Târâ Jéyáng Hkyô Eq Hkyi Yù Hkyô
65
Haû Yhûmsîng Garai taî le,“Ngò gi, Ngá é hkyô a myî é bâng chyáng,
Ngá gûng htoq shit bê nghut lhê;
Ngo lé a ho é bang gi, Ngo lé myang hô bekô.
Ngò gi, Ngá é myìng a lâng é a-myû lé,
‘Ngò shî má nghut lhê; Ngò shî má nghut lhê.’ nghû taî é nghut lhê.
2 Ngò gi, haû yhûmsîng wó myìt jé é eq rajung za,
a ge é hkyô pé kut é,
myìt htan é byu pé lé,
ra-nyí buìgyùm Ngá é lòq lham lòqlìk lìk nyi é nghut lhê.
3 A-myû haû gi, hkyâm pé má hkungga nhông luî,
tsohtûng èq saî tô é hkungga gyàp pé má namngón jung nyhé kômù,
Ngá é myòq hí má yhang,
ayang Ngo lé nhikjum lhoqyó nhang nyi akô nghut ri;
4 yhángmòq gi, lùpdùng pé má zùng mù,
myín pé má tsik za haq nyi laî akô nghut ri;
yhángmòq gi, wàqsho zô bùm kômù,
yhángmòq é auhkoq pé má, achaq achyut é showing dàp tô bum ri;
5 hau htoq agó, yhángmòq gi, ‘Hui aq; ngá chyáng hkâchyâng htèp lé;
ngò gi, náng htoq chyoiyúng lhê.’ ga taî akô.
Haû sû é bang gi, Ngá é nhô mâ é myihkau su le,
ra-nyí buìgyùm nyé nyi é myi su le nghut nyi ri.
6 Wú keq; Ngá é hí má haû kâ tô é nghut mù,
Ngò gi, zim za nyi to râ a nghut é za, lató hpuq râ nghut lhê;
Ngò gi, yhángmòq é tanghkoí má
byíng shoq taû kut byi râ nghut lhê.
7 Ngò gi, núngmòq é yubàk mara eq núngmòq é îchyí îwâ pê é yubàk mara eq
rajung za dum taû kut râ nghut lhê.
Yhángmòq gi, bùm pé má namngón jung nyhé mù,
kong pé má Ngo lé rhoî jihkyoî kut kô é yánmai,
Ngò, yhángmòq é tanghkoí má byíng shoq taû kut byi râ nghut lhê;
Ngò gi, yhángmòq é hkyîzó lòqzó má cháng mù le,
yhángmòq é tanghkoí má byíng shoq lató hpuq râ nghut lhê.” ga haû Yhûmsîng Garai taî ri.
8 Haû Yhûmsîng Garai taî le,
“Tsibyiq shipaû má tsibyiq wing myang ashî hkûn,
byu pé gi, ‘Haú lé hkâ lhoqhtên pyám shi;
ge é jeju bo ashî.’ ga taî ri.
Haû eq rajung za, Ngò gi, Ngá é duìnhâng zoshâng wui lé myìt tê byi luî zui saí mù,
haû bànshoq lé lhoqhtên pyám râ a nghut.
9 Ngò gi, Yakup up mai awùt ashín pé lhoqhtoq byi mù,
Yudaq up mai Ngá é bùm pé lé sîng yù râ bang lé lhoqhtoq byi râ nghut lhê;
Ngò hkyin yu é byu pé gi, maumyî haú lé sing yù mù,
Ngá é duìnhâng zoshâng wuì gi, haú má nyì kôrâ nghut lhê.
10 Sharon pá gi, Ngo lé ho é Ngá é byu pê é matú,
sau hpûng pê é mhan zo yô dùt mù,
Ahkora Langhkaû gi, no myang pé ùp râ jowò dùt râ nghut lhê.
11 Nghut kôlhang, haû Yhûmsîng Garai lé tô pyâm to kômù,
Ngá é chyoiyúng bùm lé tô-myhî pyám luî,
Hpuwáng nghu é hparà hí má zangbó htûng byi kômù,
Dut htoq râ hkyô nghu é hparà é matú hkoq má nyhô tô é tsibyiq wing lhoqpyîng é bang ê,
12 Ngò gi, núngmòq é chyungxe htum râ matú shâm lajâng to râ nghut mù,
núngmòq gi, sat pyâm é hui râ matú bànshoq bang ngóm gòp kôrâ nghut lhê;
hkâsu mù gâ le, Ngò wùt é hkûn núngmòq a tu kó;
Ngò nyo é hkûn núngmòq a gyo kó nghut ri.
Núngmòq gi, Ngá é myòq hí má agè ashop é hkyô kut kôluî,
Ngò a ô nau é hkyô lé hkyin yu akô nghut ri.” gâ ri.
13 Haû mù luî, Ahko Ahkáng lhúnglháng wó Sû Yhûmsîng Garai shî su ga taî ri;
“Ngá é duìnhâng zoshâng wuì gi, myàng zo kôrâ nghut lhê;
nghut kôlhang, núngmòq gi, zò-mut é hui kôrâ nghut lhê;
Ngá é duìnhâng zoshâng wuì gi, myàng shuq kôrâ nghut lhê;
nghut kôlhang, núngmòq gi, wuìshit é hui kôrâ nghut lhê;
Ngá é duìnhâng zoshâng wuì gi, myang gabú byam chyu kôrâ nghut lhê;
nghut kôlhang, núngmòq gi, hoq hpû é hui kôrâ nghut lhê.
14 Ngá é duìnhâng zoshâng wuì gi, yhángmòq é gabú byam chyu myìt mai,
mahkôn hkôn kôrâ nghut lhê;
nghut kôlhang, núngmòq gi, myìt no hpuzô é mai wùt ngau garu kômù,
myìt wum gyuî byùq luî, ngaùhkyûng ngaùyang dùt kôrâ nghut lhê.
15 Núngmòq gi, yhûmsing é myìng lé,
Ngò hkyin yù bâng é matú nhinghkun dông kut kôrâ nghut lhê;
haû Ahko Ahkáng lhúnglháng wó Sû Yhûmsîng Garai gi, núngmòq lé sat pyám râ nghut lhê;
nghut kôlhang, Yhâng é duìnhâng zoshâng wuì lé gi, myìng gótû myhíng byi râ nghut lhê.
16 Maumyî haú má yhûmsing é matú shimân jeju dûng é sû gi,
haû tengmán é Garai Gasâng é myìng lang luî dung râ nghut lhê;
maumyî haú má dâkam é sû gi,
haû tengmán é Garai Gasâng é myìng lang luî dakâm râ nghut lhê.
Hkâsu mù gâ le, laî ló bê wuîhke jamjau hkyô lé,
tô-myhî pyám râ nghut é htoq agó,
Ngá é hí mai haq hpyuq pyám râ nghut lhê.
Mauhkûng Asik Eq Myigùng Asik
17 Wú keq, Ngò gi, mauhkûng asik eq myigùng asik lé,
hpân râ nghut lhê.
Hí lhê hkyô pé lé a bun lo râ nghut é htoq agó,
myìt má le htoq lô râ a nghut lo.
18 Nghut kôlhang, Ngò hpân râ nghut é hkyô má,
ahtum abyùq myìt nguì gabú keq;
hkâsu mù gâ le, Ngò gi, Yerusalem lé, myìt nguì ô nau é jowò dùt râ matú eq,
haû má é byu pé lé gabú byam chyu hkyô dùt râ matú hpân râ nghut lhê.
19 Ngò gi, Yerusalem é yánmai gabú byam chyu mù,
Ngá é byu pê chyáng gabú myìt ngui nyì râ nghut lhê;
ngaùhkyûng ngaùyang htê eq ngau garû é htê lé,
haú má wó gyo râ a nghut lo.
20 Wà mó haú má, hkâ-nhám le,
nyheqnú má shi é bò râ a nghut lo;
chyungxe zànwut a byíng é mangzo le nyì râ a nghut;
chyungxe zànwut rashô zàn má shi é sû lé gi,
zorâm ru nghut ashî ga kôrâ nghut lhê;
yubàk bò mù, chyungxe zànwut rashô zàn a bò shi-má shi byùq é sû lé gi,
nhinghkun zùq sû ga kôrâ nghut lhê.
21 Yhángmòq gi, yhûm pé saí kôluî, haú má nyì kôrâ nghut lhê;
yhángmòq gi, tsibyiq hkyâm pé saí kôluî, yhángmòq hô é shi lé zo kôrâ nghut lhê.
22 Yhángmòq saî é yhûm má góbang nyì râ a nghut lo;
yhángmòq hô é lé góbang zo râ a nghut lo.
Hkâsu mù gâ le, Ngá é byu pê é chyungxe buìnyì pé gi,
sikgam é buìnyì pé su dùt râ nghut mù,
Ngò hkyin yu é bang gi, yhángmòq é lòq shi hkyî shi lé,
myáng myáng hkâm zo kôrâ nghut lhê.
23 Yhángmòq gi, akôm má zuî shi-kùt pyám râ bang a nghut;
yhángmòq gi, lhoqhtûm pyâm é hui râ matú zoshâng hku é le a nghut kó;
hkâsu mù gâ le, yhángmòq gi, yhángmòq é awùt ashín pé eq rahá,
haû Yhûmsîng Garaî èq shimân byî é byù myû ra-myû dùt râ nghut lhê.
24 Yhángmòq a wùt dung shi-má, Ngò tu byi râ nghut lhê;
yhángmòq dang rû nyo nyi ashî le, Ngò gyo byi râ nghut lhê.
25 Haû wàmhkui eq sau zo gi, rahá zo kôrâ nghut lhê;
hkanghkyi gi, no su hkôwá zo râ nghut lhê;
nghut kôlhang, lhângmui mó é zoshuq gi, hpuílhup dùt râ nghut lhê.
Ngá é chyoiyúng bùm bànshoq má,
dàm dap zu záng é hkyô le,
lhoqhtên lhoqhpyoq é hkyô le, jòq râ a nghut lo.”
ga haû Yhûmsîng Garai taî ri.