Tsibyiq Hkyâm Mâ É Jihkyang
5
Ngò gi, ngò chyit su é matú,yhâng é tsibyiq hkyâm eq séng luî, jihkyang dang sâng bá.
Ngá é chyit sû gi, myìhpún bo é bùm yàm má,
tsibyiq hkyâm rahkyâm wó ri.
2 Yhang gi, haú lé dû hput pyám luî, lùqgòk pé gùq dú pyám mù,
je réng é tsibyiq nuî pé hô tô ri.
Yhang gi, haú má mâchya ralhum saí mù,
tsibyiq wing pyik htoq râ donghkong dû tô ri.
Hau htâng, Yhang gi, ge é réng é tsibyiq shi ê ho wú kôlhang,
a ge é shi pé za zuî to láng ri.
3 Yerusalem wà mó má nyi é bang eq Yudaq byu pé ê,
Ngò eq Ngá é tsibyiq hkyâm gyoro mâ é múzó lé jéyáng byi keq.
4 Ngá é tsibyiq hkyam é matú Ngò kut bê mai lai luî,
haî kut jàt ra shirâ lhú?
Ngò gi, ge é réng é tsibyiq shi lé rû hô le,
haî mù a ge é shi baú zuî lhê lhú?
5 Ngá é tsibyiq hkyâm lé Ngò haî kut râ hkyô,
ahkuî núngmòq lé taî kyo kó bá:
Ngò gi, hkyâm kyâm tô é lé yu pyám râ nghut mù,
haû gi, lhoqhtên pyâm é hui râ nghut lhê;
Ngò gi, hau é hkyâm xêwâm lé hpyoq hpyi pyám râ nghut mù,
haû gi, nâng pyeq pyâm é hui râ nghut lhê.
6 Ngò gi, haú lé lhoqhâm pyám râ nghut mù,
sik le ó a chû pyám, myì le ó a dû úm dùt luî,
haú má, myòq eq zugâm pé yùq râ nghut lhê.
Ngò gi, hau é ahtoq má mau a wo gyun râ matú,
mhut pé lé hkunmó hkyô to râ nghut lhê.
7 Haû Wum-o a-tsam dìk shoq bò Sû Yhûmsîng Garaî é tsibyiq hkyâm gi,
Isira-elaq a-myû nghut mù,
Yhang myìt nguì ô nau é tsibyiq nuî gi,
Yudaq byu pé nghut ri;
haû mù, Yhang gi, târâ ràp-rá hkyô lé ho wú kôlhang, sui shûn byù sat hkyô za myang ri;
díngmán hkyô lé ho wú kôlhang, myìt myo ûng wom ngaù htê za wó gyô ri.
Dingnyé Eq Târâ Jéyáng Hkyô
8 Yhûmsîng baú maumyî má nyì mù,
jowò lháng a myìt to loshoq,
rayhum htâng rayhûm saí luî,
rayo htâng rayò saî xoq yu é bang gi, dingnyé wó ri.
9 Haû Wum-o a-tsam dìk shoq bò Sû Yhûmsîng Garai gi, ngò wó gyô tô é má,
“Gè gè yhang, hkìkhkam é yhûm pé gi, chamchyuîyuì dùt byùq mù,
kô lam yúng é nyì jang gi, byùshôm a nàm dùt byùq râ nghut lhê.
10 Hkâsu mù gâ le, tsibyiq hkyâm raxê hkyanga gi, tsibyiq wing hkyuq chyóng kô za htoq râ nghut lhê;
ngo xê joí ko é kyô myui gi, ngo joí kô za htoq râ nghut lhê.” ga taî pyo ri.
11 Nàpsûn noq le toq mù, îhpe châng ho shuq na luî,
î bâm lò shoq, myín gùnggàm jé nyi é bang gi,
dingnyé wó ri.
12 Yhángmòq gi, yhángmòq é poî má, tíng pé eq sámpyí pé le,
chapchéng pé eq tsibyiq wing pé le wó akô;
nghut kôlhang, haû Yhûmsîng Garai kut é hkyô pé lé haî su a ngàm kut kô é htoq agó,
Yhâng é lòqmú pé lé le a hkúngga kó nghut ri.
13 Haû mù, Ngá é byu pé gi, sê gyô é u-nuq langhpyùt kô é yánmai,
shúm zung é hui kôrâ nghut lhê;
xânghpoq nge wó bang gi, zò-mut shî kôrâ nghut lhê;
mâyû byù mòqmó gi, wuìshit luî, hkyung huí huî byùq kôrâ nghut lhê.
14 Haû mù, mosumhkung gi, yhâng é shi-kàp lé lhoqlhâm mù,
yhâng é nhut lé lam dik shoq hâ tô ri;
yhángmòq é xânghpoq nge wó bang, shiwa byù ajùm ayò,
yhángmòq é garu garín ga bang bànshoq eq rahá gabú bang gi, haú má rut wang ló bûm kôrâ nghut lhê.
15 Haû mù, byu pé gi, hoq lhoqhpû é hui mù,
yùq hkangmó gi, lhoqnyhum pyâm é hui râ mù,
nghutbun bâng é myòqdong pé gi,
lhoqshum pyám byî é hui râ nghut lhê.
16 Nghut kôlhang, haû Wum-o a-tsam dìk shoq bò Sû Yhûmsîng Garai gi, Yhâng é târâ ràp-rá hkyo é yánmai, hkya-on wàq toq é hui mù,
haû chyoiyúng é Garai Gasang gi, Yhâng é díngmán é múzó yánmai, Yhang chyoiyúng é lé shit râ nghut lhê.
17 Haú hkûn, sau pé gi, yhángmòq é mhan nú yô má su, haú má mhan zo kôrâ nghut lhê;
sau zô péb gi, sut wó bâng é chamchyuîyuì htên byòq tô é jáng má myàng zo kôrâ nghut lhê.
18 Haû mhaú hkyô gâ é tuî èq mara lé shê mù,
lhêng shê tui lé su agè ashop hkyô lé she hkyut luî,
19 “Garai Gasang hân kut sháng;
ngá-mòq wó myâng shoq,
Yhâng é múzó lé hân kut sháng gàq.
Ngá-mòq wó sé shoq,
Isira-elaq é Chyoiyúng Sû hen tô é hkyô gi,
chyâng lò, dìk lò sháng gàq.” ga taî é bang gi, dingnyé wó ri.
20 Haû agè ashop hkyô lé, ge ri ga,
ge é hkyô lé, agè ashop hkyô ga, taî é bang le,
haû mauchut lé, maubó malaî kut,
maubó lé, mauchut malaî kut é bang le,
haû hkô é lé, chuî é malaî kut,
chuî é lé, hkô é malaî kut é bang le, dingnyé wó ri.
21 Haû yhûmsing gùng yhûmsîng hpàqchyî bò bûn é eq,
yhûmsing é myòq hí má sé bûn é bang gi, dingnyé wó ri.
22 Haû tsibyiq wing shuq é má î yá dùt é eq,
chi nyhô é î shuq é má yá mó nghut é bang le,
23 haû lòqhkaû lang zè yù mara wó sû lé lhoqlhut pyám luî,
mara a bò sû lé târâ ràp-rá hkyô a kut byî é bang gi, dingnyé wó ri.
24 Haû mù, myishâm gi, hkówá lé nyé gyó pyâm é su le,
mhan kyuq gi, myiduq nyi é má nyé gyó pyâm é su le,
haú bâng é a-myìt gi, bùp byùq râ nghut mù,
haú bâng é abó gi, hpuílup su mùt tâng pyâm é hui râ nghut lhê;
hkâsu mù gâ le, yhángmòq gi, haû Wum-o a-tsam dìk shoq bò Sû Yhûmsîng Garaî é târâ lé he-ngìk pyám kômù,
Isira-elaq é Chyoiyúng Su é mungdang lé haî su a ngàm kut pyâm akô nghut ri.
25 Haû mù, Yhûmsîng Garai gi, Yhâng é byu pé lé nhikjum mó yo luî,
Yhâng é lòq lhâm kat mù, yhángmòq lé dam byî ri.
Haû bùm pé gi, nún lô mù,
byù màng pé gi, wà hkyô pé má mè-pyâng su lèq náng tô bùm bê nghut ri.
Haú pé bànshoq dùt kôle, Yhang nhikjum yô é gi, a zim shi nghut ri;
Yhâng é lòq gi, rû tu toq nyi ashî nghut ri.
26 Yhang gi, mau we mâ é a-myû wui é matú donghkón lhoqtoq mù,
myìdàm htoq ló htâng é jang má nyi é bang lé nhutyang chîn wùt yù luî,
hau bang gi, xé xé tsang tsang za,
han dik é dông lé akô nghut ri!
27 Haú bang mâ é rayùq lháng, ngú byùq é eq lèqbàt é le,
yhupmuî yhup myhî byùq é le,
hpyidum pé mâ é hpyihit byi byùq é le,
hkyî-tsung tui byìt byùq é le, a bò nghut ri.
28 Haú bâng é myoshi pé gi, zèp zèp htoq é nghut mù,
haú bâng é lai pé bànshoq gi, htung to bê nghut ri;
haú bâng é myang pê é hkôdòq gi, paihpoi lùq su dùt mù,
haú bâng é gyèlhêng chap pé gi, laìlhíng mó su dùt ri.
29 Haú bâng é wùt garu htê gi, hkanghkyi zìng mying garû é htê su ga mù,
haú bang gi, hkanghkyi zô pé su wùt garu kôrâ nghut lhê.
Yhángmòq gi, yhángmòq é zoshuq lé kyaq zui uchyang nying garu kômù,
ó yùq le a wó hkyi xe taû yù loshoq, zoshuq haú lé wàq ló byùq kôrâ nghut lhê.
30 Haú buìnyì má, haú bang gi, wuimau mying hûm nyi é su ga,
zoshuq htoq má nying garu kôrâ nghut lhê.
Rayùq yùq, maumyî haú lé wú kat é hkûn,
mauchut tuq dùt tô é eq myìt myo ûng wom hkyô za byíng tô ri;
haû buì lháng, mhut é yánmai, mauchut tuq dùt byùq râ nghut lhê.