Emanu-elaq Eq Sêng É Alhô Agàn
7
Uzi-a é yhang shu, Yohtam é yhang zo Ahaza Yudaq hkóhkâm kut nyi é u lé, Arama Hkóhkâm Rezin eq Remali-a é yhang zo, Isira-elaq é hkóhkâm Peka gi, Yerusalem wà mó lé dòq htîm akô; nghut kôlhang, yhángmòq gi, a ûng kó nghut ri.2 Haû Dawiq é yhûm bang lé, “Aram mau gi, Ehprim mau eq xoq tuî lhum bekô nghut ri.” ga taî kyô akô; haû mù, hkóhkâm Ahaza eq yhâng é byu pê é i-myìt nhiklhum pé gi, sikmó yô mâ é sikgâm pé lé lai èq mùt nhûn é su, gyùq nán bûm bekô nghut ri.
3 Haú hkûn, haû Yhûmsîng Garai gi, Esai-a lé, “Nàng eq nungzo She-ara Yashupb gi, htoq ê mù, Mèbu chí Su é Yò hkyô mó yâm mâ é Ahtoq hkyam Wuìhtum lé tsâm tô é lànghkang nàm má, Ahaza lé ê hui keq. 4 Haû mù, yhang lé, ‘Sidìq luî, zim za nyì àq, hkâgyùq. Shî myihkau chyùng nyé jôm ló é myizó túm í túm nghut é, Aram hkóhkâm Rezin eq Remali-a é yhang zo nhikmó-yo kô é yánmai, myìt wum hkâgyui. 5 Aram mau, Ehprim mau eq Remali-a é yhang zô pé gi, nang lé lhoqhtên pyám râ hpàqchyî haq htûng kômù, 6 “Ngá-nhúng, Yudaq mau lé ê htim sháng; haú lé a-túm túm ê hpyoq hpyî mù, ngá-nhúng chôm gam yù luî, Tabela é yhang zo lé hau é hkóhkâm kut nhâng sháng.” ga taî akô nghut ri. 7 Nghut kôlhang, haû Ahko Ahkáng lhúnglháng wó Sû Yhûmsîng Garai taî é gi,
“Haú hkyô gingtíng râ a nghut;
haú hkyô dùt lò râ a nghut;
8 hkâsu mù gâ le, Aram mau mâ é ushuq gi, Damasikuq wà nghut mù,
Damasikuq é ushuq gi, Rezin za nghut ri.
Hkyuq xe ngo zân gyoro má,
Ehprim mau gi, lûm yhang byòq htên byùq mù, byù myû ra-myû a dùt lo râ nghut lhê.
9 Ehprim maû é ushuq gi, Samariq wà nghut mù,
Samariq wa é ushuq gi, Remali-a é yhang zo za nghut ri.
Núngmòq gi, lùmjíng myìt a ging kô é nghut jáng,
wó yàp gingtîng to kôrâ a nghut.” gâ ri.’ nghû taí aq.” ga taî ri.
10 Hau htoq agó, haû Yhûmsîng Garai gi, Ahaza lé, 11 “Nàng gi, nìk dik htûm é jang pé má nghut nghut, myhang htáng htûm é jang má nghut nghut, náng é Garai Gasang nghut é, haû Yhûmsîng Garai lé alhô agàn dung aq.” ga taî ri.
12 Nghut kôlhang, Ahaza gi, “Ngò dung râ a nghut; ngò gi, haû Yhûmsîng Garai lé chyam wú râ a nghut.” ga taî ri.
13 Haú hkûn, Esai-a gi, “Dawiq é yhûmbyù wuì ê, ahkuî gyô wú keq! Núngmòq gi, byù lé haî su a ngàm kut kô é htoq agó, Garai Gasang lé le haî su a ngàm kut akô lhú? 14 Haû mù, haû Yhûmsîng gi, Yhang yhang, núngmòq lé alhô agàn ralhum byî râ; haû gi, zo-myi gyíng rayùq, zogûng wùn mù, yùqzo rayùq hkû luî, yùqzo hau é myìng lé, Emanu-elaqc ga râ nghut lhê. 15 Yhang gi, a ge é hkyô lé dàt he-ngìk, ge é hkyô lé dàt hkyin yu é hkûn, no-naú chyîn eq byo-î lé zo râ nghut lhê. 16 Hkâsu mù gâ le, zoshâng haû a ge é hkyô lé a dàt he-ngìk shî é htoq agó, ge é hkyô lé a dàt hkyin yù shî é u má, nàng gyùq nán nyi é hkóhkâm haû í yùq é maumyî gi, chamchyuîyuì dùt byùq râ nghut lhê. 17 Haû Yhûmsîng Garai gi, náng é ahtoq má le, náng é byu pê é ahtoq má le, náng wâ é yhûmbyù wui ahtoq má le, Yudaq a-myû chyáng mai Ehprim a-myû htoq ló byùq é hkûn mai hkû-nyí jé shoq a dùt wú é buìnyì jé nhâng râ nghut lhê. Yhang gi, Asuri hkóhkâm lé jé lé nhâng râ nghut lhê.” ga taî ri.
Yhûmsîng Garaî É Chûngzè Nghut Sû Asuri
18 Haú buìnyì má, haû Yhûmsîng Garai gi, Egutuq ming mâ é wuìmùn chyûng mâ é mhoq jûm lé le, Asuri mau mâ é byo jûm lé le, nhut yang chîn kat râ nghut lhê. 19 Haú pé bànshoq gi, lé jé kômù, langhkung langnoq pé má le, lungmó pé mâ é lùqhkyûng pé má le, zugyóm pé bànshoq má le, mhan nú yô pé bànshoq má le, lé nyi bùm kôrâ nghut lhê. 20 Haú buìnyì má, haû Yhûmsîng gi, Uhprat Wuìlàng hé hpoq mâ é Asuri hkóhkâm nghut é, nghô yu é uwuq shâmhtô èq, núngmòq é uxâm eq hkyî-maú pé lé le, núngmòq é nhutmui pé lé le, wùq pyám byi râ nghut lhê. 21 Haú buìnyì má, byù rayùq gi, no-pyá zo radu eq sau í du rém râ nghut lhê. 22 Haú pé mai, no-naú saunaú agùn agó byî é nghut luî, no-naú chyîn myàng zo râ nghut lhê. Haú mau má nyi gyó tô é bang bànshoq gi, no-naú chyîn eq byo-î lé zo kôrâ nghut lhê. 23 Haú buìnyì má, ngùnhtung sum joí í xe sum rûng zùq é tsibyiq nuî rahkyîng gàm yùq é jowò hkangmó má, myòq gàm eq zu gâm baú dùt bùm râ nghut lhê. 24 Haú mau gón má myòq gàm eq zu gâm baú hup tô é yánmai, sho bik zo bang gi, lai eq myoshi chûng mù, haú má ê kôrâ nghut lhê. 25 Hkop èq dû hô é bùm yò pé bànshoq gi, myòq gàm eq zu gâm pé baú yùq bum é yánmai, ó le a wám ê lo râ nghut mù, no myang eq sau pé nâng lhing é jowò dùt râ nghut lhê.