10
1-2 Haû chuízô pé lé myàq zo myàq shuq mù, chuimó myhî pé lé lú sing yù zè dông kut kôluî,ngá é byu pé lé zìk zô é má târâ ràp-rá hkyô a kut byi kô é htoq agó,
asho awui bâng é ahko ahkáng lé lú yu pyám byi kômù,
zìk zo zìk shuq râ hkunmó hkyó kôluî,
târâ ràp-rá hkyô a bo é târâ tô é bang gi,
dingnyé wó ri.
3 Mara dam byî é buìnyì má,
mau we mai byò dàn byò sho jé lo é hkûn, núngmòq hkâsu kut kôrâ lhú?
Núngmòq lé lhom wó garúm yû râ matú, ó yùq chyáng din ê kôrâ lhú?
Núngmòq é sùtzè pé lé, hká má hkong to kôrâ lhú?
4 Shúm zûng bâng chyáng bo myìt gyùq lom é eq,
sat hui bâng chyáng bo sat huî é za dùt râ nghut lhê.
Haú pé bànshoq dùt kôlhang, Yhâng é nhikmó-yo hkyô gi, a zim shî é nghut mù,
Yhâng é dam byi lòq ru lhâm tô ashî nghut ri.
Asuri Byu Pé Lé Garai Gasang Jéyáng É Hkyô
5 Haû Yhûmsîng Garai gi, “Ngá é nhikmó-yo dumbáng lé lòq má chung tô bum é,
Ngá é nhikjum yo gán-yang nghut é Asuri byu pé gi, dingnyé wó ri!
6 Ngò gi, Garai a bo é a-myû lé ê htim râ matú, Asuri lé nhang kat mù,
Ngo lé nhikjum yó nhang é byu pé lé ê htim râ matú le,
zè pé lé lú yû lú sing yù râ matú le,
wà gùng mâ é hkabap lé su, yhángmòq lé nâng pyeq pyám râ matú le, yhang lé hkunmó hkyô é nghut lhê.
7 Nghut kôlhang, yhang gi, haú dông a myìt é htoq agó,
haú dông kut râ a hên nghut ri;
yhang myìt hen tô é gi, a-myû myo myo lé lhoqhten lhoqhpyoq mù,
lhoqhtûm pyám râ matú nghut ri.
8 Yhang gi, ‘Ngá é gyèzaû pé bànshoq bang gi, hkóhkam pé nghut lhê, a nghut lhú?
9 Hkalano wà gi, Hkarahkemesha su,
Hamat wà gi, Aripat su,
Samariq wà gi, Damasikuq su nghut lhê, a nghut lhú?
10 Yerusalem wà mó eq Samariq wa é hparà zòng htoq gyaú é hparà zòng wó é,
hparà hpôlhô pé lé noq é mîngdán pé lé ngá é lòq èq lú zing yu é su,
11 ngò, Samariq eq hau é hparà pé lé kut pyâm é eq rajung za,
Yerusalem wà mó eq hau é hparà zòng pé lé kut pyám râ, a nghut lhí?’ gâ ri.” ga taî ri.
12 Haû Yhûmsîng Garai gi, Zi-un Bùm eq Yerusalem wà mó lé htuqhtîng é Yhâng é múzó bànshoq ban kut é hkûn, “Ngò gi, Asuri hkóhkâm lé, yhâng é myìt myhang é eq yhâng é myòq má nghutbûn é yánmai, dam byi râ nghut lhê. 13 Hkâsu mù gâ le, yhang gi,
‘Ngá é lòq wum eq ngá é hpàqchyî byéng-yá èq, shí hkyô lé ngò kut bê nghut lhê;
haî mù gâ le, ngò gi, sê gyô é u-nuq bo é nghut lhê.
Ngò gi, a-myû wui é maukyo pé lé huî pyám luî,
yhángmòq é sùtzè pé lé lú sing yu é nghut lhê;
ngò gi, wum-o a-tsam mó bo é sarhê hpó su, yhángmòq é hkóhkam pé lé lhoqhkyô pyâm bê nghut lhê.
14 Byù rayùq nghoqsut má lhâm jé é su,
ngá é lòq gi, a-myû wui é ngùnzè má lhâm jé bê nghut lhê;
tô pyâm tô é wòq-ú lé byu pé gùq tsîng yu é su,
ngò gi, mîngdán pé bànshoq lé wó tsîng yù bê nghut lhê;
dùng dui nún é le,
nhut há mù kyek myhîng é le, ó a bò nghut ri.’ gâ ri.” ga taî ri.
15 Haû wazung gi, yhang lé chung é su htoq gyaú lhê nghû wó nghutbun râ lhú?
haû sik-yìk gi, yhang lé yìk sû lé wó taî nghutbûn shit râ lhú?
Gán-yang gi, yhang lé tu toq sû lé a wó tu toq é eq,
dumbáng gi, sik a nghut sû lé a wó he nhún é su, nghut ri nhung!
16 Haû mù, haû Yhûmsîng, Wum-o a-tsam dìk shoq bò Sû Yhûmsîng Garai gi,
haû hkóhkam é xu myum é sarhê pê chyáng gyí kyuq byùq jung nòlì nhang kat râ nghut é htoq agó,
yhâng é hpungwup shingkang ô má myiduq myishâm htoq shoq nyé é su,
nyé kyop byùq râ nghut lhê.
17 Haû Isira-elaq é maubó gi, myi dut byùq mù,
yhángmòq é Chyoiyúng Sû gi, myishâm dùt byùq râ nghut lhê;
haû gi, ra-nyí má za,
haû hkóhkam é zu pé eq myòq pé lé nyhê hkyop pyám râ nghut lhê.
18 Yhâng é sik mó yô pé eq myìhpún bo é yò pé mâ é hkìkhkâm hkyô gi,
nò byù rayùq wúm yom ló é su,
lhúnglháng lhoqhtên pyâm é hui râ nghut lhê.
19 Myìt gyó tô é, yhâng é sik mó yô mâ é sikgâm pé gi, lûm shaû byùq mù,
zoshâng zo lháng wó kâ xûm yù râ nghut lhê.
Nyi Myìt Gyó Tô É Isira-elaq Byu Pé
20 Haú buìnyì má, nyi myìt gyó tô é Isira-elaq byu pé eq
wó lùt lo é Yakup é byu pé gi,
yhángmòq lé sat kyop nyî sû lé,
a lùmhkau lo kô é za,
Isira-elaq é Chyoiyúng Sû, haû Yhûmsîng Garai lé teng za lùmhkaû kôrâ nghut lhê.
21 Nyi myìt gyó to sû, haû Yakup a-myû mâ é nyi myìt gyó to sû gi,
Wum-o a-tsam mó bò Sû Garai Gasâng chyáng lhing taû lò râ nghut lhê.
22 Isira-elaq a-myû ê, náng é byu pé gi, wuimau yàm mâ é se-muî su myo kôle,
nyi myìt gyó to sû za taû lò râ nghut lhê.
Lhoqhten lhoqhpyoq hkyô jé râ matú hkunmó hkyô to bê nghut mù,
wuì byíng mui é su, díngmán é hkyô dông kut râ nghut lhê.
23 Yhûmsîng, haû Wum-o a-tsam dìk shoq bò Sû Yhûmsîng Garai gi, ra-mau gón má,
lhoqhten lhoqhpyoq râ hkunmó haú lé lhoqpán râ nghut lhê.
24 Haû mù, Yhûmsîng, haû Wum-o a-tsam dìk shoq bò Sû Yhûmsîng Garai taî é gi,
“Zi-un má nyi é, Ngá é byu pé ê,
Egutuq byu pé kut é su,
núngmòq lé, gán-yâng èq bàt mù, dumbáng èq htîm é,
Asuri byu pé lé hkâgyùq kó.
25 Núngmòq lé Ngò nhikjum yô é hkyô gi, hân za zîm byùq mù,
Ngá é nhikmó-yo hkyô gi, yhángmòq htên byòq byùq râ shut jé râ nghut lhê.” gâ ri.
26 Haû Wum-o a-tsam dìk shoq bò Sû Yhûmsîng Garai gi,
Oreba lungmó htoq má Midi-an byu pé lé sat pyâm é su,
yhángmòq lé nuìchum èq bàt râ nghut lhê;
Yhang gi, Egutuq ming má kut é su,
Yhâng é dumbáng lé, wuì pê htoq má lhâm kat râ nghut lhê.
27 Haú buìnyì má, yhángmòq èq nang lé hun tô é wòlai lé, náng é gòqsân mai,
yhángmòq é kyaú lé, náng é lìngzing mai, wàq pyám byi râ nghut lhê;
nàng gi, lûm xu byùq bê nghut é yánmai,
kyaú haû gyuî byùq râ nghut lhê.
28 Yhángmòq gi, Ai-at wà má wang jé akô;
yhángmòq gi, Migron wà mai laî ló akô;
yhángmòq gi, Mikmasha wà má gyèzè pé lé tô tô akô nghut ri.
29 Yhángmòq gi, ihkyet mai laî byìt ló kômù,
myín lé, Geba wà má wàp xuq lai kôrâ nghut lhê.
Rama wà gi, gyùq nán nyi ri;
Sholuq é wà Gibe-a bang gi, hpang akô nghut ri.
30 Galim byìzô pé ê, wùt garu keq!
Laisha wà ê, gyô wú aq!
Asho awui dùt é Anahtot ê!
31 Matmena wà gi, hpang htòt byùq bê nghut ri;
Gebim wà byu pé gi, wó hpang lùt shoq hpang wún akô nghut ri.
32 Haú nyí má, yhángmòq gi, Noba wà má wàp xuq kôrâ nghut lhê;
yhángmòq gi, Zi-un Byìzô é bùm nghut é,
Yerusalem kong shut,
yhángmòq é lòq tu wìng kôrâ nghut lhê.
33 Wú keq, haû Yhûmsîng, Wum-o a-tsam dìk shoq bò Sû Yhûmsîng Garai gi,
wum-o a-tsam mó èq akoq pé lé chû pyám râ nghut lhê.
Je myhang é sik gâm pé lé htuq lhêng pyám mù,
kô myhang é pé lé lhoqnyhum pyám râ nghut lhê.
34 Yhang gi, sik mó púng lé, wazûng èq htuq lhêng pyám râ nghut lhê;
Lebanon mâ é sikgâm pé lé gi, haû Wum-o a-tsam mó bò Su èq htuq pyám râ nghut lhê.