64
Nàng gi, mauhkûng lé lâng há mù gyó lô àq ô;haû bùm pé gi, Náng é hí má gyùq nán bûm kó sháng gàq!
2 Sikkyâng pé má myi duq mù,
wuì lé tsû nhang é su,
Nàng gi, gyó lé mù, Náng é gye pé lé, Náng é myìng sé nhâng luî,
byù myû wuì lé, Náng é hí má gyùq nán nhâng àq!
3 Nàng gi, ngá-mòq a myìt myòqbyu tô é gyùq chiq hpo pé lé kut é hkûn,
Nàng gyó lô mù, haû bùm pé gi, Náng é hí má gyùq nán bum akô nghut ri!
4 A-nham mai yhang, Nang lé myìt myòqbyù bang lé Nàng Garai Gasang jeju shit é mai lai luî,
gótû ó yùq nyi é lé le, myòq èq le a myàng wú,
nohkyap èq le a wó gyô wú,
gyo le a sê gyô wú é nghut lhê.
5 Nàng gi, Náng é hkyô lé myìtbun mù,
díngmán hkyô lé gabú myìt mai kut é bang lé garúm yû râ matú lé lo ri.
Nghut kôlhang, ngá-mòq gi, mara xoq kut shut nyi é hkûn,
Nàng gi, nhikjum yô ri.
Haû jáng, ngá-mòq gi, hkyi yu é hkâsu wó hui râ lhú?
6 Ngá-mòq bànshoq bang gi, a sân-yúng é byù su dùt byùq bê nghut mù,
ngá-mòq díngmán é hkyô pé bànshoq gi, mè-pyâng su dùt byùq bê nghut ri.
Ngá-mòq bànshoq bang gi, sikhaq su nyhuî byùq bê nghut mù,
ngá-mòq é yubàk mara pé gi, ngá-mòq lé laì su mùt tâng ló bê nghut ri.
7 Náng é myìng lé lâng é byù le a nyì,
Nang lé wum kat zuî zìng râ byù le a nyì nghut ri.
Hkâsu mù gâ le, Nàng gi, ngá-mòq chyáng mai Náng é myòqdong lé haq pyám luî,
ngá-mòq é yubàk marâ é yánmai ngá-mòq lé lhoqhtên pyám bê nghut ri.
8 Nghut kôlhang, Yhûmsîng Garai ê, Nàng gi, ngá-mòq é Îwa nghut ri.
Ngá-mòq gi, tsohtung, Nàng gi, tso-au saí sû nghut ri;
ngá-mòq bànshoq gi, Náng é lòqmú pé nghut lhê.
9 Yhûmsîng Garai ê, ladu lai shoq nhikjum hkâyo;
ngá-mòq é yubàk mara lé, ahtum abyùq hkâ xûm to byi.
Ngá-mòq bànshoq bang gi, Náng é byu pé nghut é yánmai,
ngá-mòq lé wú kat râ matú, ngá-mòq kyûdûng nyi lhê.
10 Náng é sân-yúng wà mó pé gi, yòso dùt byùq bê;
Zi-un lháng yòso dùt byùq bê nghut mù, Yerusalem le, chamchyuîyuì dùt byùq bê nghut ri.
11 Ngá-mòq é îchyí îwâ pé mai Nang lé hkya-on kúngtôn jowò nghut é, chyoiyúng mù, hpúng bo é noqkuq yhûm gi,
nyé gyó byùq bê nghut mù,
ngá-mòq myìt nguì gù tô é jowò bànshoq gi, byòq yèq to bê nghut ri.
12 Yhûmsîng Garai ê, shí hkyô pé bànshoq lé,
Nàng ru jân nyì mù, zim za kut nyî luî,
ngá-mòq lé ladu lai shoq dam byi râ nghut lhê lhú?