9
a 1 Nghut kôlhang, myìt myo ûng wom bâng é matú, tîng tîng nòq é jòq lo râ a nghut. Laî ló bê hkûn, Zebulun mau eq Naphtali mau lé Yhang hoq hpu nhâng bê nghut kôlhang, htângnùng lé, Yhang gi, Yodan làng hé hpoq, Wuimau yàm Hkyô acháng nyi é gótû byù myû wui é mau nghut é Galile lé xânghpoq nge wó hkyô byi râ nghut lhê.2 Mauchut hkaû má sô nyi é byu pé gi,
maubó mó lé myàng bekô nghut ri;
Tuq tuq chut é mau má nyì bâng é ahtoq má gi,
myòq myàng maubó bê nghut ri.
3 Nàng gi, a-myû haú lé lhoqmyo byi mù,
yhángmòq é gabú hkyô lé lhoqjàt byi bê nghut ri;
yhángmòq gi, Náng é hí má,
byu pé kyo shû é hkûn gabú kô é su le,
wó lú sing lo é zè pé lé gam é hkûn,
sarhê pé gabú kô é su le, gabú bum akô nghut ri.
4 Hkâsu mù gâ le, Midi-an byu pé lé ung pyâm é buìnyì má su,
Nàng gi, yhángmòq é wòlai dùt nyi é kyaú lé le,
yhángmòq é gòqsân má pyi tô é gán-yang lé le,
yhángmòq lé zìk zo bâng é dumbáng lé le,
lhoqhkyop pyám byi bê nghut ri.
5 Majan má sarhê yùq hkangmó tsûng é hkyî-tsung le,
sui má jum tik é buhîng hkangmó le,
nyhê hkyô pyám râ matú dùt mù,
myi htang dùt pyám râ nghut lhê.
6 Hkâsu mù gâ le, ngá-nhûng é matú zoshâng rayùq hku é nghut luî,
ngá-nhúng lé yùqzo rayùq byi bê nghut mù,
yhâng é gòqsân htoq má gi, ùp é ahkáng ayá kê tô ri.
Yhang lé gi, “Maúhpo wá, hpàqchyî byi Sû, Wum-o a-tsam mó bò Sû Garai Gasang,
Ahtum abyùq é Îwa, Nguì ngón hkyo é Yhûmsîng.” ga myhíng kôrâ nghut lhê.
7 Yhang ùp é ahkáng ayá kô lam é hkyô eq nguì ngón hkyô gi,
htum nghu é jòq râ a nghut.
Yhang gi, Dawiq é hkóhkâm tángmyhâng má zùng mù,
yhâng é mîngdán lé ùp luî,
haú hkûn mai ahtum abyùq yhang,
târâ ràp-rá hkyô eq díngmán hkyô dông mai,
mîngdán haú lé lhoqging lhoqtîng to râ nghut lhê.
Haú hkyô lé, Wum-o a-tsam dìk shoq bò Sû Yhûmsîng Garaî é myìt nguì ô naù hkyo èq
lhoqdùt râ nghut lhê.
Isira-elaq Byu Pé Lé Yhûmsîng Garai Mara Dam Byî É Hkyô
8 Haû Yhûmsîng gi, Yakup chyáng htuqhtîng é mungdang hun kat ri;
haû gi, Isira-elaq byu pê chyáng gyó záng râ nghut lhê.
9 Haû Ehprim a-myû wuì eq Samariq má nyi bang nghut é
byu pé bànshoq bang gi, haú hkyô lé sé kôrâ nghut lhê.
Haú bang gi, i-myìt má nghutbûn é eq gyáng nau é dông mai,
10 “Tsohtung pé lèq gyòp pyám bê nghut kôlhang,
ngá-mòq gi, kyûng yúng tô é lùqgòk èq dum saî saí râ nghut lhê;
hkohúm gâm pé lé htuq pyám bê nghut kôlhang,
ngá-mòq gi, haú pê é malaî kyám gâm pé htaî to râ nghut lhê.” ga taí kô é bang nghut akô.
11 Nghut kôlhang, haû Yhûmsîng Garai gi, Rezin é gye pé lé wum-o lhoqkíng byi mù,
yhángmòq lé htim nhâng luî, yhángmòq é gye pé lé myìt lhoqtoq byi bê nghut ri.
12 Buìhtoq hkyam mâ é Aram byu pé eq buìwàng hkyam mâ é Hpilisiti byu pé gi,
nhut há mù, Isira-elaq byu pé lé myhui pyám bekô nghut ri.
Haú pé bànshoq dùt kôlhang, Yhâng é nhikmó-yo hkyô gi, a zim shî é nghut mù,
Yhâng é dam byi lòq ru lhâm tô ashî nghut ri.
13 Nghut kôlhang, byù shí bang gi, yhángmòq lé bàt hkyop é Su chyáng a lhing lò kô é htoq agó,
haû Wum-o a-tsam dìk shoq bò Sû Yhûmsîng Garai lé le a hô kó nghut ri.
14 Haû mù, haû Yhûmsîng Garai gi, ra-nyí má za, Isira-elaq é ulhum eq sho-myi lé le,
byùm koq pé eq jàm gàm pé lé le zân hpyit pyám râ nghut lhê.
15 Haû sûwún wuî eq xânghpoq nge wó bang gi, ulhum nghut akô;
mhaû mhoq shit é myìqhtoî pé gi, sho-myi nghut akô nghut ri.
16 Byù shí bang lé shuî-û é bang gi, yhángmòq lé shuî nghoq kó mù,
yhángmòq htâng châng é bang gi, hkyô nghoq bekô nghut ri.
17 Haû mù, haû Yhûmsîng gi, zorâm wui pê chyáng a gabú râ nghut é htoq agó,
chuízô pé eq chuimó myhî pé lé shogyô yù râ a nghut;
hkâsu mù gâ lé, yùq hkangmó gi, târâ a hkúngga kô é htoq agó, agè ashop é bang nghut mù,
yùq hkangmó é nhut gi, nghâ dang taî é chyat nghut ri.
Haú pé bànshoq dùt kôlhang, Yhâng é nhikmó-yo hkyô gi, a zim shî é nghut mù,
Yhâng é dam byi lòq ru lhâm tô ashî nghut ri.
18 Gè gè yhang, agè ashop hkyô gi, myi su nyé é nghut mù,
myòq pé eq zu pé lé nyhê kyop pyâm é nghut luî,
sikmó yô pé lé myishâm htoq shoq nyé dùq é nghut mù,
myihkau dùm htoq nhang é nghut ri.
19 Haû Wum-o a-tsam dìk shoq bò Sû Yhûmsîng Garai nhikmó-yô é yánmai,
haú mau gi, nyé gyó râ nghut mù,
byu pé gi, myi htang dùt é hui kôrâ nghut luî,
yhángmòq, rayùq eq rayùq shogyô lhum kôrâ a nghut.
20 Lòqyò hkyam shut lú ngàt zô bùm kôlhang,
zò-mut é hui shi kôrâ nghut lhê;
lòqpaî hkyam shut zo kôlhang,
nhik dìk kôrâ a nghut.
Yùq hkangmó gi, ó le ô é zodù wui é gùngshob lé zo kôrâ nghut lhê.
21 Manase gi, Ehprim lé, Ehprim gi, Manase lé ngàt zo râ nghut lhê;
yhángnhik gi, rahá za kut luî, Yudaq lé chôm htim kôrâ nghut lhê.
Haú pé bànshoq dùt kôlhang, Yhâng é nhikmó-yo hkyô gi, a zim shî é nghut mù,
Yhâng é dam byi lòq ru lhâm tô ashî nghut ri.