Yhûmsîng Garaî É Bùm
2
A-ô mâ é gi, Yudaq eq Yerusalem wà mó eq sêng é lé, Amozi é yhang zo Esai-a myang é hkyô pé nghut lhê.2 Ló htâng é buìnyì pé má,
haû Yhûmsîng Garaî é noqkuq yhum é bùm gi,
gótû bùm pê htoq je myhang é bùm dông lhoqshap to râ nghut lhê;
bum pé bànshoq htoq má haú lé wàq toq to râ nghut mù,
a-myû lhúnglháng gi, haú má yán zîng lo bùm kôrâ nghut lhê.
3 Byù myû wuì myo myo gi, lé lô kômù,
“Sâ, Yakup é Garai Gasâng é noqkuq yhûm nghut é,
haû Yhûmsîng Garaî é bùm má dòq ê sháng.
Yhang gi, Yhâng é hkyô má ngá-nhúng ge so râ matú,
ngá-nhúng lé, Yhâng é hkyô pé lhom mhoq kyo râ nghut lhê.” ga taí kôrâ nghut lhê.
Hkâsu mù gâ le, haû târâ gi, Zi-un Bùm mai htoq lô mù,
haû Yhûmsîng Garaî é mungdang gi, Yerusalem wà mó mai htoq lô râ nghut lhê.
4 Yhang gi, a-myû wui é gyoro má târâ jéyáng byi râ nghut mù,
byù myû myo myô é matú, dangnyhin nyhîn lhûm tô é mú lé hpyit byi râ nghut lhê.
Yhángmòq gi, yhángmòq é shâm pé lé najón bàt htoq yû mù,
yhángmòq é lhâm pé lé zaiyik mó bàt htoq yû kôrâ nghut lhê.
A-myû ra-myû gi, gó-myû lé sham èq toq htim râ a nghut lô é htoq agó,
yhángmòq gi, majan eq séng luî mhoq byi râ a nghut lo.
5 Yakup é awùt ashín pé ê, lé keq;
haû Yhûmsîng Garaî é maubó má so sháng.
Yhûmsîng Garaî É Buìnyì
6 Yhûmsîng Garai ê, Nàng gi, Yakup é awùt ashín nghut é,
Náng é byu pé lé tô pyám bê nghut ri.
Yhángmòq gi, buìhtoq hkyam bâng é jun jaú htûnglai chûng kômù,
Hpilisiti byu pé su bùt hpyit hkyô kut kôluî,
byù bíng pê é htûngli lé châng akô nghut ri.
7 Yhángmòq é mau má gi, ngùn hîng byíng zan tô é nghut mù,
yhángmòq é sùtzè pé le a ung taí loshoq myô ri.
Yhángmòq é mau má gi, myang pé byíng zan tô é nghut mù,
yhángmòq é gyèlhêng pé le a ung nghap loshoq myô ri.
8 Yhángmòq é mau má gi, hparà hpôlhô pé byíng zan tô é nghut mù,
yhángmòq gi, yhángmòq é lòqnyhui pê èq saî é zè nghut é,
yhángmòq é lòqmú lé paî gòp akô nghut ri.
9 Haû mù, byu pé gi, lhoqnyhum pyâm é eq,
shôm pyâm é hui kôrâ nghut mù,
yhángmòq lé mara hkâhkyut byi.
10 Haû Yhûmsîng Garaî é gyùq chiq hpo eq
Yhâng é kô làm hkìkhkâm hkyô mai,
lungmó zîng pé shut wang ê mù, myigùng má ê haq kyûng lúng to keq.
11 Myìt myhâng nghutbun sû gi, shôm pyâm é hui râ nghut mù,
nghutbun sû gi, lhoqnyhum pyâm é hui râ nghut lhê;
haû Yhûmsîng Garai baú za haú nyí má wàq toq é hui râ nghut lhê.
12 Wum-o a-tsam dìk shoq bò Sû Yhûmsîng Garai gi, mara byi luî shôm pyám râ buìnyì ra-nyí tô tô lhê.
Haû gi, nghutbun bang eq myìt myhâng bang bànshoq é matú le,
wàq toq é hui bang bànshoq é matú le,
(Yhángmòq bànshoq gi, shôm pyâm é hui kôrâ nghut lhê.)
13 Lebanon mâ é myhâng luî, myìt myhang é kyám gâm bànshoq é matú le,
Bashan mâ é wàqmyòq gàma bànshoq é matú le,
14 myhang é bùm mó bànshoq eq
myhang é bùm zo bànshoq é matú le,
15 myhang é mâchya hkangmó eq
gingtîng é wàhkûm hkangmó é matú le,
16 wuìloq kut é wuìsanghpo hkangmób eq
réng yúng é wuìsanghpo hkangmó é matú le nghut lhê.
17 Byu é myìt myhâng nghutbun hkyô gi, lhoqnyhum pyâm é hui luî,
xângzo byu pê é nghutbun hkyô gi, shôm pyâm é hui râ nghut lhê;
haû Yhûmsîng Garai baú za haú nyí má wàq toq é hui râ nghut mù,
18 hparà hpôlhô pé gi, chyut byùq byùq râ nghut lhê.
19 Haû Yhûmsîng Garai gi, myigùng lé lhoqnhún râ ga toq lo é hkûn,
byu pé gi, Yhâng é kô làm hkìk hkyô eq
Yhâng é gyùq chiq hpô é yánmai,
lungmó zîng pé mâ é lùqhkyûng pé má le,
myigùng mâ é dong pé má le, hpang ê kôrâ nghut lhê.
20 Haú buìnyì má, byu pé gi,
ngo-nòq nhut chun pé eq hpotsit pé lé,
yhángmòq noqkuq râ matú, yhángmòq é lòq èq saî tô é,
hîng hparà hpôlhô eq ngùn hparà hpôlhô pê chyáng dú byî pyám kôrâ nghut lhê.
21 Haû Yhûmsîng Garai gi, myigùng lé lhoqnhún râ ga toq lo é hkûn,
yhángmòq gi, Yhâng é kô làm hkìkhkâm hkyô eq
Yhâng é gyùq chiq hpo mai,
gampyoq gamlhang pé eq,
lungmó zîng gòq hâ tô é dong pé má hpang jé kôrâ nghut lhê.
22 Nhô dong má soq ru she é xângzo byù lé za hkâ lùmhkaû.
Haî mù yhángmòq lé hpautap râ lhú?