Garai Gasang Lató Hpuq É Eq Hkyi Xe Yu É Buìnyì
63
Haû ne yúng é mèbu wùt mù,hkìkhkam é buhîng baíyùp chûng luî,
wum-o a-tsam mó èq hkyîbyè làm làm che mù,
Edom mau mâ é Bozira wà mai jé lé lo é sû gi, ó yùq nghut lhê lhú?
“Haû gi, díngmán é dông dang nyô mù,
hkyi yù râ matú wum-o a-tsam mó bò Sû Ngò nghut lhê.”
2 Náng é mèbu gi, haî mù luî,
tsibyiq wing pyik jang má wùt bâng é mèbu su ne lhê lhú?
3 “Ngò gi, tsibyiq wing pyik long lé Ngò baú nang bê nghut lhê;
byù myû wuì mâ é ó yùq le Ngá chyáng lom é a bò nghut ri.
Ngò gi, nhikjum yo mù, yhángmòq lé nâng pyeq luî,
nhikmó-yô é èq yhángmòq lé nâng nhuq bê nghut lhê;
yhángmòq é sui gi, Ngá é mèbu má dâng gyun bê nghut mù,
Ngá é wùtbu pé bànshoq a-ká akòk dùt byùq bê nghut ri.
4 Hkâsu mù gâ le, lató hpuq é buìnyì gi, Ngá é myìt má bo to bê nghut mù,
Ngá é hkyi xe yù râ zànwut gi, jé bê nghut ri.
5 Ngò gi, wú kat le garúm râ sû a nyì;
Ngò gi, htuqbáng râ sû a nyì mù, maú dan byùq é nghut lhê;
haû mù, Ngá é lòq gi, Ngá é matú hkyi yù hkyô lhoqhtoq byi luî,
Ngá é nhikmó-yo hkyô gi, Ngo lé htuqlùq ri.
6 Ngò gi, nhikjum yô é mai byù myû wui lé nâng pyeq mù,
Ngò nhikmó-yô é mai yhángmòq lé shuq wùt nhâng luî,
yhángmòq é sui lé, myigùng htoq má hut hkyô pyâm é nghut lhê.” ga haû Yhûmsîng Garai taî ri.
Hkya-on Kúngtôn Hkyô Eq Kyûdung Dang
7 Ngò gi, ngá-nhûng é matú haû Yhûmsîng Garai kut byî é hkyô bànshoq nghut é,
Yhâng é shogyo nhikmyin myìt eq jeju myo myo má cháng mù,
Isira-elaq é yhûmbyù wuì lé jeju myo myo shit bê nghut é eq rajung za,
Yhûmsîng Garaî é jeju hkyô eq Yhang hkya-on huî é hkyîzó lòqzó lé taî kyo râ nghut lhê.
8 Yhang gi, “Gè gè yhang, yhángmòq gi, Ngá é byu pé,
ahpuq alhik kut râ a nghut é, Ngá zô pé nghut akô.” ga taî ri.
Haû mù, Yhang gi, yhángmòq é Hkyi yù Sû dùt bê nghut ri.
9 Yhángmòq myìt myo myìt chiq é hui hkangmó, Yhang le myìt myo myìt chiq é hui mù,
Yhâng é myòq hí mâ é maumang gi, yhángmòq lé hkyi yù bê nghut ri.
Yhang gi, Yhâng é chyitdàp myìt eq shogyo nhikmyîn é yánmai,
yhángmòq lé hkyi xe yù bê nghut ri;
Yhang gi, góhkun lhê é buìnyì pé bànshoq má,
yhángmòq lé bún wàq bê nghut ri.
10 Nghut kôle, yhángmòq gi, gumlau toq kômù,
Yhâng é Chyoiyúng Sô lé lhoqyón akô nghut ri.
Haû mù, Yhang gi, yhángmòq é gyè taû dùt mù,
Yhang yhang, yhángmòq lé htim bê nghut ri.
11 Haú hkûn, yhángmòqa gi, góhkun lhê é buìnyì pé nghut é,
Mosheq eq Yhâng é byu pê é buìnyì pé lé myìtbun kôluî,
yhángmòq lé, Yhâng é sau hpúng zúng sû eq rahá,
wuimau mai shuî htoq lo é Sû gi, hká má lhú?
Yhángmòq chyáng Chyoiyúng Sô kat byî tô é Sû gi, hká má lhú?
12 Mosheq é lòqyo hkyam má,
a-tsam bo é Yhâng é hpung bô lòqbú lé nhang kat mù,
Yhâng é matú ahtum abyùq é myìng wó yû râ dông,
wuì lé yhángmòq é hí má gam hkoq nhang é sû gi, ó nghut lhê lhú?
13 Nìk é jang mai yhángmòq lé shuî lo é sû gi, hká má lhú?
Yhángmòq gi, dánpyut yô má myang radu nyi tô é su,
a htûng lèqbàt kó nghut ri.
14 Jangdâm pá má gyó e é shigu gaunyhaû pé su,
yhángmòq lé, haû Yhûmsîng Garaî é So èq bánno nhang ri.
Haú dông, Náng é matú hpung bo é myìng wó râ dông,
Náng é byu pé lé Nàng shuî lo é nghut ri.
15 Mauhkûng mai wú hkyô kat luî,
Náng é hpung bô mù, chyoiyúng luî, hkìkhkam é tángmyhâng mai wú wú aq.
Náng é myìt zùq hkyô eq Náng é wum-o a-tsam mó gi, hká má lhú?
Náng é i-myìt nú nhám hkyô eq shogyo nhikmyin hkyô gi, ngá-mòq chyáng a jé byùq lo nghut ri.
16 Nghut kôlhang, Abraham gi, ngá-mòq lé a sé kôle,
Isira-elaq gi, ngá-mòq lé rago a sé kôle,
Nàng gi, ngá-mòq é Îwa nghut ri;
Yhûmsîng Garai ê, Nàng gi, ngá-mòq é Îwa nghut mù,
Náng é myìng gi, góhkûn mai ngá-mòq é Hkyi xe yù Sû nghut ri.
17 Yhûmsîng Garai ê, Nàng gi, haî mù, ngá-mòq lé,
Náng é hkyô mai lám ló byùq nhang lhê lhú?
Nang lé a hkúngga shoq, haî mù, ngá-mòq é i-myìt lé lhoqhtân byî lhê lhú?
Náng é silî wunlî a-myû nghut é, Náng é duìnhâng zoshâng wui é matú, lhing taû lò àq.
18 Náng é byu pé gi, razùp zo Náng é chyoiyúng jowò lé sîng bê nghut kôlhang,
ahkuî, ngá-mòq é gye pé gi, Náng é sân-yúng jowò lé nâng pyeq bekô nghut ri.
19 Ngá-mòq gi, góhkûn mai Náng é nghut lhê;
nghut kôlhang, Nàng gi, yhángmòq lé a ùp wú é su nghut mù,
yhángmòq gi, Náng é myìng mai wùt yu é a hui bang su nghut bum akô.