Yerusalem Wà Mó Eq Yudaq Mau Lé Târâ Jéyáng É Hkyô
3
Wú keq, Yhûmsîng,haû Wum-o a-tsam dìk shoq bò Sû Yhûmsîng Garai gi,
Yerusalem wà mó eq Yudaq mau mai,
lùmhkaû jowò eq nghêhkaû jang lé yu pyám byi berâ za nghut bê.
Haú pé gi, zoshuq htuqbáng é hkyô bànshoq eq wuì htuqbáng é hkyô bànshoq,
2 wum-o a-tsam bò sû eq gyè zan sarhê,
târâ agyì eq myìqhtoi,
bùt hpyit sû eq sûwún hpó,
3 gyèzo ngo xê ùp sû eq xânghpoq nge wó sû,
hpàqchyî byi sû, lòqmú zui saí kung sû eq myòqheq hpàqchyî kung sû nghut ri.
4 Ngo gi, zoshâng wuì lé, yhángmòq é zaugun wuì kut nhâng mù,
nyheqnú wuî lé, yhángmòq é ahtoq má ùp nhâng râ nghut lhê.
5 Byu pé gi, rayùq eq rayùq htîm lhûm é dông le, yhûmkyochang eq yhûmkyochang htîm lhûm é dông le,
yhangchang zìk zô lhum râ nghut lhê.
Zorâm zo gi, mangzo lé toq htim mù,
hpautap é hui râ a gíng sû gi, hkúngga hpautap é hui gíng sû lé toq htim râ nghut lhê.
6 Byù rayùq gi, yhâng wâ é yhûm má,
yhang gu yhang mâng pê chyáng mâ é rayùq lé kyaq zuî yù mù,
“Nàng gi, mèbu wó é nghut lhê mù, ngá-mòq é ushuq kut àq;
htên byòq bum zang tô é shî lé, nàng wú gôn lajang aq!” ga taí râ nghut lhê.
7 Nghut kôlhang, haú buìnyì má, yhang gi,
“Wó htaî lhik pyám râ a-tsam ngá chyáng haî a jòq.
Ngá é yhûm má zoshuq eq mèbu a wó;
ngo lé, byu pê é ushuq hkâkut nhâng kó.” ga wùt ngau kat râ nghut lhê.
8 Hkâsu mù gâ le, yhángmòq é dang pé eq hkyîzó lòqzó pé gi,
haû Yhûmsîng Garai lé htuqhtíng kômù,
Yhâng é hpungwup bo é myòqdong lé he-ngìk pyâm akô nghut é yánmai,
Yerusalem wà mó gi, htên gyòp byùq bê nghut mù,
Yudaq mau gi, lêng gyòp byùq bê nghut ri.
9 Yhángmòq é myòqdong isâm pé gi, a-tau dông yhángmòq lé sàksé hkâm nyi ri;
yhángmòq gi, yhángmòq é yubàk mara lé, Sodom su de de kut xoq nyi é nghut mù,
haú lé a haq zaú to kó nghut ri.
Yhángmòq gi, dingnyé wó ri!
Yhángmòq gi, yhûmsing gùng yhûmsîng ihkyùp she hâng yù bekô nghut ri.
10 Díngmán bang gi, yhángmòq é hkyîzó lòqzó mâ é ashi lé wó myang gabú kôrâ nghut é yánmai,
nyì ngón yùqyò kôrâ nghut lhê nghû taî kyo keq.
11 Haû agè ashop bang gi, dingnyé wó ri!
Yhángmòq chyáng ihkyùp gyó ri!
Yhángmòq lòq èq kut lai bê hkyo é matú,
yhángmòq taû hpuzo kôrâ nghut lhê.
12 Zoshâng wuì gi, Ngá é byu pé lé zìk zo kômù,
myiwe wuì gi, yhángmòq lé ùp zô akô nghut ri.
Ngá é byu pé ê, núngmòq é hkyô-u shê bang gi, núngmòq lé hkyô shuî nghoq kôluî,
e ló é hkyô mai núngmòq lé shuî lhing pyám bekô nghut ri.
13 Haû Yhûmsîng Garai gi, târâ hpyit râ jowò yù mù,
byu pé lé jéyáng râ matú toq ri.
14 Haû Yhûmsîng Garai gi, târâ jéyáng e ló é má,
Yhâng é byu pê é sûwún wuî eq hkyô-u shê bang lé,
“Ngá é tsibyiq hkyâm lé myhui pyâm é gi, núngmòq yhang nghut akô;
haû asho awuî é bâng chyáng mai lú sing yu é zè pé lé gi,
núngmòq é yhûm pé má hkong tô bum ri.
15 Ngá é byu pé lé lhoqhten lhoqhkyop nyi é eq,
asho awui bâng é myòqdong lhoqpyoq byî nyi é gi, haî nghut akô lhú?” ga mara taî hun ri.
Haû gi, Yhûmsîng, haû Wum-o a-tsam dìk shoq bò Sû Yhûmsîng Garai taî pyo é nghut ri.
16 Haû Yhûmsîng Garai taî le,
“Zi-un byìzô pé gi, myìt myhâng nghutbun uchyang hkyô so kômù,
lìngzing tu nghâng chûng kôluî,
myòq hpuq myòqlàp làp mhaú kômù,
hkyî myhâng tû uchyang e ló kôluî,
hkyîyìn má mhôn é zè shè eq shà eq ga lhoqmyhîng akô nghut ri.
17 Haû mù, haû Yhûmsîng gi, Zi-un myiwe wui é ulhum má jèq dong nhâng râ nghut lhê;
haû Yhûmsîng Garai gi, yhángmòq é gùng a-o túm lé achîn dùt nhâng râ nghut lhê.” gâ ri.
18 Haú buìnyì má, haû Yhûmsîng gi, yhángmòq é yúng zê nghut é, hkyî hting pé, u tsung buìlhô zè pé eq hkông zè pé, 19 nogóng pé, lòq hting pé eq myòq nghop zè pé, 20 mùq pé, hkyîyìn mhón zê pé, hpyihit pé, namngón jung bòng pé eq hkânhpa pé, 21 lòqtsung dizìk pé eq nhô góng pé, 22 gè réng é buhîng pé, ahtoq bu pé, uchyoî nghop bu pé eq ngùn htûng zo pé, 23 myòqjàm pé, nú nhâm é buhîng pé, u nghop pé eq gùng yup pán pé lé yu pyám byi râ nghut lhê.
24 Namngón jûng é malaî gi, bùp shôm nam é,
hpyihit é malaî gi, tui,
xâm nìk é malaî gi, uchyuí chyuî é,
gè réng é mèbû é malaî gi, jimê,
yúng é malaî gi, hoq hpu hkyô, dùt byùq râ nghut lhê.
25 Náng é yùqzô pé gi, sham èq sat hui mù,
náng é gyè zan sarhê pé gi, majan má shi byùq kôrâ nghut lhê.
26 Zi-un é hkum pé gi, ngaùbyi ngaùnhap yón kuq bûm kôrâ nghut lhê;
yhang gi, chamchyuîyuì dùt é myigùng htoq má zung to râ nghut lhê.