Esai-a Wò Hûn Huî É Hkyô
6
Hkóhkâm Uzi-a shi é zànwut má, ngò gi, myhâng shoq hkya-on wàq toq tô é tángmyhâng má zung tô é haû Yhûmsîng lé myang ri; Yhâng é buhîng htâng gi, noqkuq yhûm má byíng zan tô ri. 2 Yhâng é ahtoq má gi, dùng hkyuq dûng dûng dàp é serahpim pé yàp tô ri; haú bang gi, dùng í dung èq yhángmòq é myòqdong má nghop to mù, í dung èq yhángmòq é hkyî má nghop to luî, í dung èq dâng to kut akô nghut ri. 3 Haú bang gi, yhángmòq yhangchang,“Wum-o a-tsam dìk shoq bò Sû Yhûmsîng Garai gi, chyoiyúng, chyoiyúng, chyoiyúng nyi ri;
myìdàm gón gi, Yhâng é hpungwup shingkang byíng zan tô ri.” ga taî garû lhûm bum akô nghut ri.
4 Yhángmòq haû su ga taî garu kô é htê yánmai, hkumtáng pé nún bûm mù, noqkuq yhûm má gi, myihkau îng to bê nghut ri.
5 Haû mù, ngò gi, “Ngò dingnyé wó ri! Ngò gi, htên byòq byùq bê nghut ri! Hkâsu mù gâ le, ngò gi, nhut a sansêng é byù nghut to gù, nhut a sansêng é byu pê chyáng bo nyi tô ri; nghut kôle, ngá é myòqjí gi, Wum-o a-tsam dìk shoq bò Sû Yhûmsîng Garai nghut é, Hkóhkâm lé myàng bê nghut ri.” nghû taî garû é nghut lhê.
6 Haú hkûn, serahpim rayùq gi, hkungga gyàp mâ é gyúng nyi é myigye lé nyàp èq nyhâm yù mù, haú lé yhâng é lòq má kat chûng luî, ngá chyáng dâng lé mù, 7 myigye hau èq ngá é nhut má lé záng luî, “Wú aq, shi èq náng é nhut lé záng bê nghut lhê; nàng bo é mara lé yu pyám byi bê; náng é yubàk lé hkyut pyám byi bê nghut lhê.” ga taî ri.
8 Dum, ngò gi, “Ngò, ó yùq lé nhâng râ lhú? Ngá-mòq é matú, ó yùq ê râ lhú?” ga haû Yhûmsîng taî é danghtê lé wó gyô ri.
Haû mù, ngò gi, “Ngò shî má nyi lhê. Ngo lé nhâng àq!” nghû taî é nghut lhê.
9 Yhang gi, “Ê mù, byù shí bang lé,
‘Núngmòq wó gyô to kôlhang, sê gyo kôrâ a nghut;
núngmòq myang nyì kôlhang, wú sé kôrâ a nghut.’ nghû ê taí aq.
10 Byù shí bâng é i-myìt nhiklhum lé chut mòq nhâng mù,
yhángmòq é nohkyap lé htû nhâng luî,
yhángmòq é myòqjí lé chum nhâng keq.
Haû a nghut le gi, yhángmòq é myòqjí èq wó myâng mù,
yhángmòq é nohkyap èq wó gyo luî,
yhángmòq é i-myìt nhiklhûm èq sê gyo mù,
lhing lò luî, lhoqgê byî é hui kôrâ nghut lhê.” ga taî ri.
11 Haú hkûn, ngò gi, “Yhûmsîng ê, hkâ-myháng jé shoq nghut râ lhú?” nghû taí jáng, Yhang gi, “Wà mó pé gi, byù a nyi byùq loshoq byòq htên byùq é hkûn jé shoq le,
yhûm pé gi, chamchyuîyuì dùt byùq mù,
yò pé gi, chyut htên byùq é hkûn jé shoq le,
12 haû Yhûmsîng Garai gi, yùq hkangmó lé we we má nhang pyám mù,
haú mau lé, bànshoq tô pyâm tô é hkûn jé shoq le, nghut râ nghut lhê.
13 Haú mau má, byù xê gàmbùm mâ é ragàmbùm nyi gyó to kôlhang,
haû gi, dum lhoqhtên pyâm é hui râ nghut lhê.
Nghut kôlhang, mugyêng gàm eq wàqmyòq gàm lé,
yhángmòq htuq pyám luî, a-ngùt jòq tô é nghut mù,
haú mau má, chyoiyúng é a-myui gi, a-ngùt haû su jòq nyì râ nghut lhê.” ga taî ri.