Esai-a eq Lhô Lho É Hkyô Pé Dông Nghut É Yhang Zô Pé
8
Haû Yhûmsîng Garai gi, ngo lé, “Kâ jung longpá mó yù mù, byu é kâ jûng èq, Mahera-Shalala-Hashi-Bazia nghû ká aq.” ga taî ri. 2 Haû mù, ngò gi, wó lum é sàksé kut byi râ matú, hkyangjong Uri-a eq Yeberehki-a é yhang zo Zehkariq lé ji yu é nghut lhê. 3 Hau htâng, ngò, myìqhtoi myhî chyáng wang yhup é nghut luî, yhang gi, zogûng wùn mù, yùqzo rayùq hku ri. Haú hkûn, haû Yhûmsîng Garai gi, “Yhang lé, Mahera-Shalala-Hashi-Bazi nghû myhíng aq. 4 Hkâsu mù gâ le, zoshâng haû, ‘Ânu, âwa’ ga a dàt wùt shi-má, Damasikuq wâ mâ é sùtzè pé eq Samariq wà bang lú sing yu é zè pé lé gi, Asuri hkóhkam èq yu ló byùq râ nghut lhê.” ga ngo lé taî ri.5 Haû Yhûmsîng Garai, ngo lé dum taî é gi,
6 “Byù shí bang, num za yui nyi é, Shilo-a mâ é wuì lé
he-ngìk pyám kômù,
Rezin eq Remali-a é yhang zo lé,
gabú bum é yánmai,
7 haû Yhûmsîng gi, Asuri hkóhkâm eq yhâng é hpungwup shingkang bànshoq nghut é,
Uhprat Wuìlàng mâ é wuìwúm mó lé,
yhángmòq chyáng nhang kat râ nghut lhê.
Haû gi, wuìhkyo pé bànshoq má le,
hau é gin-gau pé bànshoq má le ûm shun lai râ nghut mù,
8 Yudaq mau má ûm wang ló luî, haú lé ûm hkyut mù,
lìngzing jé shoq lháng jé ló râ nghut lhê.
Haû gi, dùng lé lhoqpyo kat é su, náng é mau gón lé nghop pyám râ nghut lhê.
Emanu-elaq ê!” gâ ri.
9 A-myû wuì núngmòq ê, majan garu htê lhoqhtoq kôle, lhoqhtên pyâm é hui keq!
Mau we ming má nyi é núngmòq bànshoq bang ê, gyô wú keq.
Majân é matú hên mù, lhoqhtên pyâm é hui keq!
Majân é matú hên mù, lhoqhtên pyâm é hui keq!
10 Núngmòq hpàqchyî chôm htoq kôlhang, haû akôm dùt byùq râ nghut lhê;
núngmòq chôm hen to kôlhang, haû wó dùt râ a nghut;
hkâsu mù gâ le, Garai Gasang gi, ngá-nhúng eq rahá nghut nyi lhêb.
11 Haû Yhûmsîng Garai, byù shí bâng é hkyô má ngò a bo cháng râ matú sidìq byi luî, Yhâng é wúm bo é lòq èq, ngo lé taî é gi,
12 “Byù shí bang gumlau toq dang taî é haî lé lháng,
núngmòq gumlau toq dang hkâbo taí kó;
yhángmòq gyùq é lé hkâgyùq kyûm kó;
haú lé hkâgyùq nán kó.
13 Haû Wum-o a-tsam dìk shoq bò sû Yhûmsîng Garai za chyoiyúng Sû nghû hkúngga râ lhê;
Yhang lé za gyùq kyûm râ lhê;
Yhang lé za gyùq nán râ lhê.
14 Yhang gi, chyoiyúng jowò dùt râ nghut lhê;
Yhang gi, Isira-elaq eq Yudaq é matú,
byu pé lé htûng lèqbàt nhang é lùqgòk le,
haú bang lé lèqbàt nhang é lungmó le dùt râ nghut lhê.
Yhang gi, Yerusalem wà mó mâ é byu pê é matú,
lhaí eq tuihkyó dùt râ nghut lhê.
15 Yhángmòq mâ é myo myo gi, htûng lèqbàt kôrâ nghut lhê;
yhángmòq gi, lèqbàt mù, gyòp byùq kôrâ nghut é htoq agó,
tuihkyó má myí luî, chyup yu pyâm é hui kôrâ nghut lhê.” gâ ri.
16 Ngá é chángzô pê chyáng, sidìq byî é sàksé dang shî shung to mù,
Garai Gasang mhoq kyô é hkyô shî lé dizìk htûng to aq.
17 Ngò gi, Yakup é awùt ashîn pê chyáng mai Yhâng myòqdong haq to Sû,
haû Yhûmsîng Garai lé láng nyî râ nghut lhê.
Ngò gi, Yhang lé lùmhkaû râ nghut lhê.
18 Ngò le, haû Yhûmsîng Garaî èq ngo lé byî é zoshâng wuì le, shî má nyi lhê. Ngá-mòq gi, Isira-elaq má, Zi-un Bùm má nyì Sû haû Wum-o a-tsam dìk shoq bò Sû Yhûmsîng Garaî chyáng mâ é alhô agàn pé eq maúhpo azòng pé nghut lhê.
Mauchut Gi, Maubó Dùt Byùq É Hkyô
19 Dangsoq soq mù, nú nhám shoq nyo é, sôbyô dàt ji é bang eq bùt hpyit bang lé hô keq ga núngmòq lé taí kôjáng, byù ra-myû gi, yhángmòq é Garai Gasang lé ge ho lhê a nghut kó lhú? Dui nyì sû lé ho myi râ malaî, haî mù shi byùq bê bang lé ge myi râ lhú? 20 Garai Gasang mhoq kyô é hkyô eq sidìq byî é sàksé dang lé hpàqchyî yù keq. Dang shí pé eq rajung za a taî é bang gi, nàpsûn maubó a wó kó nghut ri. 21 Yhángmòq gi, haú mau gón má myìt myo ûng wôm é eq zò-mut huî é èq laî ló kôrâ nghut lhê. Yhángmòq gi, zò-mut kyi kôjáng, nhik-ûm bùq lò kôluî, ahtoq shut tu wú mù, yhángmòq é hkóhkâm eq yhángmòq é Garai Gasang lé nhing kôrâ nghut lhê. 22 Hau htâng, yhángmòq gi, myigùng shut wú kôrâ nghut mù, myìt myo ûng wôm é, mauchut tuq dùt é eq gyùq chiq mó huî é hkyô lé za myàng kôrâ nghut lhê. Yhángmòq gi, tuq tuq chut é jang shut hkat hkyô pyâm é hui kôrâ nghut lhê.