4
Haú buìnyì má, myiwe nyhit yùq gi,yùqgè rayùq lé kyaq zuî to mù,
“Ngá-mòq gi, yhûmsing é zoshuq zo mù,
yhûmsing é mèbu wùt râ nghut lhê;
ngá-mòq lé náng é myìng ô má nyì nhâng luî,
ngá-mòq é hoq hpu hkyô lé yu pyám byi laq!” ga taî kôrâ nghut lhê.
Yhûmsîng Garaî É Akoq
2 Haú nyí má, haû Yhûmsîng Garaî é Akoq gi, chyoiyúng é eq hpung bô râ nghut é htoq agó, haú mau mâ é ashi gi, Isira-elaq ming má nyi ding to bâng é nghutbun hkyô eq hpungwup shingkang dùt râ nghut lhê. 3 Zi-un má myìt gyó to mù, Yerusalem wà mó má chyungxe dui nyì bâng é jihpán má kâ tô é bànshoq bang nghut é, Yerusalem wà mó má nyi nân tô é bang lé gi, chyoiyúng bang ga kôrâ nghut lhê. 4 Haû Yhûmsîng gi, Zi-un myiwe wui é agòt a-û hkyô lé chî pyám byi râ nghut lhê; Yhang gi, haû târâ jéyáng é sô eq myi duq é so èq, Yerusalem wà mó mâ é byù sat sui lé huî sêng pyám râ nghut lhê. 5 Haú hkûn, haû Yhûmsîng Garai gi, Zi-un Bùm bànshoq htoq má le, haú má zîng tô é shiwa byu pê é ahtoq má le, nyí lé myihkau mhuthtui eq myín le dùq bó myishâm hpân byi râ nghut lhê; haû hpungwup shingkang gi, jung hkang jung mó lé magûm byi râ nghut lhê. 6 Nyí lé nyé jáng, hkaû râ jowò eq buìshûm jòq râ nghut é htoq agó, laìdun eq mau wô jáng, nghêhkaû jang eq haq râ jowò jòq râ nghut lhê.