyì hkangmó má le, xângzo byù lhúnglhâng bang gi, lé lô mù, Ngá é hí má lé paî gòp kôrâ nghut lhê.” ga haû Yhûmsîng Garai taî ri. 24 “Haû mù, yhángmòq gi, htoq ê kôluî, Ngo lé gumlau toq bâng é màng lé ê wú kôrâ nghut lhê; hkâsu mù gâ le, haú bang lé zô é lùq gi, shî râ a nghut é htoq agó, yhángmòq lé nyhê é myi le jom râ a nghut mù, yhángmòq gi, xângzo byù bànshoq bâng é hí má achaq achyut é chyat dùt byùq kôrâ nghut lhê.” ga le taî ri.